Read Poqomchi Jos 19 Bible Online

Jos 19 - Poqomchi bible

Jos 19

¹Re' i rukab' ye'aab' xkisik' chi riij awach eh naa rukahniik, re' xkik'ul i junch'uq chi riih rumaam Simeón. Re' ye'aab' re' re' ar xkahnik chupaam i ruyuq'ul i kiye'aab' i junch'uq chi riih rumaam i Judá.

²Eh xye'arik keh i tinamit je' wili kib'ihnaal: Beerseba, Seba, Molada,

³Hazar-sual, Bala, Ezem,

⁴Eltolad, Betul, Horma,

⁵Siglag, Bet-marcabot, Hazar-susa,

⁶Bet-lebaot, Saruhén, oxlaj taqe chi tinamit haa' taqe i kok' ye'aab' wilkeeb' wii patineel.

⁷Eh xye'arik wo' keh taqe i ye'aab': Aín, Rimón, Eter, Asán kajseht taqe chi tinamit, haa' taqe i kok' ye'aab' wilkeeb' wii' i patineel.

⁸Eh haa' wo' taqe i kok' ye'aab' wilkeeb' wii' patineel, xponik ko Baalat-beer, re' wo' hoq i Ramat, wilik paruyuq'ul Neguev. Re' taqe i ye'aab' re' re' xye'arik keh taqe i junch'uq chi riih rumaam i Simeón, re' q'oreel nik' kik'ihaal chi kiib'.

⁹Eh re' taqe i kiye'aab' xkik'ul i junch'uq chi riih rumaam i Simeón re' wo' ruuk' i kiye'aab' i junch'uq chi riih rumaam i Judá. Ruum re' keh xiik' naah nimaal i ye'aab' xye'arik keh ruum aj re' wilik xye'arik keh taqe i riih rumaam i Simeón.

¹⁰Eh re' roox ye'aab' xkisik' chi riij awach eh naa rukahniik, re' xkik'ul i junch'uq chi riih rumaam i Zabulón, re' q'oreel nik' k'ihaal chi kiib'. Re' ye'aab' xkik'ul korehtaal xponik chupaam i tinamit Sarid.

¹¹Eh re' i ruk'ula'tiil wilik reje parookb'aal q'iij i xooj k'oloq ko chupaam i ye'aab' Marala. Eh chi riij i re' xooj k'oloq Dabeset, ar xooj kuxoq chi chii' i nim ha' wilik chuk'ulwaach i tinamit Jocneam.

¹²Eh ar xponik sutinoq Sarid i wilik chi korkiil i xelik cho wii' i q'iij, xponik kopan k'ula't, ruuk' i ye'aab' Quislot-tabor, eh ar xooj k'oloq i wilik wii' i ye'aab' Daberat, inooj k'oloq chinaah i yuuq' Jafía.

¹³Chi riij i re' xik'ik ponoq chi korkiil reje ireelb'aalq'iij chupaam i ye'aab' Gat-hefer, eh ar Ita-cazín, xooj k'oloq ko Rimón, i rukotej riij i ye'aab' Nea.

¹⁴Eh re' i ruk'ula'tiil i ye'aab' pantz'eet reje reh i rookb'aal q'iij xik'ik reje Hanatón, eh xooj eloq wach k'ixkaab' Jefte-el.

¹⁵Eh xik'ik ponoq chupaam i tinamit Catat, je' wo' Naalal, je' wo' Simrón, je' wo' Idala, eh Belén. Kab'laj taqe chi tinamit, haa' taqe i kok' ye'aab' wilkeeb' wii' patineel.

¹⁶Re' taqe i ye'aab' wili xkik'ul i junch'uq chi riih rumaam i Zabulón, re' q'oreel nik' kik'ihaal chi kiib', ha' taqe i tinamit wilkeeb' ar, haa' taqe i kok' ye'aab' wilkeeb' wii' patineel.

