Read Poqomchi Jos 8 Bible Online

Jos 8 - Poqomchi bible

Jos 8

¹Re' i QaJaaw Dios je' wili i xuq'or reh i Josué: Mat yo'jik, maa rub'an kiib' ak'ux. Chak'am taqe reje chu'nchel i soldado hiy chak'ulb'ilej taqe i tinamit Hai. Re' hin nuq'asam chik panaq'ab' i kireey, kitinamiit, i kiye'aab' eh chu'nchel i chib'ih keh.

²Re' taq i hat naa taq a'nam kuuk' i tinamit Hai je' wo' ruuk' i kireey nik' wach taq i xa a'n ruuk' i tinamit Jericó ruuk' i kireey. Xa re' la' yu'naak neerub'an chi nee taq inkahnik cha weh i xa chib'ih jariik wilik ar, je' wo' taqe i kichikoop, eh chi riij i tinamit nee taq ti okik chaloq chi peleto, inki.

³Eh re' Josué i xumol kiwach i ru soldado reh chi xutaq'aaj taqe reje chi q'aq'inik chinaah i tinamit Hai, xusik' kiwach i lajeeb' ru ka'winaq miil chi q'aq'ineel. Eh chaq'ab' xutaq'aaj taqe reje.

⁴Je' wili i xuq'or reje keh: Chab'iraj taq chi korik ar taq netiokik cho chi riij i tinamit nee taq i naakeb'aa' awiib' ma' najt ta ruuk', eh ayejaam-oq taq awiib' reh i rub'anariik reh.

⁵Eh re' ruqox i tinamit wuch'ihil taqe i hin noq neekinokik i koq chuwach i tinamit. Eh noq nee kielik chaloq i aj Hai chub'anariik qeh i hoj, neenqamol chi elik i hoj, je' rukab' xa a'n taq i hat junriim.

⁶Eh noq neenqamol cho chi elik i hoj chupaam i kitinamiit nee qoh kajimaj chaloq neenkikapaaj chi xoj kesaj wo' chik cho ar.

⁷Jumehq'iil taq neti elik chaloq aha' akeb'aam taq awiib', eh nee taq i naachop naah i kitinamiit. Ruum re' i QaJaaw Dios naa ruq'asaniik taq panaq'ab'.

⁸Eh xa re' wach noq nee taq inachop naah chak'at taq, je' rukab' i xuq'or i QaJaaw Dios, re' reh xq'orik inki.

⁹Chi riij i re', re' Josué xuq'or keh chi xi elik reje i soldado. Eh re' keh xiooj wo' hoq ar xooj kikeb'aa' kiib' panyejaal i ye'aab' Bet-el ruuk' i tinamit Hai pareelb'aal q'iij reje reh i Hai. Eh re' Josué reh ko ar xik'saj i jinaj aq'ab' wilkeeb' wii' i ki-itz'ihy naah paat.

¹⁰Eh chi junwaar chik kowahq'eq xwuktik i Josué xupech' taqe i ru soldado mi kiyejaam kiib' chi korik. Re' taqe i winaq k'amal b'eeh taqe chi kixilak i aj Israel xiooj chi peet b'eeh chikiwach noq xiooj chi peleto chinaah i tinamit Hai.

¹¹Eh chu'nchel i ru soldado xkijil i koq kiib' ruuk' i tinamit Hai chuwach i koq i tinamit xi okik, ar xkiyejaa' i ki-itz'ihy naah paat pantz'eet reje reh i rookb'aal q'iij. Eh jinaj i k'ixkaab' xkahnik pankiyejaal ruuk' i tinamit.

¹²Eh re' Josué hoob' miil chi soldado i xukeb'aa' panyejaal i ye'aab' Bet-el ruuk' i tinamit Hai ar reje chi korkiil i rookb'aal q'iij, reh i tinamit.

¹³Re' taqe i soldado jun ch'uq i xkikeb'aa' kiib' pantz'eet reje reh i rookb'aal q'iij, eh junch'uq i xkahnik chupaam i ki-itz'ihy naah paat panrookb'aal q'iij. Eh re' Josué xujil i koq riib' ruuk' i tinamit re' re' xponik kopanyejaal i k'ixkaab'.

¹⁴Eh noq xrilow i kireey i aj Hai chi xiooj chik k'oloq i Josué panyejaal k'ixkaab', jumehq'iil xelik chaloq ruch'ihil chu'nchel i ru soldado chi kik'uhlb'ejiik taqe i ki soldado i aj Israel wach k'ixkaab' Jordán. Xa re' la' ma' reht'al taj chi wilik i ki soldado i aj Israel kikeb'aam kiib' chi riij i rutinamiit.

¹⁵Eh re' Josué ruch'ihil taqe i ru soldado xkimol ti chik chi elik chupaam i ye'aab' chiq yuuq' xkian kiib' chuwach i ki soldado i aj Hai.

¹⁶Eh chu'nchel i ki soldado i aj Hai xq'orarik keh chi naa ruchaliik kajimam taqe i ki soldado i aj Israel, ruch'ihil i Josué najt kikanaa' chaloq i kitinamiit.

¹⁷Eh ma' jino'q chik i soldado xkahnik cho Hai, ma' jino'q wo' chik i xkahnik cho Bet-el, chi kunchelaal xchalik chi kajimjiik i ki soldado i aj Israel, ruum i re' xkikanaa' chaloq i kitinamiit chi ma' xta cha'jen reh.

¹⁸Eh re' i QaJaaw Dios je' wili i xuq'or reh i Josué: Re' hat chajosaj reje aq'as laj ch'ihch' wilik pan anq'ab' chinaah i tinamit Hai ruum re' hin naa nuq'asam panaq'ab', inki. Eh re' Josué xujosaj wo' reje chinaah i tinamit i ruq'aslaj ch'ihch'.

