Read Poqomchi 1 Juan 2 Bible Online

1 Juan 2 - Poqomchi bible

1 Juan 2

¹Hat taq kok' wak'uun wixq'uun noq wilkaat, inutz'ihb'aaj taq reje aweh wili, reh chi ma' xta taq neetimahkunik wii'. Eh wila' awach taq aweh i xmahkunik, wilik jinaj i nee nq'orik i koq chiqiij chuwach Ajaab'ees Dios, re' Jesucristo, i korik wach ruk'ux.

²Re' wo' i Jesucristo xuyeew riib' pankimik chi jilow mayiij chutojariik riij taqe i qamahk. Eh ma' xata re' taqe qamahk i hoj, xutoj la' wo' riij taqe kimahk chu'nchel i tinamit wach ak'al.

³Je' re' noq, wila' inqanimaj taqe i ruk'uhb'aal i Dios, iraaj ruq'orom chi qeht'al chik wach i reh chi korik.

⁴Eh awach inq'orik reh chi reht'al wach i Dios, eh mo'-oq wo' runimaj taqe ruk'uhb'aal, re' re' xachukuj q'orik i rub'an, ma' xtaj i korik ruuk'.

⁵Eh awach i nimanik reh i ruq'oral i Dios, korik chi ruk'ax chi manlik. Eh ruum i runimjiik i ruq'oral i Dios, inqanab'eej chi wilkooj pan jinaj wach k'uxliis ruuk'.

⁶Eh awach inq'orik reh chi wilik pan jinaj wach k'uxliis ruuk' i Dios, inchol ruk'achariik, je' rukab' noq xk'ulik k'acharoq i Jesucristo.

⁷Hat taq nuhermano, re' hin ma' ko ta ak' i k'uhb'aal k'ahchi' nutz'ihb'aam taq reje aweh. Xa re' la' wo' k'uhtamaj taq chaaweh pampeet. Eh re' najtir k'uhb'aal wili xa re' wo' i ruq'oral i Dios ab'iram taq chaloq.

⁸Xa re' la', re' i k'ahchi' nutz'ihb'aam taq reje aweh, je' naa ko ak' k'uhb'aal, ruum re' wili i xti korik, re' i xk'ulik ruk'uhtaaj i Jesucristo. Eh je' wo' chik re' i naa ak'uhtaam taq i hat, ruum re' q'equm k'ahchi' chik rik'iik, re' chik i manlik saqum k'ahchi' chi sihq'inik.

⁹Awach i ruq'or chi wilik pan saqum, eh ko rixowaaj-oq wach i ras ruchaaq', re' re' xa kopan q'equm wo' wilik.

¹⁰Eh awach i korik chi ruk'ax i ras ruchaaq', pan saqum chik wilik, eh ma' awach ta chik ineeruq'eb' pamahk.

¹¹Raaj awach i rixowaaj wach i ras ruchaaq', xa kopan q'equm wo' k'acharik i rub'an ma' reht'al taj aha' k'ahchi' rojiik, ruum tz'apooj inaq'wach ruum i q'equm.

¹²Hat taq kok' ak'uunb'ees ixq'uunb'ees inutz'ihb'aaj taq reje aweh i wili, ruum re' Dios xukuy taq chik amahk parub'ihnaal i Jesucristo.

¹³Inutz'ihb'aaj taq aweh i wili i hat taq ajaab'ees, ruum xanab'eej taq chik wach i xa wilik wo' chaloq pampeet. Inutz'ihb'aaj taq reje aweh i wili i hat taq k'ijolaq, ruum xaq'at taq chik wach i aj Yahm. Inutz'ihb'aaj taq aweh i wili i hat taq kok' ak'un, ruum xanab'eej taq chik wach i ajaab'ees Dios.

¹⁴Inutz'ihb'aaj taq reje aweh i wili i hat taq ajaab'ees, ruum xanab'eej taq chik wach i xa wilik wo' chaloq pampeet. Inutz'ihb'aaj taq reje aweh i wili i hat taq k'ijolaq, ruum kow taq chik ak'ux, eh ak'ulum taq chik i ruq'oral i Dios, xaq'at taq chik wach i aj Yahm.

