Read Poqomchi Stg 3 Bible Online

Stg 3 - Poqomchi bible

Stg 3

¹Hat taq nuhermano, ma' ruk'ul ta chi wilik k'ih-oq i aj Tijineel neenkian kiib' taq chaxilak, ruum aweht'al taq chik chi re' hoj i qohb'anik tijinik, kow naaruq'atariik i q'orik chi qanaah.

²Re' hoj chiquncheel xa reh reh wach qoh q'ehb'ik wii'. Raaj wila' wilik jino'q i ma' nq'ehb'ik ta ruuk' i ruq'oral, re' re' korik wach ruk'ux, eh neerub'an ruq'ilariik chu'nchel i ruti'jolal.

³Noq inqakoj i ch'ihch' pan kichii' taqe kawáyu reh chi nee qoh kinimaj, ruuk' i re' nee inqa a'n rub'ehteesjiik chu'nchel i kiti'jolal.

⁴Chakoj taq rehtaal taqe barko: Atoob' ta yohb'aal wach kininqaal kiqerjik reje ruum i kowlaj teew, re' taqe kib'esanik reh xa ruuk' i jinaj k'isa b'ehtesb'al reh inkik'am reje aha' inkaaj i keh.

⁵Je' wo' re' i ju' qaaq' qohq'orik wii' re' ruuk' i qati'jolal, atoob' ta q'e' k'isiin, xa q'e' niik' naah i ruq'or. Je' rukab' i rub'an i ruk'oxb' q'aaq' xa re' yu' ruk'atam runimaal-oq i rax chee',

⁶re' ju' qaaq' je' naa nujinaq chi q'aaq', yohb'aal wach i sachooj i rub'an, nujinaq chi mahk. Re' qaaq' re' wo' ruuk' i qati'jolal, re' injot'wik reh chu'nchel i na'ojb'al. Je' qoplik ruq'aq'al ruum i ruq'aq'al i tojb'al mahk, eh je' wo' naarukoj ruq'aq'al paam chu'nchel i qak'achariik.

⁷Re' winaq neerub'an ruloch'ariik kinaah taqe i josq'laj chikop, taqe i kirupinik pan taxaaj, taqe i aaq', taqe i ruchopkaal palaw xti korik chi ruloch'om cho kinaah.

⁸Raaj i ju' qaaq' reh, ma' jino'q neenloch'wik naah ruuk' taqe i yiib' wach i ruq'or. Eh nujinaq chi q'orik re' ruuk' taqe inkasanik.

⁹Eh ruuk' wo' naq i ju' qaaq' inqaloq'ej i Ajaab'ees Dios. Eh ruuk' wo' chik i re' inqab'aj taqe qas qachaaq', re' taqe i ruyejaam chaloq i Dios chi je' ruwii'.

¹⁰Eh pan qachii' i nelik chaloq i holohik laj q'orik, eh ar wo' chik i nelik chaloq i yiib' wach q'orik. Hat taq nuhermano, re' re' ma' ruk'ul ta chi b'anarik

¹¹Chakoj taq rehtaal chi chupaam jino'q i raasb'al ha' ma' nee ta rub'an chi nee nelik chaloq i ki'laj ha', eh nee ta wo' chik i nelik cho ar i k'ahlaj ha'.

¹²Je' wo' re', i ruche'el i higo ma' nee ta ruwachuj i aseituna. Eh re' ruche'el i uuva ma' nee ta wo' ruwachuj i higo. Hat taq nuhermano, je' wo' re' i raasb'al i ha' k'aah ratz'amil ma' nee ta wo' inenelik cho ar i ki'laj ha'.

¹³Wila' awach taq aweh i wilik runa'ojb'al, eh i rureq chiriij i korik, inchol ruk'uhtaam ruuk' i holohik chi b'anarik, ruuk' i chaq'lamiil inye'arik reh ruum i runa'ojb'al.

¹⁴Raaj mi xa re' i kaqwachiil, xa re' i wolinik iib' wilik taq panawánima, eh wilik-oq inawaaj chiriij i taq i na a'n, inanimb'isaj-oq taq awiib'. Ruuk' taqe re' k'ahchi' taq achukum i q'orik chiriij i korik,

¹⁵Re' na'ojb'al re' re', ma' re' taj i Dios inye'wik cho reh xa na'ojb'al la' ayu' wach ak'al, xa rukapeew winaq, eh ruuk' i aj Yahm inchalik.

¹⁶Aha' wilik wii' i kaqwachinik iib', eh wilik inajawjik chiriij i chib'ih imb'aan, ar wilik i tukinik wachiis, je' wo' i xa reh reh wach chi mahk imb'aan.

¹⁷Eh re' taqe i wilik kuuk' i na'ojb'al inchalik ruuk' i Dios, saq chik wach i kik'achariik. Eh xasuq kik'ux chu'nchel aj uuk', ch'ub'ik wach kik'ux, xa chaq'laam taqe. Aj keteloom wachiis taqe, eh inki a'n otob'il ma' awach taj i tokoom rilariik inki a'n eh korik kiq'orik.

¹⁸Eh awach taqe inkichop kik'ux chusik'ariik i suq kiil k'uxliis, re' wo' rusuqkiil k'uxliis inkitik, ruuk' i re', naa kireqem i korik laj k'acharik.