Read Poqomchi 2 Tim 2 Bible Online

2 Tim 2 - Poqomchi bible

2 Tim 2

¹Re' hat Timoteo, i hat wak'uun noq wilkaat, chakowej ak'ux ruuk' i rotob'il i Jesucristo ruye'em aweh.

²Eh re' i xab'iraj, re' i xnuq'or chikiwach i ruk'ihaal, re' wo' chik i re' cha k'uhtaaj keh taqe i korik wach kik'ux, re' taqe i nee wo' inki a'n ruk'uhtjiik xa awach aj eh.

³Je' re' noq, hat-oq haa' chukuyariik ransil i ti' k'axik. Hat-oq manlik ru soldado i Jesucristo.

⁴Chakoj rehtaal chi ma' jino'q i manlik soldado wilik chi cha'jinik neerub'an i tokoom kamanik. Re' wilik chi soldado hiil xa re' wo' naa rub'anam imponik chuwach intaaq'anik reh.

⁵Je' wo' re' inokik haa' chi pajaj ajiim wila' ma' xuchop ruk'ux chi rub'anariik i tijimaj wii', ma' jaruuj naaruye'ariik reh i ru korona.

⁶Eh chawil i aj ab'ixoom kopeet naarukamaneem wach kora'j naarunik'eem re' i wach i rutik.

⁷Chakapaaj riij taqe i nuq'or reje aweh, eh re' QaJaaw neentoob'inik aweh reh chi chu'nchel neenareq chiriij.

⁸Mansahchik panak'ux i xk'ulik rub'an i Jesucristo, re' xwukteesjik chaloq chi k'achlik wach, eh re' ruuk' chaloq i riih rumaam i reey David. Re' wili i ak' k'uhb'aal k'ahchi' nuq'orom rib'iral i hin.

⁹Ruum i ruq'orariik rib'iral i k'uhb'aal wili, k'ahchi' nukuyum ransil i ti' k'axik. Xa je' chik hin runimaal aj mahk inki a'n weh, hin kib'ak'am chi karena. Xa re' la' re' i ruk'uhb'aal i Dios reh, ma' b'ak'lik ta wach chi karena.

¹⁰Ruum i re', k'ahchi' nukuyum ransil chu'nchel i ti' k'axik, reh i kitoob'jiik i sik'ooj cho kiwach ruum i Dios, reh chi neenkireq i loq'laj ko'lemb'al iib' reh i juneliik, re' i ruyeew qeh i Jesucristo.

¹¹Re' q'orik wili xti korik: Wila' xoj-ehtrik haa' i rukimiik i Jesucristo, naa wo' chik ruwihiik qak'achariik ruuk' i reh chi juneliik.

¹²Eh wila' xqakuy i ti' k'axik, naaqehtriik haa' i runimaal rajaawriik. Eh wila' xqaq'or chi ma' qeht'al ta wach, naa wo' ruq'orom i reh chi ma' reht'al ta qawach i hoj.

¹³Atoob' ta ma' korik wach qak'ux i hoj, re' reh xa korik wo' wach ruk'ux, ruum ma' nee ta rujal wach i ruq'orom chaloq.

¹⁴Chuwach i Dios i nuq'or aweh chi chawik'saj ruq'orariik pan kixikin, eh chak'uhb'alej taqe chi mankiwech'uj chik kiib' chiriij i k'utaaj xama' xta rub'ehel. Ruum re' taqe re', xa yojb'al kik'ux taqe ki-ib'irinik reh.

¹⁵Eh xti cha chop ak'ux chi korik chi neenak'uhtaaj chuwach i Dios chi hat atoob'laj raj kamanoom, eh mo'-oq chih k'isinoq neetik'ixik wii'. Chach'ob' la' rub'ehel chi manlik i korik laj k'uhb'aal.

¹⁶Re' hat, maamin awiib' ruuk' i yeb'ee wach k'utaaj iraaj ma' raaj q'orarik, ruum re' kiq'orik reh taqe re', xa reh reh kiq'eb'em kiib' panti' k'axik.

¹⁷Eh re' yiib' wach na'ojb'al inkik'uhtaaj inooj chunimaal, je' rukab' i rub'an i rax q'aah i ruk'ux reje riib'. Re' i na'ojb'al re' re' k'ahchi' ruk'uhtaam i winaq, Himeneo, ruch'ihil i Fileto.

¹⁸Re' keh xkikanaa' i korik laj nimanik, eh k'ahchi' kiq'orom chi re' taqe kamnaq wuktinaq chik taqe chaloq. Ruum i inkiq'or re' re', wilik taqe k'ahchi' kiyojom ruk'ux chi nimanik.

¹⁹Raaj i Dios reh jinaj i kowlaj ch'ikaab' reh rukojom, re' i wilik chi juneliik, re' i tz'ihb'amaj wii' rehtalil chi je' wili: Re' QaJaaw reht'al kiwach taqe i rak'uun rixq'uun, eh chu'nchel i kiq'orik rib'iral i QaJaaw, inchol kikanaam i yiib' wach na'ojb'al, inki.

²⁰Chupaam jino'q i nimlaj paat ma' xata re' oro oon plata kiyej-aal i kulk wilkeeb' ar. Wilik la' wo' taqe i chee' eh ak'al kiyej-aal. Eh wilik i looq' kikamanik wii'. Eh wilik i xama' looq' ta kikamanik wii'.

²¹Awach iraaj chi looq' naa rukamaniik wii', chuwach i QaJaaw ruq'asam riib' reh chi manlik. Inchol chi xa eliik-oq saq wach i ránima, eh marutz'a'j chik ruuk' i yiib' wach na'ojb'al. Chi je' re', xa re' chik i holohik chi b'anarik neerub'an.

²²Je' re' noq re' hat, maa a'n aweh i mahk inki a'n taqe k'ijolaq. Re' la' korik cha a'n panak'achariik tinimanoq tik'axwoq xa suq-oq ak'ux kuuk' taqe i saq wach i kánima chuq'orariik rib'iral i QaJaaw.

²³Maatijej aweh i xa memil laj wech'inik iib' ma' xta rub'ehel. Re' hat aweht'al chik chi re' taqe re' xa yojoj k'uxliis i ruk'am chaloq.

²⁴Re' jino'q i raj kamanoom i QaJaaw ma' ruk'ul ta chi sik'il peleto, xa chu'nchel-oq la' aj uuk' chaq'laam. Eh choloq k'uhb'alinik, xa kuyuul-oq,

²⁵eh xa ch'ub'ik-oq wach ruk'ux chi kik'uhb'aljiik i ja'lik kichii' kiwach. Chi je' re', nee oon naq injalarik wach i kina'ojb'al ruum i Dios, reh chi neenkinimaj i reh. Eh nee oon naq inkireq chiriij i korik,

²⁶reh chinee na'lojik cho keh, eh neenkiq'uch cho kiib' paruxirob' i aj Yahm, re' taqe i ruminim wii', reh chi neerub'an kuuk' iraaj i reh.