Read Poqomchi 2 Tes 3 Bible Online

2 Tes 3 - Poqomchi bible

2 Tes 3

¹Chiriij taqe wili hermano, cha a'n tii taq chaatiij chiqiij, reh chi neenooj rib'iral chi jumehq'iil i ruk'uhb'aal i QaJaaw Jesucristo, reh chi neen kiyeew ruloq'il noq neen kik'ul pan kánima, je' rukab' noq xak'ul taq i hat.

²Eh reh chi nee qoh ruko'leej i Dios chikiwach i ma' xta otob'il pan kánima, yiib' wach i kina'ojb'al, ruum re' k'uhb'aal ma' chu'nchel ta kinimanik reh.

³Eh re' QaJaaw Jesucristo reh, korik wach ruk'ux, nee taq i ruyeew rukowiil ak'ux, nee taq tiruko'leej chuwach i yiib' wach na'ojb'al.

⁴Eh re' hoj ch'iklik qak'ux taq chawiij parub'ihnaal i QaJaaw chi k'ahchi' taq kaat, ma' nee ta chik taq inakanaa' rub'aan i xat ponik taq qak'uhb'alej wii'.

⁵Re' ta naq i QaJaaw Jesucristo toob'inoq taq chaaweh chureqariik i ruk'axb'al i Dios. Je' wo' i q'unil i ruyeew i Jesucristo.

⁶Hermano, re' hoj ti qak'uhb'alej taq reje parub'ihnaal i QaJaaw Jesucristo chi maa a'n taq jinaj wach ak'ux ruuk' hermano ma' raaj ta kamanik, eh mo'-oq k'ahchi' ruk'amam naah i k'uhb'aal poninaq qaq'orom taq aweh.

⁷Re' taq i hat aweht'al taq chik nik' wach i k'acharik taq naa a'nam, reh chinee taq i nak'am naah i xponik qak'uhtaaj taq aweh. Re' hoj xqayeew cho qak'ux chi kamanik noq xojwihik taq cho chaxilak.

⁸Eh ma' awach ta xketwik qeh chi ma' ta xqatoj riij reh. Xqayeew la' cho qak'ux chi kamanik chi q'iij chi aq'ab', re' xqaaj i hoj chi ma' awach ta taq aweh i xusach rutumiin chiqiij ree qak'uxuljiik.

⁹Eh rub'ehel naq chi xqapahqaaj ta taq aweh i toob'al qeh xa re' la' re' hoj ma' je' ta re' i xqa a'n. Xqayeew la' qak'ux chi kamanik, re' xqaaj i hoj chi je' wo' chik re' taq i neena a'n i hat.

¹⁰Noq xojwihik taq cho chaxilak, xqaq'or taq cho rukorkiil aweh chi je' wili: Awach i ma' raaj ta kamanik, i ruk'ul chi ma' nee ta inye'arik ruwa' ruhaa', qoh kiih.

¹¹Eh xanaah re' xk'ulik rib'iral chi qawach i hoj chi wilik b'ila' taq chaxilak i xa k'acharik inki a'n chi ma' nkaaj ta kamanik xa chib'ih b'ila' jariik inkisub' wii' q'iij. Eh inkelq'aaj b'ila' i tokoom aj eh

¹²Re' taqe re', inqataq'aaj reje ruq'orariik keh, inqakoj reje kina'ojb'al ruuk' i rajaawriik i QaJaaw Jesucristo, chi kikamanoq parub'ehel, reh chi neenkireq tz'aaq k'uxumb'al kiib'.

¹³Hermano, manq'uhtik taq ak'ux i hat chub'anariik i ma' xta reet chi b'anarik.

¹⁴Wila' awach i ma' raaj ta runimam inqaq'or taq reje aweh chupaam i huuj wili, chakoj taq rehtaal awach, eh maawuhch'ihleej taq, reh chi neenchalik ruk'ixiik ruuk' taqe i rub'an.

¹⁵Xa re' la', maawixowaaj taq wach je' oq la' inkojarik runa'ojb'al aahermano taq cha a'n reh.

¹⁶Eh re' ta naq i QaJaaw Jesucristo, ye'el suq kiil k'uxliis, ye' woq taq rusuqkiil ak'ux chi eliik. Re' ta naq i reh wih-oq taq awuuk' chawunchelaal.

¹⁷Re' hin i Pablo, inutz'ihb'aaj reje ruuk' nuq'ab' panhuuj i rusuqkiil taq ak'ux wili. Re' hin, hin okrinaq chi ko nukoj reje i nub'ihnaal chupaam i ju'jun chi huuj i nutz'ihb'aaj reje.

¹⁸Hermano, re' ta wo' naq i rotob'il i QaJaaw Jesucristo chuyeew taq cha weh chawunchelaal. Je' ta wo' naq re'.