Read Poqomchi 2 Pedro 1 Bible Online

2 Pedro 1 - Poqomchi bible

2 Pedro 1

¹Re' hin i Simón Pedro, hin raj kamanoom, raj tahqaneel i Jesucristo. Inutz'ihb'aaj reje huuj wili aweh taq i hat, i areqem taq chik chi riij i nimanik xiik' naah loq'il re' inqanimaj i hoj. Re' i ruyeew qeh i qaDios, i QaJaaw Jesucristo, qaj Ko'loom korik wach ruk'ux.

²Eh nee ta naq taq inak'ul i rotob'il i suq kiil k'uxliis ruuk' i runaab'jiik wach i Dios, i QaJaaw Jesucristo.

³Re' Dios ruuk' i rajaawriik i ruyeew qeh i ajwaal wach chi qeh pan qak'achariik. Eh i ruk'uhtaaj qeh nik' wach rulooq'jiik naa qa'nam, noq xuyeew qeh chi naab'jik chi korik i xsik'wik cho qawach ruuk' i runimaal wach, eh ruuk' taqe i rukamaj xiik' naah loq'il.

⁴Ruum taqe re', re' Dios wilik taqe i xuq'or cho rib'iral qeh xiik' naah nimaal kiwach, eh xiik' naah kiloq'il. Eh ruuk' taqe re', nee taq ti ehtrik i hat i rukorkiil wach ruk'ux i Dios, eh nee taq inako'leej awiib' chuwach i ma' holohik ta laj na'ojb'al, re' ruk'am chaloq i ruk'axariik wach iraaj ma' raaj b'anarik ayu' wach ak'al.

⁵Ruum aj re', re' nimanik taq k'ahchi' kaat, inchol taq achopom ak'ux chutiqariik naah ruuk' i holohik laj na'ojb'al chi riij i re', re' chik i holohik laj kapeew,

⁶chi riij i re', re' chik i ruq'ilariik taq awiib' cha wib'il awiib' chi riij i re', re' chik i kuyuuj, chi riij i re', re' chik i rulooq'jiik i Dios

⁷chi riij i re', re' chik i aajwanik iib' taq chawach, chi riij i re', re' chik i k'axooj.

⁸Wila' i na a'n taq holohik laj na'ojb'al wili, wila' natiq taq naah rub'anariik, re' taq aak'achariik ma' nee ta nkahnik chi xama' xta neerutiq wach, eh ni xata nee taq i nayeew chi re' chi ma' re' i runaab'jiik wach i QaJaaw Jesucristo.

⁹Raaj awach i ma' rub'an ta taqe na'ojb'al wili je' rukab' i mutz'wach oon je' rukab' i ma' nilwik ta chi korik, ruum sahchinaq chik paruk'ux chi xtz'ajarik, eh xsacharik chik wach taqe ru mahk.

¹⁰Je' re' noq re' taq i hat hermano, xa re' taq chik cha a'n i xusik' taq cho wii' awach, eh i xatrupab'aa' taq cho wii' i Dios. Reh chi ma' jaruuj taq chik neetiq'ehb'ik pamahk.

¹¹Eh chi je' re', ma' nim k'ayeew ta noq nee taq tikojaarik pa runimaal rajaawriik i wilik chi juneliik, re' i QaJaaw Jesucristo i qaj Ko'loom.

¹²Ruum aj re', re' hin ma' naa ta nukanaam ruq'orariik taq aweh taqe re', atoob' ta aweht'al taq chik, atoob' ta nanimaj taq chik i korik i hat taq tijimaj cho wii'.

¹³Re' q'oreel nik' chik najtiil k'achalkiin ayu' wach ak'al, re' hin rub'ehel chi weh chi xa jarpech pa' neenwik'saj ruq'orariik taq pan axikin aak'uhb'aaljiik wili.

¹⁴Ruum re' QaJaaw Jesucristo xuyeew chik weh chi naab'jik chi naa nukanaam chi jumehq'iil i k'acharik ayu' wach ak'al.

¹⁵Ruum aj re', re' hin ko naa nunik'eem nuq'iij taq chak'uhb'aljiik, reh chi noq hin-oq chik kamnaq, ko nee wo' taq ink'ulik cho panak'ux i xnuq'or taq aweh.

¹⁶Re' i xatqatijej taq wii' chi riij i rajaawriik, chi riij i ruk'uliik ruka'peech i QaJaaw Jesucristo ma' xata k'utaaj re' ruuk' intz'aqarik wach chi xa jot'b'al, ruum re' hoj xti ruuk' naq'qawach qilom cho wach i QaJaaw chi wilik runimaal i ruloq'il.

¹⁷Eh xqilow wo' noq xye'arik runimaal wach ruloq'il i Jesucristo ruum i Ajaab'ees Dios, re' noq xq'orob'jik cho ruum i Dios ruuk' i loq'laj q'orik wili: Re' wili i Wak'uun q'e' nuk'axam, eh ruuk' i reh ch'iklik nuk'ux, inki.

¹⁸Eh xti re' hoj xoj ib'irinik reh i q'orik re' re' chi pan taxaaj xchalik, noq wilkooj ruuk' i QaJaaw chinaah i yuuq' xiik' naah loq'il.

¹⁹Ruuk' i re', inqakoj rehtaal chi re' k'uhb'aal kiq'orom chaloq taqe i jalal ruq'oral i Dios xti korik, eh rub'ehel chi nayeew taq ak'ux chunimjiik. Re' k'uhb'aal re' re' je' rukab' i saqumb'al insihq'inik pan q'equm, uyumb'al reh i rusaqumaal i q'iij korehtaal i nelik chaloq i ch'umiil ihqen q'iij, reh chi naa rusihq'eem taq cho paam awánima.

²⁰Xa re' la', peet taq chanab'eej chi ma' awach taj i xa runa'ojb'al riib' noq nee ruq'or i k'uhb'aal kiq'orom chaloq taqe i jalal ruq'oral i Dios, re' kitz'ihb'aam chaloq pan santo laj huuj,

²¹ruum re' taqe i jalal ruq'oral i Dios ma' nik' ta xkiq'or chaloq i k'uhb'aal chi xata pankik'ux xchalik. Raaj kamanoom la' Dios taqe parub'ihnaal i reh xiq'orik, eh re' i Santolaj Uxlab'al xk'amwik cho kib'eeh.