¹⁷Re' rukaaj i ye'aab' xkisik' chi riij awach eh naa rukahniik, re' xkik'ul i junch'uq chi riih rumaam i Isacar, re' q'oreel nik' k'ihaal chi kiib'.

¹⁸Eh re' ye'aab' xkik'ul re' je' wili kib'ihnaal: Jezreel, Quesulot, Sunem,

¹⁹Hafaraim, Sihón, Anaharat,

²⁰Rabit, Quisión, Ebez,

²¹Remet, En-ganim, En-hada, Bet-pases.

²²Re' i ruk'ula'tiil i ye'aab' re' re' xponik chupaam i ye'aab' Tabor, Sahazima, Bet-semes, eh ar inooj kuxoq chi chii' i nim ha' Jordán. Waqlaj chi tinamit, haa' taqe i kok' ye'aab' wilkeeb' wii' i patineel.

²³Re' taqe ye'aab' wili xkik'ul i junch'uq chi riih rumaam i Isacar haa' taqe i tinamit wilkeeb' ar, haa' taqe kok' ye'aab' wilkeeb' wii' patineel.

²⁴Re' roo' ye'aab' xkisik' chi riij awach eh naa rukahniik re' xkik'ul i junch'uq chi riih rumaam i Aser, re' q'oreel nik' k'ihaal chi kiib'.

²⁵Re' taqe i tinamit xkik'ul je' wili kib'ihnaal: Helcat, Halí, Betén, Acsaf,

²⁶Alamelec, Amad, Misal. Ar xponik kochinaah i yuuq' Carmelo, chi korkiil reje i rookb'aal i q'iij, xponik wo' hoq ko Sihor-libnat.

²⁷Chi riij i re' xponik chi korkiil reje i reelb'aal q'iij ar Bet-dagón. Xponik ko ar Zabulón, xponik wach k'ixkaab' reh i Jefte-el pantz'eet reh i rookb'aal i q'iij, xponik Bet-emec ar Neiel, eh xik'ik ponoq Cabul.

²⁸Eh xponik wo' chupaam taqe i tinamit je' wili kib'ihnaal: Hebrón, Rehob, Hamón, Caná. Eh xponik i wilik wii' i nimlaj tinamit Sidón.

²⁹Eh re' ruk'ula'tiil i kiye'aab' xsutinik chaloq ar Ramá, eh xponik chupaam i ar Tiro i kotimaj riij chi tz'aq, i xooj eloq Hosa, ar xooj eloq chi chii' i palaw Mediterráneo, i xooj k'oloq Mahaleb, eh ar Aczib.

³⁰Eh je' wo' ar Uma, Afec, eh ar Rehob. Kiib' ru ka'winaq chi tinamit, haa' taqe i kok' ye'aab' wilkeeb' wii' patineel.

³¹Re' wili i ye'aab' xkichop naah i junch'uq chi riih rumaam i Aser, haa' taqe i tinamit wilkeeb' chupaam, haa' taqe kok' ye'aab' wilkeeb' wii' patineel, re' q'oreel nik' kik'ihaal chi kiib' chi riih rumaam i Neftalí.

³²Re' ruwaaq ye'aab' xsik'arik chi riij awach eh naa rukahniik, re' xkik'ul i junch'uq chi riih rumaam i Neftalí re' q'oreel nik' k'ihaal chi kiib'.

³³Re' ruk'ula'tiil i ye'aab' xkik'ul xponik chupaam i tinamit Helef, Alón-saananim, Adami-neceb, eh xponik ar Janeel, je' wo' chupaam i ye'aab' Lacum, ar inooj k'oloq chi chii' i nim ha' Jordán.

³⁴Eh re' ruk'ula'tiil parookb'aal i q'iij, xooj k'oloq ar Aznot-tabor, xooj k'oloq ar Hucoc. Eh xooj pansak'aaj reh i rookb'aal q'iij pan kiye'aab' i riih rumaam Zabulón. Eh xooj wo' panookb'al reh i q'iij pan kiye'aab' i riih rumaam i Aser. Eh inooj parelb'aal q'iij, pan kiye'aab' i riih rumaam i Judá, chi chii' i nim ha' Jordán.

