Read Poqomchi 2 Pedro 3 Bible Online

2 Pedro 3 - Poqomchi bible

2 Pedro 3

¹Hat taq loq'laj hermano, re' wili i rukab' nuhuuj i nutz'ihb'aaj taq reje aweh. Eh chupaam kab'chel i nuhuuj i nutaq'aaj taq reje aak'uhb'aaljiik chi xa eliik-oq saq taq wach akapeb'aal.

²Eh k'oloq taq panak'ux i k'uhb'aal kiq'orom chaloq najtir q'iij taqe i santo laj jalal ruq'oral i Dios, je' wo' hoq i ruk'uhb'aal i QaJaaw Jesucristo i qaj Ko'loom, i xatkik'uhb'alej taq cho wii' taqe i raj tahqaneel.

³Re' wili ajwaal wach chi peet taq neenanab'eej, chi pan kuxesb'al taqe ponoq wach reh i q'iij wilik i naakik'uliik iloq naa kikaqse'laam i q'orooj cho rib'iral, xa re' naa kianam i ruk'ax wach i kiti'jolal.

⁴Eh je' wili i naa kiq'orom: ¿Chib'ih reet noq xakomajaa' wo' ink'ulik ruka'peech i Jesucristo q'orooj chaloq? Yu'naak ma' k'isiin chik i qamaam qati't kamnaq chaloq. Eh xakomajaa' ta wo' chih injaljik wach i rutz'uhkriik chaloq i wach ak'al, inko'q taqe.

⁵Re' taqe re' xama' nkaaj ta kireqem chi riij chi re' taxaaj xa wilik wo' chaloq najtir cho q'iij. Eh chi ruuk' i ransil i ruq'oral i Dios xutz'uhkrisaj chaloq i wach ak'al panha', eh ruuk' ha' xuyejaa' chaloq.

⁶Eh ruuk' wo' ha' xuk'am chaloq i runimaal jab', xsachwik wach i wach ak'al najtir q'iij.

⁷Eh re' taqe taxaaj ruch'ihil i wach ak'al wilkeeb' yu'naak, ruuk' wo' ransil i ruq'oral i Dios molooj taqe chi q'aaq' naa rusachwiik kiwach. Re' wo' q'aaq' re' re' naa ruk'atwiik keh paruq'ijil i q'ataj q'orik, taqe i yiib' wach kina'ojb'al.

⁸Hat taq loq'laj hermano, mansahchik taq panak'ux i wili: Chuwach i QaJaaw i jinaj q'iij je' nik'ik jino'q miil haab'. Eh re' jinaj miil haab' chuwach i reh xa je' nik'ik jinaj q'iij.

⁹Re' QaJaaw ma' chamlik ta chaloq chub'anariik i ruq'orom cho rib'iral, je' rukab' inkikapaaj i ju'jun. K'ahchi' la' rukuyum taq aawuyub'jiik i hat, ruum re' reh ma' raaj taj chi awach i neenkimik parumahk iraaj la' chi chu'nchel neenkiyot' i kik'ux chi riij i kimahk.

¹⁰Xa re' la', chi ma' eht'alimaj naa ruk'uliik iloq ruka'peech i QaJaaw Jesucristo, xa je' ink'u'loq jino'q i ajileq'. Eh naakiyojib'iik taqe i taxaaj ruuk' jinaj choqik naa rub'aan. Eh chu'nchel i wilkeeb' chupaam taqe i taxaaj naa rusachariik kiwach ruuk' q'aaq'. Eh re' wach ak'al ruch'ihil taqe i wilkeeb' chupaam naa wo' kik'ahtik.

¹¹Wila' je' re' na' sacharoq kiwach taqe i xa chib'ih jariik wilik, chib'ih reet noq ma' nee taq ti k'acharik pan santohiil i hat ¿Chib'ih reet noq ma' nee taq i nayeew ruloq'il i Dios?

¹²Je' re' noq, cha chop taq ak'ux chi ruyub'jiik i ruq'ijil i ruk'uliik i Dios. Chupaam i q'iij re' re', re' taqe i taxaaj naa rusachariik kiwach ruuk' q'aaq', eh chu'nchel i wilkeeb' chupaam naa kihab'ik ruum i xaq q'aaq'.

¹³Eh re' hoj, jinaj i ak' taxaaj, eh jinaj i ak' wach ak'al k'ahchi' quy-eem, re' ruq'orom cho rib'iral i Dios chi naa ruye'em qeh, re' taqe i naa ruwihiik wii' i korik, i otob'il.

¹⁴Re' taq i hat loq'laj hermano, noq kok'ahchi' taq awuy-eem i rojiik eloq wach taqe re', xti cha chop taq ak'ux chi k'acharik parukorkiil, reh chi nee taq tik'ulik rureq i Dios pansuqkiil k'uxliis, chi ma' xta taq ruch'uwa'iil wach awánima, ni xata nee taq i rureq amahk.

¹⁵Chakoj taq rehtaal chi re' quyub'jiik ruuk' q'unil i rub'an i QaJaaw Jesucristo, re' raaj chi neenqareq i ko'lemb'al qiib'. Eh re' wo' re' i xutz'ihb'aaj taq reje aweh chupaam taqe ruhuuj i qaloq' laj hermano Pablo ruuk' i runa'ojb'al xye'arik cho reh ruum i Dios.

¹⁶Eh rutaq'aam wo' taq ruq'orariik aweh i re' chupaam taqe i ruhuuj, atoob' ta wilik i k'axik chi reqarik chi riij. Re' taqe i ma' xta kina'ojb'al, re' taqe i ma' kichopom ta kik'ux, inkiyoj wach i ruq'or chupaam taqe huuj re' re', je' rukab' noq inkiyoj wach i tz'ihb'amaj cho chupaam i santo laj huuj, re' inki a'n re' re' naa ruk'amwiik keh pantojb'al mahk.

¹⁷Re' taq i hat loq'laj hermano, ruum chi noq taq xaweht'aliij taqe re', chawik'raaj taq awiib', reh chi ma' nee ta taq tikik'am reje chikiij ruuk' i jot'ooj taqe i yiib' wach kina'ojb'al, eh ni xata nee taq inkiyoj ak'ux ruuk' taq animaniik.

¹⁸Eh k'ahchi'-oq taq areqem chi riij chi korik runimjiik i QaJaaw Jesucristo, re' i qaj Ko'loom. Eh reh reh-oq wo' taq areqem i ruk'axb'al chi manlik. Re' ta naq i reh neenye'arik ruloq'il yu'naak, eh je' chi juneliik. Je' ta wo' naq re'.