Read Poqomchi Jos 7 Bible Online

Jos 7 - Poqomchi bible

Jos 7

¹Jinaj i winaq aj Judío Acán rub'ihnaal rak'uun i Carmi riih i Zabdi, xikin riih Zera, wili taqe i xa chib'ih jariik xuchop, re' ruuk' i ruq'orom i Dios chi naa rusahchiik kiwach. Ruum chi xuchop taqe re' chi kunchelaal i aj Israel xkahnik wach kinaah i mahk re' re' ruum i QaJaaw Dios, eh ma' k'isiin ta xchalik i rujosq'iil chikinaah.

²Eh koq'uun chik re' Josué noq wilkeeb' ar Jericó wilik taqe i winaq xutaq'aaj reje pan tinamit Hai, re' wilik parelb'aal q'iij reh i Bet-el, ma' najt ta ruuk' i Bet-avén, je' wili i xuq'or reje keh: Hiy taq chatah i tinamit Hai, inki, re' taqe i winaq re' re' xooj wo' kitaah i tinamit.

³Eh noq xi sutinik chaloq je' wili i xkiq'or reh i Josué: Ma' koruman taj chi chu'nchel i qatinamiit Israel nee kiooj Hai kiib' oon ixib' miil chi winaq manlik nee kiooj chi peleto ar, eh neen kichop naah i tinamit re' re'. Ruum re' kicha'jinik reh i tinamit re' re' xa, ma' k'ih ta taqe, inki taqe.

⁴Eh xa ixib' miil chi winaq i xijohtik chub'anariik reh i tinamit Hai. Xa re' la' re' taqe i aj Hai wilik i aj Israel xkian reh, eh wilik i xkajimaj chaloq.

⁵Eh re' taqe i aj Hai waqlaj ru ka'winaq i xkikansaj chi kixilak i aj Israel. Eh re' taqe i ruk'ihaal xkajimaj chaloq pan tinamit, xi k'ulik kanab'joq panqajik inehteesjik wii' ab'aj. Eh ruum i xb'aan keh re' re' chu'nchel i aj Israel xub'an kiib' kik'ux, xchalik kiyo'jiik.

⁶Re' Josué, ruch'ihil taqe i k'amal kib'eeh i aj Israel xkiweq i kiso' xkipukej i pooq wach kinaah ruum ruti'kiil kik'ux. Eh kipach'aa' qohoq kiib' korehtaal xkireq wach ak'al ruuk' i yejal kiwach chuwach i koq i loq'laj kaxa molik wii' i ruk'uhb'aal i QaJaaw Dios, korehtaal chik xokik i q'iij.

⁷Re' Josué je' wili i xuq'or: QaJaaw Dios xti ti' wo' chik ¿Chib'ih reet noq xawik'saj taqe chaloq juntar i nim ha' Jordán taqe i aj Israel? ¿Mi xa re' nawaaj re' chi naakooj aq'asam pan kiq'ab' taqe i aj amorreo reh chi naa kisacham qawach? Ma' xta naq reet chi xoj kahnik ta cho chi juntar i nim ha' Jordán.

⁸QaJaaw Dios ¿Chib'ih i ruk'ul chi nee nuq'or yu'naak? ruum re' taqe i aj Israel xkimol cho chi elik chikiwach i aj ixowaal.

⁹Eh re' taqe i aj cananeo, je' wo' taqe i patim chupaam i ye'aab' re' re' noq neenkib'iraj chib'ih i xk'ularik neenchalik kisach qawach pankomonil. Eh ¿Chib'ih i neen q'orarik chi riij i runimaal wach ab'ihnaal? inki.

¹⁰Eh re' i QaJaaw Dios je' wili i ruchaq'weesjiik xub'an: Josué wukteen johtoq, Chib'ih jariik i napachib'ej ar wach ak'al.

¹¹Re' taqe i awuch aj Israel ximahkunik chi nuwach ma' xkinimaj taj i k'uhb'aal xnuyejaa' wach kuuk', wilik i chib'ih jariik xkik'am chaloq re' naq ruuk' i naa rusachariik kiwach. Eh xkelq'aaj, xanaah re' keht'al wo' naq chi ma' toob' ta xkikeb'aa' chi xilak i chib'ih keh.

¹²Ruum aj re', re' taqe i aj Israel re' re' ma' nee ta inkikuy ruk'ulb'eejiik taqe i aj ixowaal. Naa la' kimolom chi elik chikiwach, ruum aj re', re' taqe i aj Israel i ruk'ul chi naa rusachariik kiwach yu'naak. Eh wila' ma' xasach taq wach i hat i nuq'orom i hin chi naa rusahchiik kiwach, re' hin ma' naa ta chik nuwihiik taq awuuk'.

¹³Re' hat Josué cha q'or keh i tinamit chi kisaqb'isaj kiib' reh chi nee kichalik chi nuwach iqal. Re' hin i hin taq aaWaJaaw aaDios je' wili nuq'or: Re' taq i hat aj Israel xawelq'aaj taq chaloq i naa naq rusachariik kiwach. Wila' ma' xasach taq wach, wila' ma' xawesaj taq reje chaxilak ma' jaruuj taq chik naa akuyum i peleto kuuk' i ki-ixowanik taq awach, kinki.