³⁵Re' taqe i tinamit kotimaj riij chi tz'aq xye'arik keh i riih rumaam i Neftalí je' wili kib'ihnaal: Sidim, Zer, Hamat, Racat, Cineret,

³⁶Adama, Romá, Hazor,

³⁷Cedes, Edrei, En-hazor,

³⁸Irón, Migdal-el, Horem, Bet-anat, Bet-semes. B'elejlaj chi tinamit, haa' taqe i kok' ye'aab' wilkeeb' wii' patineel.

³⁹Re' taqe re' i ye'aab' xkik'ul i riih rumaam i Neftalí, haa' taqe i tinamit wilkeeb' chupaam, haa' taqe i kok' ye'aab' wilkeeb' wii' patineel.

⁴⁰Re' ruwuuq ye'aab' xkisik' chi riij awach eh naa rukahniik, re' xkik'ul i junch'uq chi riih rumaam i Dan. Re' q'oreel nik' k'ihaal chi kiib'.

⁴¹Re' taqe i tinamit xkik'ul je' wili kib'ihnaal: Zora, Estaol, Ir-semes.

⁴²Saalabín, Ajalón, Jetla,

⁴³Elón, Timnat, Ecrón,

⁴⁴Elteque, Gibetón, Baalat,

⁴⁵Jehúd, Bene-berac, Gat-rimón,

⁴⁶Mejarcón, Racón, ruch'ihil i tinamit wilik reje chi k'ulwaach i tinamit Jope.

⁴⁷Re' taqe i riih rumaam i Dan Ma' xmanlojik ta keh i ye'aab' re' re', je' re' noq xiooj chi peleto chupaam i tinamit Lesem, eh noq kikansaj chik chu'nchel i patim taqe ar xkichop naah xi okik chi patinik chupaam i tinamit re' re'. Eh xkijal wach i rub'ihnaal Dan chik i rub'ihnaal xkikoj ruum je' re' i rub'ihnaal chaloq i xikin kimaam.

⁴⁸Re' wili i ye'aab' ruch'ihil taqe i tinamit wilkeeb' chupaam, ruch'ihil wo' taqe i kok' ye'aab' wilkeeb' wii' patineel i jun ch'uq chi riih rumaam i Dan. Re' q'oreel nik' k'ihaal chi kiib'.

⁴⁹Eh noq re' taqe i aj Israel kikohlaam chik ruch'aqariik chu'nchel i ye'aab'. Eh kik'ulum chik i kiye'aab' chi kich'uhqaal. Re' Josué rak'uun i Nun xye'arik wo' ruye'aab' chi kixilak i aj Israel.

⁵⁰Eh xkian wo' hoq i xuq'or i QaJaaw Dios xkiyeew wo' reh i Josué i ye'aab' Timnat-sera wilik paraxchee', re' ruuk' i kiye'aab' i riih rumaam i Efraín, re' wo' hoq i rupahqaam i Josué. Eh re' reh xuyejaa' wo' chik i tinamit re' re', eh xokik chi patinik ar.

⁵¹Re' taqe i ye'aab' wili xuch'aq i Eliazar i k'amal kib'eeh aj tiij keh i ju'jun ch'uq chi aj Israel ruch'ihil i Josué rak'uun i Nun, kuch'ihil taqe i k'amal kib'eeh i aj Israel, noq wilkeeb' ar Silo. Re' i xkisik' chi riij i ye'aab' chuwach i QaJaaw Dios panookb'al reh i santo laj itz'ihy naah paat molb'al iib', aha' wilik i naa rukahniik keh i ju'jun ch'uq chi aj Israel. Eh je' re' noq xkikohlaaj ruch'aqariik chu'nchel i ye'aab'.