¹⁵Maak'ax taq wach i wach ak'al, ni xata re' i yiib' wach na'ojb'al imb'aan wach ak'al. Awach imponik chuwach taqe re', ma' xtaj i ruk'axb'al Ajaab'ees Dios ruuk',

¹⁶ruum chu'nchel i yiib' wach na'ojb'al ma' ruuk' taj i Ajaab'ees Dios inchalik. Re' rotoowjiik i re' ma' re', re' rotoowjiik i ruk'ax wach inaq'qawach, re' niimb'isanik wachiis ruuk' b'ehomal, xa wach ak'al na'ojb'al.

¹⁷Re' i wach ak'al, re' taqe i yiib' wach na'ojb'al imb'aan chupaam naa rusahchiik kiwach. Eh awach imb'anik reh iraaj i Dios, naaruwihiik ruk'achariik chi juneliik.

¹⁸Hat taq kok' wak'uun wixq'uun noq wilkaat, yu'naak xa pantz'apaab' chik wach reh taqe q'iij wilkooj. Re' taq i hat ab'iram taq cho rib'iral chi jinaj inaarukojom riib' chi Cristo k'ulik i loq reh. Eh yu'naak, ma' k'isiin chik i wilkeeb' taq chaxilak inkikoj kiib' chi Cristo.

¹⁹Re' taqe re' chi qaxilak wo' elinaq taqe reje, xa re' la' ma' quch aj nimaneel ta wo' taqe chi korik. Wi ta xkiyeew kik'ux chi nimanik, ma' xi elik ta naq chik chi qaxilak. Ruuk' i kina'ojb'al inki a'n ink'utinik chi ma' re' ta quch aj nimaneel taqe.

²⁰Eh re' taq i hat, re' Jesucristo xye'wik taq chaaweh i Santolaj Uxlab'al. Ruum i re', chawunchelaal taq i hat aweht'al taq chik i xti korik.

²¹Re' hin inutz'ihb'aaj taq reje aweh wili, ma' ruum ta chi ma' aweht'al ta taq i korik, ruum la' chi xaweht'aliij taq chik. Eh aweht'al taq i hat chi re' korik ma' jino'q chukuj q'orik nee nelik reje ruuk'.

²²¿Awach i aj chukul q'orik re' re'? Re' inq'orik reh chi re' Jesús ma' re' taj i Cristo, i q'orooj cho rib'iral chi naruk'uliik, re' aj i re' i rukoj riib' chi Cristo. Ni xata re' Ajaab'ees, ni xata re' Ak'uunb'ees i runimaj.

²³Awach i ma' rukoj taj i Ak'uunb'ees Dios, ma' rukoj taj i Ajaab'ees Dios. Eh awach inq'orik i korik chiriij Ak'uunb'ees Dios, wilik ruuk' i Ajaab'ees Dios.

²⁴Ruum aj re', re' taq i hat, inchol taq amolom panawánima i k'uhb'aal ab'iram taq cho pampeet. Wila' xamol taq panawánima i k'uhb'aal re' re', nee taq ti wihik ruuk' i Ak'uunb'ees, je' wo' ruuk' i Ajaab'ees Dios.

²⁵Eh re' i Jesucristo xanoq wo' ruq'orom cho pampeet chi naa ruye'em qeh i juneliik k'acharik.

²⁶Re' hin inutz'ihb'aaj taq reje aweh wili, reh chinee taq inaweht'aliij awach taqe inkaaj taq aajot'ariik.

²⁷Re' taq i hat wilik taq chik panawánima i Santolaj Uxlab'al, re' i ruye'em taq aweh i Jesucristo. Ruuk' i re', ma' kota chik ruman chi awach neentijinik taq aweh, ruum re' wo' i Santolaj Uxlab'al ink'uhtanik taq aweh i holohik, i korik, ma' re' ta chukuj q'orik. Maacanaa' taq chik i wihik ruuk' i Jesucristo, je' rukab' i xatrutijej taq wii'.

²⁸Hat taq kok' wak'uun wixq'uun noq wilkaat, yu'naak maakanaa' taq chik i wihik ruuk' i Jesucristo, reh chi ch'iklik qak'ux taq awuuk' pankomonil na' k'oloq ruka'peech, eh chi ma' naa ta qak'ixiik na' qoh-ohoq pa'lojoq chuwach.

²⁹Aweht'al taq chik i hat chi re' i Jesucristo xti korik wach ruk'ux. Inchol wo' taq anab'eem chi re' taqe kib'anik reh i korik, aasjinaq taqe ruka'peech ruuk' i Dios.