Read Poqomchi Tito 1 Bible Online

Tito 1 - Poqomchi bible

Tito 1

¹Re' hin i Pablo raj kamanoom i Dios, hin raj tahqaneel i Jesucristo, inutz'ihb'aaj reje aweh i huuj wili i hat Tito. Re' xraaj i reh chi naa nuye'em rukowiil kik'ux i sik'ooj cho kiwach ruum i Dios, reh chi neenkireq chi riij i korik, i ruk'am chaloq i qanimaniik.

²Re' i ch'iklik reje wii' qak'ux chureqariik i juneliik k'acharik, re' ruq'orom cho rib'iral i Dios noq komajaa' i rutz'uhkrisaj chee wach ak'al. Re' Dios ma' inchukwik ta q'orik re' i ruq'orom chaloq narojiik eloq wach.

³Raaj noq xponik ruq'ijil chuwach i Dios, xuyeew cho qeh chi naab'jik i ruk'uhb'aal. Eh re' ruq'orariik rib'iral i ruk'uhb'aal re' re', re' hin xirupab'aa' chub'anariik i Dios, i aj Ko'len qeh.

⁴Hermano Tito, re' hat, hat wak'uun noq wilkaat, ruuk' i nimanik. Re' ta naq i Ajaab'ees Dios, i Jesucristo qaj Ko'loom neen kiyeew chaaweh i kotob'il, je' wo' hoq i suq kiil k'uxliis.

⁵Re' hin, Tito, xat nukanaa' pee chaloq chupaam i ye'aab' Creta, reh chi naa ayejaam i komajaa' inkorjik, eh chi naa apab'aam taqe i kamanoom chi kixilak i aj nimaneel chupaam i ju'jun chi tinamit, je' rukab' i nuq'orom chaaweh:

⁶Re' to'ool chi kixilak i aj nimaneel, re' i k'acharik i rub'an parukorkiil, reh chi ma' xtaj neenq'ilarik wii'. Eh xa jinaj-oq i rehk'een chuwach, aj nimaneel-oq wo' taqe i rak'uun rixq'uun. Reh chi ma' nee ta nq'orarik chi ma' tiklik tamb'anik.

⁷Re' i k'amal kib'eeh i aj nimaneel, raj kamanoom i Dios. Ruum aj re', koruman chi korik-oq wach i ruk'achariik. Mo'-oq xa ja'lik chii' wach, mo'-oq xa nk'atzk'otik, mo'-oq xohk'reel laj winaq, mo'-oq sik'il peleto, eh mo'-oq k'axal wach tumiin chi nee rureq chi xama' xta rub'ehel.

⁸Eh chuyeew rupatal taqe rulaa', marukanaa' rub'anariik i otob'il, wilik-oq runa'ojb'al, korik-oq wach ruk'ux, wilik-oq rusantohiil, eh loch'ooj-oq naah chi korik.

⁹Eh ruye'em-oq ruk'ux chunimjiik i korik laj k'uhb'aal, re' i xtijik wii' i reh. Chi je' re' neerub'an ruye'ariik rukowiil kik'ux i tokoom, eh nee wo' ruch'ub'isaj kik'ux taqe i ki-ixowanik reh i k'uhb'aal re' re'.

¹⁰Ruum ma' k'isiin taqe i ma' nkaaj ta nimanik. Eh re' i kib'anik ree re', re' taqe i kow inkiq'or chi koruman chi naa rupoch'ariik naah k'achab'. Eh xama' xta rub'ehel taqe inkiq'or, xa re' jot'ooj inki a'n

¹¹Re' taqe re', q'ilarik inkaaj, ruum re' keh xa kiooj chi yojoj k'uxliis chi' taq paat. Xa reh reh inkik'uhtaaj re' i ma' ruk'ul ta chi k'uhtjik xa re' inkaaj inkireq kitumiin chi xama' xta rub'ehel.

¹²Eh jinaj wo' i winaq xwihik cho chi k'amal kib'eeh i aj Creta je' wili xuq'or chikiij i rutinamiit: Re' taqe aj Creta chukul q'orik taqe, je' taqe josq'laj chikop. Q'e' taqe kiwi'k, q'e' taqe sikiil, inki.

¹³Korik i xuq'or i winaq re' re', ruum aj re', re' i hat Tito, chaq'il taqe chi kow i kiq'asam chik kiib', reh chi neenkowjik kik'ux chi nimanik.

¹⁴Eh reh wo' chi ma' nee ta nkinimaj i k'utaaj xa nkiyejaa' wach pankik'ux taqe aj judío, eh ni xata neenkinimaj i xa kik'uhb'aal taqe inkiyeew i kiij reh i korik.

¹⁵Re' taqe saq wach i kikapeb'aal, chu'nchel i ruyejaam i Dios xa saq wo' wach chi keh. Eh re' taqe i ma' kinimanik ta reh i Dios i ch'uwa' wach kikapeb'aal, xa chu'nchel ch'uwa' wach chi keh, ruum xa ch'uwa' wo' wach i kina'ojb'al.

¹⁶Eh inkiq'or chi nkinimaj i Dios. Xanaah re', ruuk' i kiyiib' wach na'ojb'al ink'utinik chi ma' korik ta keh inki a'n Re' keh aj ixowaal taqe, ruum xa ja'lik kichii' kiwach, ma' xtaj i holohik inki a'n.