¹⁴Eh re' taq i hat wahq'eq i iqal ti chaloq taq chi nuwach chi ch'uhqaal taq aatinamiit, aha' wilik ch'uq i naa nuq'orom i hin chi naa ruchaliik chi nuwach naa wo' ruchaliik, ruch'ihil taqe awach reh parupaat. Eh aha' wilik junch'uq chi patineel naa nuq'orom i hin chi naakichaliik, naa wo' kichaliik chi nuwach jarub' chi winaq wilkeeb' panupaat.

¹⁵Eh awach aj uuk' neenkan i naa naq rusahchiik kiwach inchol chi naa ruk'ahtiik i reh, je' wo' chu'nchel i awach reh, chu'nchel i chib'ih reh. Ruum xub'an i yiib' wach na'ojb'al ma' ruk'ul ta chi b'anarik chi kixilak i aj Israel ma' xunimaj taj i nuyejaam wach i hin, inki i Dios.

¹⁶Re' Josué kowahq'eq xwuktik chi junwaar, eh xuq'or keh i aj Israel chi naa kichaliik chi kich'uhqaal, xumol kiwach i aj Israel. Eh re' i ruch'uhqaal i riih rumaam Judá xk'uhtjik reh i Josué, ruum i Dios.

¹⁷Re' Josué xuq'or chi naakichaliik i junch'uq chi riih rumaam Judá, eh chi kixilak i re' xk'uhtjik taqe riih rumaam i Zera, eh chi riij i re' xik'ik taqe awach reh parupaat i Zera. Eh chi kixilak taqe i xk'uhtjik i riih rumaam Zabdi.

¹⁸Eh noq xiooj k'oloq chi kiju'junaal taqe i winaq i riih rumaam i Zabdi. Eh chi kixilak taqe re' xureq i QaJaaw Dios chi re' Acán wilik ru mahk. Re' Acán re' re' rak'uun i Carmi, riih i Zabdi, xikin riih rumaam Zera. Re' taqe re', re' ruuk' taqe i riih rumaam Judá.

¹⁹Eh noq xrib'iraj chi je' re' i Josué je' wili i xuq'or reh i Acán: Wila' re' hat inawaaj aye'em runimaal wach, inawaaj aye'em ruloq'il i QaJaaw Dios cha q'or weh chib'ih jariik i xa a'n ma' keb'aa' chi nuwach, inki.

²⁰Re' Acán je' wili i chaq'wik xub'an: Re' hin i nuq'or i korik chi ximahkunik chuwach i qaDios i hoj, hoj aj Israel, re' taqe i wili i xnub'an:

²¹Noq xoj okik Jericó chi kixilak taqe i chib'ih jariik xwilow wach jinaj i holohik itz'ihy inchalik Babilonia, xwilow wach i kiib' siento chi tumiin plata, xwilow wach i junrahp chi oro ik'inaq naa jinaj libra rahliil, eh xnuk'am taqe chi weh. Eh xnuk'ot jinaj i jul panyejaal i nu itz'ihy naah paat, ar taqe xnumuq'aa', eh chi ri'sil taqe re' xnuyeew i tumiin.

²²Eh noq xrib'iraj chi je' re' i Josué wilik taqe i winaq xutaq'aaj chupaam i ru-itz'ihy naah paat i Acán. Eh ar wo' xponik kireq chu'nchel i rukeb'aam i Acán, chi ri'sil wo' xkireq i tumiin.

²³Eh xkik'am reje chuwach i Josué, eh chikiwach chu'nchel i aj Israel. Eh kiq'asaj chuwach i QaJaaw Dios.

²⁴Eh re' Josué, eh chu'nchel i aj Israel xkichop i Acán xkik'am reje chuwach k'ixkaab' Acor, ruch'ihil itz'ihy ruch'ihil i tumiin, ruch'ihil i junrahp chi oro, ruch'ihil wo' taqe i rak'uun rixq'uun. Eh xkik'am wo' taqe i rub'oyaax i rutentzuun, ruch'ihil i ru-itz'ihy naah paat, je' wo' chu'nchel i chib'ih reh.

²⁵Eh re' Josué je' wili i xuq'or reh i Acán: ¿Chib'ih reet noq xak'am chee ti' k'axik wili chi qanaah? Yu'naak re' QaJaaw Dios ye'woq jilow aweh, inki. Noq xukohlaaj ruq'orariik i re' i Josué chu'nchel i aj Israel xkikutib'eej chi ab'aj i Acán, eh xkik'at, je' wo' chu'nchel i rak'uun rixq'uun.

²⁶Eh xkiyeew i juntuhb' chi ab'aj chinaah, eh ar xkahnik chi jumpech. Ruuk' i re' xik'saj i rujosq'iil i QaJaaw Dios. Ruum aj re', re' i ye'aab' re' re' Acor i rub'ihnaal xkahnik chi jumpech.