Read Poqomchi Stg 2 Bible Online

Stg 2 - Poqomchi bible

Stg 2

¹Hat taq nuhermano, i tinimanik taq reh i loq'laj QaJaaw Jesucristo, ma' ruk'ul ta chi jinaj i suq rilariik taq neena a'n, eh re' jinaj tokoom rilariik taq neena a'n.

²Eh noq amolom taq awiib', eh nee kiokik i koq kiib'-oq i winaq taq chaxilak. Re' jinaj b'ehoom wilik taqe rulopq'aaq' oro ju' taq q'ab', eh xa holohik chik i ruso'. Eh re' jinaj xa neb'aa'-oq tii xa q'aah-oq ruso'.

³Eh wila' xa re' b'ehoom xak'ul taq cho chi korik nee taq inaq'or reh chi je' wili: Jaaw, ti tzuun ayu' pan holohik tzunaab', tiko'q taq reh, eh re' neb'aa' nee taq inaq'or reh chi je' wili: Re' hat, tipaa' reje wulu', oon ti tzuun ayu' wach ak'al, tiko'q taq reh,

⁴chi je' re', wilik i tokoom rilariik taq i na a'n chaxilak. Iraaj ruq'orom chi k'ahchi' taq aq'atam q'orik cha naah ruuk' taq aama' holohik ta laj na'ojb'al.

⁵Hat taq nuloq'laj hermano, chab'iraj taq i naa nuq'orom aweh: Re' Dios xsik'wik cho kiwach taqe neb'aa' ayu' wach ak'al, reh chi naakib'ehomriik ruuk' i kinimaniik reh i ruk'ulariik chi kikooch i runimaal rajaawriik i Dios i ruq'orom cho rib'iral chi naa ruye'em keh i kik'axwik reh.

⁶Raaj taq i hat inak'uhtaaj taq kik'ixb'ilaal taqe neb'aa' Eh ¿awach kiq'uchwik taq i chib'ih aweh? Eh ¿awach kiqerinik taq reje aweh chikiwach i q'atal q'orik? ¿Mi ma' re' taqe re' i b'ehoom?

⁷¿Mi ma' re' wo' re' keh i kib'ajwik reh i loq'laj rub'ihnaal i Jesucristo, re' i b'ihnaal xq'orarik taq cha naah?

⁸Re' taq i hat wila' xti korik chi k'ahchi' taq animam i ruq'or i k'uhb'aal nim rajaawriik tz'ihb'amaj cho pan santo laj huuj chi je' wili: Chak'ax aawas achaaq' je' rukab' noq inak'ax awiib' i hat, inki.

⁹Raaj wila' xa jinaj i suq rilariik taq i na a'n, eh re' jinaj tokoom rilariik taq i na a'n, k'ahchi' taq akojom amahk, eh ti mahkunik wo' taq chuwach i ruk'uhb'aal i Dios.

¹⁰Eh wila' wilik i ruq'or chi runimaj chu'nchel i k'uhb'aal, eh wilik-oq jino'q reh i k'uhb'aal ma' runimaj taj, k'ahchi' rumahkuniik chuwach chu'nchel i k'uhb'aal.

¹¹Re' Dios xq'orik reh chi je' wili: Maach'uwa'risaj wach aakaxáro, inki. Eh xuq'or wo' chi je' wili: Maacansaj aawas achaaq', inki. Atoob' ta ma' rub'an i k'oyomal jino'q, eh i rukansaj-oq i ras ruchaaq', re' re' xama' k'ahchi' ta wo' runimam chu'nchel i k'uhb'aal.

¹²Re' taq i hat parub'ehel taq tiq'oroq, eh re' taq i holohik cha a'n je'-oq taq akab' i naaruq'atariik i q'orik chikinaah ruum i ak' k'uhb'aal, ineesanik cho qeh pamahk,

¹³ruum re' taqe i ma' inkiketelaaj ta wach i tokoom, ma' naa ta wo' ruketeljiik kiwach i keh na' q'ataroq i q'orik chikinaah. Eh re' taqe i wilik ketelinik wachiis kuuk', naakeliik korik na' b'anroq i q'ataj q'orik.

