Read Poqomchi 2 Tes 2 Bible Online

2 Tes 2 - Poqomchi bible

2 Tes 2

¹Hermano, re' hin i nuq'or rukorkiil taq aweh chiriij i ruk'uliik ruka'peech i QaJaaw Jesucristo, eh chiriij i rumolariik qawach naa rub'anam ruuk'.

²Re' taq i hat majal taq wach akapeb'aal chi jumehq'iil, xa ruuk' jino'q k'uhb'aal, ruuk' jino'q q'orik, ruuk' jino'q huuj je' tii chik pan qab'ihnaal i hoj wilik noq neenkiq'or taq aweh, oon neenkiq'or chi xureq chik ruq'ijil i ruk'uliik cho ruka'peech i QaJaaw Jesucristo.

³Maa awach taq injot'wik aweh, ruum noq komajaa' ink'ulik i ruka'peech kopeet naarixowjiik wach i Dios kuum i tinamit, re' noq naaruk'uliik i loq i winaq i yiib' wach i runa'ojb'al, re' i naaruye'ariik pantojb'al mahk.

⁴Eh re' i aj ixowaal re' re' inixowanik kiwach i kiq'orik rib'iral i ruk'uhb'aal i Dios i ruk'ul chi looq'jiik, imponik rutzunaa' riib' chupaam i rupaat i Dios, je' tii chik i Dios i rub'an riib' ar.

⁵Ink'ulik aj wo' naa taq panak'ux chi re' k'ahchi' nuq'orom taq reje aweh wili, nuq'orom wo' taq chaaweh noq xinwihik taq cho chaxilak ar.

⁶Eh yu'naak taq i hat aweht'al taq chik chihreet noq ko chamlik chaloq i aj mahk re' re', reh chi ma' nee ta nk'u'loq chi komajaa' rureq i ruq'ijil.

⁷Re' rukamaj ruyejaam wach chi q'eeqmaal i ruwinqilal i yeb'ee wach na'ojb'al re' re' xutoq'aa' chik kamanik. Xa re' la', komajaa' ta niik' naah i rub'an, ruum k'ahchi' ruy-eem chi naa rehtesjiik i loq chuwach inq'ilwik reh yu'naak.

⁸Kora'j naaruk'uliik i loq re' i ma' tob'laj winaq, i nixowanik wach i Dios. Eh re' QaJaaw Jesucristo, ruuk' i junhuup chi ruxlaab' naarukaansam, ruuk' i rusaqumaal chii' wach i na' k'oloq, naa rusacham wach i rajaawriik.

⁹Re' na' k'oloq i ma' tob'laj winaq re' re', re' i aj Yahm naa rutoob'iniik reh. Eh ruuk' i rajaawriik naaruk'uhtaam i xa reh reh wach chi ma' ilooj taj, eh naa ruk'uhtaam i sachb'al k'uxliis re' ruuk' i ma' korik taj.

¹⁰Eh chu'nchel i yiib' wach na'ojb'al naa rukojom chi jot'b'al keh i ojik inki a'n pantojb'al mahk. Ruum re' keh ma' xkik'ul taj, eh ma' xkik'ax taj i korik, re' naq i naa ruko'liniik keh.

¹¹Ruum aj re', re' Dios i ruyeew q'ab' chi kijot'ariik ruum i yiib' wach na'ojb'al. Eh re' re' minwik keh chunimjiik i xachukuj q'orik,

¹²reh chi naa kiye'ariik pantojb'al mahk chu'nchel i ma' nkaaj ta runimjiik i korik, re' la' chik i yiib' wach na'ojb'al inkik'ax wach rub'aan.

¹³Eh re' hoj i ruk'ul chi eliik naa qat'iosem ree Dios taq chawiij hermano, i hat taq ruk'axam i QaJaaw, xusik' taq chaawach i Dios pampeet. Reh chi naa taq areqem ko'lemb'al reh taq awánima parub'ihnaal i Santolaj Uxlab'al, re' inye'wik taq chaaweh i santohiil, eh ruum chi xanimaj taq i korik.

¹⁴Re' wili i xraaj taq awuuk' i Dios noq xusik' taq chaawach ruuk' i ak' k'uhb'aal xponik qaq'or taq aweh: Reh chi naa taq awehtriik haa' i ruloq'il i QaJaaw Jesucristo.

¹⁵Hermano, korik-oq taq wach ak'ux chi nimanik. Eh mansahchik taq panak'ux aak'uhb'aaljiik xponik qa a'n ruuk' qachii', je' wo' taq aak'uhb'aaljiik xqataq'aaj taq reje aweh panhuuj.

¹⁶Chi re' QaJaaw Jesucristo ruch'ihil i Ajaab'ees Dios, re' i QaJaaw, ixk'axwik cho qeh ruuk' i rotob'il, xuyeew rusuqkiil qak'ux reh i juneliik, eh xuyeew qeh jinaj i ch'iklik reje wii' qak'ux.

¹⁷Re' ta naq i keh neekiye'wik rusuqkiil taq awánima, neekiye'wik rukowiil taq ak'ux, reh chi holohik taq chu'nchel i naa aq'orom, taq i na a'nam.