Read Poqomchi Jos 4 Bible Online

Jos 4 - Poqomchi bible

Jos 4

¹Eh noq ik'inaq chik taqe reje i aj Israel chi juntar i nim ha' Jordán, re' i QaJaaw Dios je' wili i xuq'or reh i Josué:

²Re' hat cha sik' kiwach kab'laj-oq i winaq ju'jun i naa asik'im wach chi kixilak i ju'jun ch'uq chi aj Israel.

³Eh cha q'or keh chi kesaj ju'jun kab'aaj panyejaal i nim ha' Jordán, re' pa'alkeeb' wii' i k'amal kib'eeh aj tiij reh chi neenkik'am reje neen kiyeew chupaam i ye'aab' naa taq akahniik wii' chupaam aq'ab' yu'naak, inki.

⁴Chi riij i re', re' i Josué xuyuq'eej ruuk' taqe i kab'laj chi winaq xusik' kiwach chi kixilak i ju'jun ch'uq chi aj Israel.

⁵Eh je' wili xuq'or keh: Okeen taq i koq panyejaal i nim ha' Jordán chuwach i loq'laj kaxa molik wii' i ruk'uhb'aal taq aaWaJaaw aaDios cha ju'junaal taq chawesaj cho ju'jun-oq ab'aj nee taq i nayeew cho nah atileb'. Eh kab'laj chi ab'aj taq i neenawesaj chaloq ju'jun keh i ju'jun ch'uq chi aj Israel.

⁶Re' taqe ab'aj re' re' naa rukahniik chi rehtalil chib'ih i xub'an i QaJaaw Dios. Eh noq naa taq kipahqaam aweh awak'uun awixq'uun chi je' wili: ¿Chib'ih reet noq wilkeeb' ayu' ab'aj wili? inko'q taqe.

⁷Re' taq i hat je' wili kichaq'weesjiik taq naa a'nam: Re' taqe ab'aj wili rehtaliil chi xchiqik i nim ha' Jordán xuch'aq riib' noq xk'ik'saj juntar ha' i loq'laj kaxa molik wii' i ruk'uhb'aal i QaJaaw Dios. Re' wo' taqe ab'aj wili naa rukamaniik chi rehtalil reh chi naa ruk'uliik pankik'ux chi juneliik i aj Israel chib'ih i xub'an i Dios ayu', inki.

⁸Eh re' taqe i kab'laj chi winaq xkian wo' hoq i xq'orarik keh ruum i Josué, xkesaj wo' chaloq ju'jun kab'aaj panyejaal i nim ha' Jordán kab'laj chi ab'aj i xkesaj ju'jun keh i ju'jun ch'uq chi aj Israel. Eh xkik'am reje ko aha' xkiyejaa' wii' ki-itz'ihy naah paat, ar xkimol wach je' wo' rukab' i xuq'or i QaJaaw Dios reh i Josué.

⁹Eh re' i Josué reh xumol wo' wach i kab'laj chi ab'aj panyejaal i nim ha' Jordán re' i xipahik wii' i k'amal kib'eeh aj tiij kik'amwik reh i loq'laj kaxa molik wii' i ruk'uhb'aal i QaJaaw Dios. Eh re' taqe i kab'laj chi ab'aj re' re' ar xkahnik chi jumpech.

¹⁰Eh re' taqe i k'amal kib'eeh aj tiij kik'amwik reh i loq'laj kaxa xi kahnik paa' panyejaal i nim ha' Jordán, noq re' taqe i aj Israel xkian chu'nchel i xuq'or i Dios re' i xq'orarik keh ruum i Josué. Eh nik' wach i ruq'orom chee i Moisés reh i Josué, je' wo' re' rub'aan xkian chu'nchel. Eh re' taqe i aj Israel ki-ik'ik chi jumehq'iil chi juntar i nim ha' Jordán.

¹¹Eh noq ki-ik'ik chi juntar i nim ha' chu'nchel i tinamit ki-ik'ik wo' reje chi juntar i nim ha', chi peet b'eeh taqe i k'amal kib'eeh aj tiij i kik'amwik reh i loq'laj kaxa molik wii' i ruk'uhb'aal i QaJaaw.

¹²Eh re' taqe i junch'uq chi riih rumaam Rubén, re' i junch'uq chi riih rumaam i Gad, re' i yejaal i ch'uq chi riih rumaam Manasés kichopom kitz'a'amb'aal noq xik'ik chi peet b'eeh chikiwach i aj Israel, je' rukab' i q'orooj cho keh ruum i Moisés.

¹³Eh je' naak'isiin ma' ka'winaq miil i kichopom kitz'a'amb'aal i kiyejaam kiib' chi q'aq'inik xiooj wach k'ixkaab' Jericó chuwach i QaJaaw Dios.

¹⁴Chupaam i q'iij re' re' xye'arik runimaal wach i Josué ruum i QaJaaw Dios, reh chi re' taqe i aj Israel kiyohleej wach i Josué chupaam chu'nchel i ruk'achariik, je' wo' rukab' noq xkiyohleej wach i Moisés noq xub'an.

¹⁵Eh re' i QaJaaw Dios je' wili i xuq'or reh i Josué:

¹⁶Re' hat cha q'or keh i k'amal kib'eeh i aj tiij kik'amwik reh i loq'laj kaxa molik wii' i ruk'uhb'aal i QaJaaw Dios chi kieloq cho chupaam i nim ha' Jordán, inki.

¹⁷Eh re' i Josué xuq'or wo' keh chi xi elik cho ar.

¹⁸Eh noq xi elik cho chupaam i nim ha' Jordán, taqe i k'amal kib'eeh aj tiij re' noq xi elik cho chi chiq yuuq xuk'ul wo' chik lom riib' i nim ha' xutoq'aa' wo' chik elik chi taq chii' je' rukab' i pampeet.

¹⁹Re' taqe i aj Israel xi elik reje chi chii' i nim ha' Jordán chupaam i lajeeb' rub'eeh i peet poh reh i haab'. Eh ar xooj kiyejaa' i ki-itz'ihy naah paat Gilgal wilik reje chi korkiil i reelb'aal q'iij reh i Jericó.

²⁰Eh re' i Josué ar xumol kiwach taqe i kab'laj chi ab'aj xkesaj chaloq chupaam i nim ha' Jordán.

²¹Eh je' wili i xuq'or keh i aj Israel noq naa kipahqaam taq aweh awak'uun awixq'uun na' chub'an chi je' wili: ¿Chib'ih reet noq wilkeeb' taqe ayu' ab'aj wili? inko'q taqe.

²²Eh re' taq i hat je' wili kichaq'weesjiik taq naa a'nam: Re' taqe ab'aj wili rehtalil chi panchiqiij xoj ik'ik noq xqaq'at wach i nim ha' Jordán, tiko'q taq.

²³Ruum re' i QaJaaw Dios korik wo' hoq chi xuchiqsaj i nim ha' Jordán noq xoj ik'ik ar je' rukab' noq xuchiqsaj i kaq palaw noq xoj ik'ik cho chupaam i hoj najtir.

²⁴Chi je' re' chu'nchel i tinamit wach ak'al naakinab'iniik reh chi re' QaJaaw qaDios i hoj xiik' nah i runimaal i rajaawriik. Eh reh wo' hoq chi nee taq inayohleej wach i hat chi juneliik, inki.