¹⁴Hat taq nuhermano, ¿chib'ih neerutiq reh jino'q chi neeruq'or chi ruyeew ruk'ux chunimjiik i Dios, eh mo'-oq awach i rub'an otob'il reh? ¿Mi nee inko'ljik re' chi xa re' i nimanik i rub'an?

¹⁵Qaq'or chi wilik jino'q i qahermano winaq oon qahermana ixoq ma' xta-oq tii ruso', eh ma' xta-oq wo' ruwa' ruhaa' neerik'saj wii' q'iij.

¹⁶Eh wilik-oq taq jino'q aweh i hat nee ruq'or reh chi je' wili: Chawil awiib' chakoj aso' cha a'n awa' ahaa' chi korik inko'q reh, ¿raaj mo'q i ruyeew reh i ajwaal wach chi reh, chib'ih neerutiq reh i nee ruq'or chi je' re'?

¹⁷Je' wo' re' i runimjiik i Dios wila' xa rutkeel i nimanik imb'aan chi ma' ruch'ihil taj otob'il inkahnik chi kamnaq.

¹⁸Awach oon nee nq'orik reh chi je' wili: Re' hat xa re' nimanik i na a'n, eh re' hin xa re' otob'il i nub'an, inko'q. Chak'uhtaaj aj weh re' i hat xa rutkeel i nimanik i na a'n, eh re' hin neenuk'uhtaaj aweh nik' wach i nimanik i nub'an ruch'ihil i rub'anariik i otob'il.

¹⁹Re' hat inanimaj chi xa jinaj i Dios ma' xta reet i na a'n. Je' wo' taqe raj kamanoom i aj Yahm inkinimaj wo' keh chi xa jinaj i Dios, xa re' la' kib'arb'otik ruum kiyo'jiik.

²⁰Re' hat i ma' xta na'ojb'al, chanab'eej chi re' i nimanik imb'aan chi rutkeel chi ma' re' ta haa' otob'il, xama' xta kamaj inkahnik wii'.

²¹Chakoj rehtaal chi re' Dios xuq'or chi korik wach ruk'ux i Abraham, ruuk' i xub'an noq xuq'asaj naq chi mayiij wach artaal i rak'uun, Isaac rub'ihnaal.

²²Chawil i xuk'ul i Abraham: Ruuk' i xub'an re' re', xk'utinik chi ruchopom ruk'ux chi nimanik. Eh ruuk' taqe xub'an re' re', xmanlojik wach i runimaniik.

²³Je' re' noq xooj eloq wach i tz'ihb'amaj cho pan santo laj huuj, i chi je' wili: Re' Abraham xunimaj i Dios, eh ruuk' i xub'an re' re', xq'orarik chi korik wach ruk'ux ruum i Dios, eh xkojarik chi ramigo i Dios, inki.

²⁴Re' taq i hat xakoj taq chik rehtaal chi re' Dios i ruq'or chi korik wach ruk'ux awach imb'anik reh otob'il ma' xata ruuk' i nimanik i rureq rukorkiil wach ruk'ux.

²⁵Je' wo' re' xub'an i Rahab, re' i k'oyoom laj ixoq: Re' reh xuyeew kipatal taqe i aj Israel xi ponik chi taqarik, eh xutoob'eej taqe chi xi elik reje pantokoom b'eeh. Eh ruuk' i otob'il xub'an re' re', xq'orarik chi korik wach ruk'ux ruum i Dios.

²⁶Re' ti'jolal noq ma' xtaj i uxlab'al ruuk', kamnaq inkahnik wii'. Je' wo' re' i nimanik imb'aan xa chi rutkeel wila' ma' ruch'ihil otob'il, inkahnik chi kamnaq.