Read Poqomchi Stg 1 Bible Online

Stg 1 - Poqomchi bible

Stg 1

¹Re' hin i Santiago, raj kamanoom i Dios, raj kamanoom i QaJaaw Jesucristo. Inutaq'aaj taq rusuqkiil ak'ux i hat taq elenaq cho chupaam i kab'laj ch'uq chi tinamit Israel, i apuhkaam taq awiib' xa aha' yuuq'.

²Hat taq nuhermano, noq neenchalik taq cha naah i xa reh reh wach chi pajarik, suuqb'oq taq ak'ux.

³Re' taq i hat aweht'al taq chik chi re' i pajarik taq inak'ul, re' re' inye'wik taq rukowiil ak'ux chukuyariik i ti' k'axik.

⁴Ruum aj re', re' rukowiil taq ak'ux re' re' maakanaa' taq chik, reh chi neerumanaa' wach taq aweh i korik, reh wo' chi neenkowjik taq ak'ux, eh ma' xta taq neetiq'ehb'ik wii'.

⁵Wila' awach taq aweh i ko wilik iraaj i runa'ojb'al, chupahqaaj ree Dios, ruum re' Dios ma' pajooj taj noq i ruyeew chu'nchel aj eh, ruum ma' awach taj i tokoom rilariik i rub'an.

⁶Xa re' la' chu'nchel ruk'ux chupahqaaj runa'ojb'al ree Dios, ch'iklik-oq ruk'ux chi naaruye'ariik reh, ruum awach i xakiib' ruk'ux xak'ul inooj i rukapeew xa je' rukab' i rub'an i rub'ohl i palaw k'ul inooj ruum teew.

⁷Awach i xak'ul inooj i rukapeew marukapaaj chi wilik i neenye'arik reh ruum i QaJaaw Dios,

⁸ruum yu'naak tokoom i rukapaaj, eh eqal tokoom wo' chik ineerukapaaj. Chi je' re', ma' tuqlik ta wach i rukapeb'aal.

⁹Eh re' i hermano xama' nim ta tii wach i rub'an riib', chuch'ikaa' ruk'ux ruuk' i runimaal wach inye'arik reh ruum i Dios.

¹⁰Eh re' i b'ehoom, chuch'ikaa' ruk'ux na' qahteesjoq i runimaal wach ruum i Dios, ruum re' i b'ehomal xa je' rukab' i rixmak'al i ch'ahn xa re' yu' insahchik wach.

¹¹Noq i nelik chaloq i q'iij, inchalik i rutz'a'iil. Ruuk' i re', inchiqik i ch'ahn, inpuhlujik i rixmak'al, eh re' ruholwochiil insahchik wach. Je' wo' re' na' sahchoq wach i b'ehoom noq ko k'ahchi'-oq chusik'ariik ruman i rub'ehomal.

¹²Atoob' reh awach i rukuy ransil ruuk' q'unil i pajarik, ruum noq ik'inaq chik chupaam i pajarik, naaruk'ulum i rukoróna, re' i juneliik k'acharik, i ruq'orom cho rib'iral i Dios chi naa ruye'em keh i kik'axwik reh.

¹³Awach inchalik i pajarik chinaah maa ruq'or chi re' Dios impajwik reh, ruum re' Dios ma' nee ta npajarik ruum i yiib' wach na'ojb'al, eh ma' awach ta wo' hoq neerupaj i reh.

¹⁴Re' la' rotoowjiik, eh re' ruk'axariik wach rub'aan i yiib' wach na'ojb'al i minwik reh pam pajarik i ju'jun.

¹⁵Eh ruuk' i rotoowjiik i yiib' wach na'ojb'al, inaasjik chaloq i mahk. Eh noq ruk'amam chik raa' i mahk, kimik chik i ruk'am chaloq.

¹⁶Hat taq nuloq'laj hermano, majot' taq awiib' cha wib'il awiib':

¹⁷Re' taqe i ma' xta reet, i manlik wach i qakooch inqak'ul, pan taxaaj inchalik, re' i Dios inye'wik qeh. Re' wo' reh xyej-anik reh chu'nchel i saqum wilik cho pan taxaaj. Re' Dios ma' rujal ta wach i rukapeew, eh ma' xta ruq'equmaal wach.

¹⁸Re' reh xchalik paruk'ux chi xuyeew qak'achariik ruum xqanimaj i korik laj k'uhb'aal, reh chi xojrukoj chi peet chuwach taqe i rutz'uhkrisam chaloq.

¹⁹Hat taq nuloq'laj hermano, chaweht'aliij taq i wili: Xti chayeew taq ak'ux chi ib'irinik mo'-oq teheeh taq awach chi q'orik, je' wo' chi kaqrik,

²⁰ruum awach inkaqrik ma' k'ahchi' ta rub'anam imponik chuwach i Dios.

²¹Je' re' noq, chaq'eb' taq chiriij ak'ux chu'nchel i ch'uwa' wach chi b'anarik, je' wo' hoq i yiib' wach na'ojb'al, imb'aan wach ak'al. Eh chak'ulaa' taq ruuk' chaq'lamiil i ruq'or i k'uhb'aal ye'ooj taq panawánima, re' inko'linik taq aweh.

²²Xa re' la', cha a'n wo' taq i ruq'or i ruk'uhb'aal i Dios. Mo'-oq xa hat taq aj ib'iroom, ruum wi xa xik'ik taq rij axikin, xak'ahchi' taq ajot'om awiib' cha wib'il awiib'.

²³Awach i xa rib'iraj i k'uhb'aal eh ma' rub'an taj i ruq'or, re' re' xa je' rukab' jino'q i rilow i wach pan lemow.

²⁴Re' reh xa kore' wo' naq i rilow riib' pan lemow, eh noq inooj, jumehq'iil insahchik paruk'ux nik' wach inka'yik.

²⁵Raaj awach i ma' nsahchik ta paruk'ux i rib'iraj, i rukoj la' rehtaal chi manlik i korik laj k'uhb'aal, re' ineesanik cho qeh pamahk, eh i rub'an i ruq'or i k'uhb'aal, re' reh insuuqb'ik ruk'ux ruuk' taqe i rub'an.

²⁶Awach i rukoj riib' chi aj nimaneel, eh mo'-oq i ruq'il riib' ruuk' ju' raaq', re' reh xak'ahchi' rujot'om riib', eh re' nimanik i rub'an xama' xta k'isinoq inokik wii'.

²⁷Re' i xti korik laj nimanik i ma' xta ruch'uwa'iil wach chuwach i Ajaab'ees Dios re' wili: Kitoob'jiik i wilkeeb' panti' k'axik, chi je' ma' xta kituut kajaaw, chi je' ixoq kamnaq kib'ahiil, eh re' chi ma' nee ta inch'uwa'resjik iib' ruuk' i yiib' wach na'ojb'al imb'aan wach ak'al.