¹⁹Eh chu'nchel i ki soldado i aj Israel kikeb'aam kiib' xi elik cho chi jumehq'iil aha' naq kikeb'aam kiib' xkikutkiib' chinaah i tinamit Hai. Eh xkichop naah i xkikoj ruq'aq'al.

²⁰Eh noq re' taqe i ki soldado i aj Hai xitz'ehtanik reje chikiij xkilow chi xamponik chik pan taxaaj i rusib'eel i kitinamiit, xama' aha' ta chik kielik kuum taqe i aj Israel, i xkimol naq chik chi elik chupaam i ye'aab' chiq yuuq', chupaam i q'iij re' re' xkikut kiib' chinaah i tinamit re' re'.

²¹Eh noq rilow i Josué, ruch'ihil chu'nchel i aj Israel chi re' taqe i ki soldado kikeb'aam naq kiib' xkichop naah i tinamit Hai, eh chi xkikoj ruq'aq'al, xi sutinik chikiij eh xoj kik'ulb'ilej taqe i aj Hai.

²²Re' taqe i xichopwik naah i tinamit xi elik cho ar xchalik kik'ulb'ilej i ki soldado i aj Hai panyejaal i ka'ch'uq chi ki soldado i aj Israel xi kahnik. Re' keh kian reh i ki soldado i aj Hai korehtaal xkuxik kikansam.

²³Xa re' wo' chik i kireey i aj Hai xkikanaa' chi k'achlik, xkichop, eh xkik'am reje chuwach i Josué.

²⁴Eh noq re' taqe i aj Israel xkuxik kikansam chu'nchel i ki soldado i aj Hai re' taqe i ajiminik cho keh chupaam i ye'aab' chiq yuuq' xi sutinik wo' chik reje chupaam i tinamit Hai. Eh xkikansaj i xi kahnik naq chi k'achalkeeb'.

²⁵Chupaam i q'iij re' re' xkikansaj i kab'laj miil chi tinamit patim taqe chupaam i tinamit re' re' chi winaq chi ixoq.

²⁶Re' Josué kore' chik xuq'asaj i ruch'ihch' k'ulq'as rehtalil i taaq'anik reh i q'aq'inik chinaah i tinamit noq xkuxik chik kikantesjiik chi jumpech i aj Hai.

²⁷Re' taqe i aj Israel xkahnik chi keh taqe i chikop, chu'nchel i chib'ih jariik i wilkeeb' chupaam i tinamit Hai, je' wo' rukab' i xuq'or i QaJaaw Dios reh i Josué.

²⁸Je' re' noq re' Josué kuxik ruk'atam i tinamit Hai, xusach wach chi jumpech, eh je' xkahnik chi jumpech.

²⁹Eh re' Josué xut'uyaa' nah q'ab' chee' i kireey i aj Hai korehtaal xokik i q'iij ar xkimik. Eh noq xokik i q'iij xutaq'aaj ruqahteesjiik i ruti'jolal, ar xkikut panookb'al reh i tinamit, eh xkitub'aa' ab'aj chinaah. Eh re' ab'aj re' re' ar xkahnik chi jumpech.

³⁰Eh re' Josué xuyejaa' jinaj i artaal chinaah i yuuq' Ebal, re' ye'b'al ruloq'il i kaJaaw i ki Dios i aj Israel.

³¹Je' rukab' i xuq'or i Moisés raj kamanoom i Dios keh i aj Israel, je' rukab' i tz'ihb'amaj pan santo laj huuj, re' k'uhb'aal xye'arik reh i Moisés. Eh re' artaal re' re' xkiyejaa' ruuk' taqe i ab'aj ma' sehkamaj ta wach. Re' taqe i aj Israel xkik'at i mayiij chinaah i artaal chuwach i QaJaaw Dios, eh xkiyeew wo' chinaah i mayiij k'amb'al iib' panotob'il ruuk' i Dios.

³²Eh re' Josué chikiwach chu'nchel i aj Israel xutz'ihb'aaj chuwach taqe ab'aj i k'uhb'aal ye'ooj reh i Moisés.

³³Eh chu'nchel i aj Israel, taqe i tokoom tinamit, taqe k'amal b'eeh, taqe i nimaq kiwach, taqe i q'atal q'orik, xkiyeew i koq kiib' pantaq rucheel i loq'laj kaxa molik wii' i ruk'uhb'aal i QaJaaw chikiwach taqe i k'amal kib'eeh aj tiij taqe i aj Levíta re' kik'amwik reh i loq'laj kaxa. Re' taqe i tinamit re' re' yejaal i xkiyeew reje kiib' parucheel i yuuq' Gerizim, eh yejaal i xkiyeew reje kiib' parucheel i yuuq' Ebal. Eh xkian wo' hoq ixq'orarik keh pampeet ruum i Moisés raj kamanoom i QaJaaw Dios, reh chi xkik'ul i rotob'il i Dios.

³⁴Eh chi riij i re', re' Josué xrilow wach chi ju'junaal chib'ih i ruq'or taqe i k'uhb'aal tz'ihb'amaj, chihreet noq ink'ularik i rotob'il i Dios, eh chihreet noq ink'ularik i ti' k'axik.

³⁵Re' Josué xrilow wach taqe i k'uhb'aal xye'arik ree Moisés ma' xtaj i xukanaa' chi ma' ta xrilow wach chikiwach i aj Israel, chi winaq, chi ixoq, chi kok' ha'lak'uun, eh chi tokoom tinamit wilkeeb' ar.