Read Poqomchi Jos 23 Bible Online

Jos 23 - Poqomchi bible

Jos 23

¹Eh k'ih-oq chik haab' ruye'em taqe pansuqkiil k'uxliis i aj Israel i QaJaaw Dios, ma' xta chik q'aq'inik kuuk' taqe i nixowanik kiwach, noq re' Josué k'ih chik i ruhab'ul riji' winaq chik chi korik.

²Re' Josué xutaq'aaj kik'amariik chu'nchel i aj Israel, ruch'ihil i k'amal b'eeh chi kixilak, taqe q'atal q'orik, taqe i kikamanik chi kixilak, je' wili i xuq'or keh: Re' hin k'ih chik i nuhab'ul xin rijb'ik chik chi korik.

³Re' taq i hat xawil taq chik i xub'an QaJaaw Dios kuuk' chu'nchel i tinamit ki-ixowanik taq awach, chi k'axb'al taq aweh i hat. Re' QaJaaw Dios xb'anik i peleto taq chawiij.

⁴Re' hin xnusik' chi riij noq xnuch'aq chu'nchel i ye'aab' keh i ju'junch'uq chi wuch aj Israel. Eh ma' xata re' i ye'aab' chopooj nah xnuch'aq, nuch'aq la' wo' hoq i komajaa' naq inchoparik naah ar intohq'ik cho chi chii' i nim ha' Jordán imponik ko chi chii' i palaw Mediterráneo panookb'al reje reh i q'iij.

⁵Re' i QaJaaw Dios naa resam taqe reje chupaam i ye'aab' re' re' i patineel wilkeeb' ar. Eh re' taq chik i hat naa achopwiik naah, je' wo' rukab' i ruq'orom i QaJaaw Dios.

⁶Eh re' taq i hat cha chop taq ak'ux chunimjiik i ruq'or taqe i k'uhb'aal tz'ihb'amaj, re' i xye'arik reh i Moisés. Eh cha a'n taq chu'nchel i ruq'or, ma' t'ooj taq panasak'aaj, ni xata nee taq tiooj panatz'eet.

⁷Eh maa a'n taq jinaj awach kuuk' i tinamit ko wilkeeb' taq chaxilak ayu'. Eh maa q'or wo' taq i korik pankib'ihnaal i tiyoox inkiloq'ej i keh, ni xata naa taq aloq'em, eh ma' naa ta wo' axuk'aam taq awiib' chikiwach.

⁸Maacanaa' taq runimjiik taq aaWaJaaw aaDios je' rukab' i xat k'uloq taq ayu' chub'anariik.

⁹Re' QaJaaw Dios xresaj taq reje chawach i ki-ixowanik taq awach i nimaq kiwach kow inki a'n kiib'. Eh xat k'ulik taq iloq ayu' yu'naak chi ma' awach ta taq inkuywik i q'aq'inik taq awuuk'.

¹⁰Xa jinaj chi winaq taq chaxilak i hat neerub'an reje rukaajiik jino'q miil chi aj ixowaal, ruum re' QaJaaw Dios imb'anik i peleto taq chawiij i hat, je' wo' rukab' i ruq'orom chaloq.

¹¹Je' re' noq chawik'raaj taq awiib' i hat cha ju'junaal cha k'ax taq i QaJaaw Dios.

¹²Eh wila' xakanaa' taq rulooq'jiik i QaJaaw, eh wi xa a'n taq aweh i hat inki a'n i tinamit koxikahnik taq chaxilak. Eh xa a'n taq kaxáro kuuk', i xa a'n taq jinaj awach kuuk'.

¹³Chanab'eej taq chi re' i QaJaaw Dios ma' nee ta taq chik ti rutoob'eej, chi kehteesjiik reje i tinamit. Naa la' kikahniik chi xirob' taq cha weh, naa kaat taq kiye'em chi tz'uhuum, eh chi k'iix taq panaq'awach. Korehtaal imponik i q'iij chi ma' jino'q taq chik aweh i hat naa rukahniik chupaam i holohik laj ye'aab' wili i ruye'em taq aweh i QaJaaw Dios.

¹⁴Re' hin ponik reh i ruq'ijil i nukimiik, xa re' la' peet inwaaj chi nee taq inakoj rehtaal chi nee taq inanimaj chu'nchel ak'ux, chu'nchel taq awánima chi re' i QaJaaw Dios xub'an chaloq chu'nchel i holohik ruq'orom rib'iral taq aweh. Ma' jino'q chik i xukanaa' chi ma' ta xub'an.

¹⁵Eh nik' wach noq xuyeew taq cha weh i holohik ruq'orom cho rib'iral taq aweh i QaJaaw Dios, je' wo' chik re' noq naa ruye'em taq cho cha naah i runimaal i ti' k'axik. Korehtaal imponik i q'iij chi ma' jino'q taq chik aweh i naa rukahniik chupaam i holohik laj ye'aab' wili ruye'em taq aweh i QaJaaw Dios.

¹⁶Wila' ma' xa a'n taq i ruyejaam taq cho wach awuuk' i QaJaaw Dios wila' xat'ooj taq chi kilooqjiik taqe i tiyoox, wi xaxuk'aa' taq awiib' chikiwach. Re' i QaJaaw Dios naa ruchaliik rujosq'iil taq cha naah, jumehq'iil naa rusahchiik taq awach chupaam i ye'aab' wili, q'e' holohik ruye'em taq aweh i reh, inki.