Read Poqomchi 1 Juan 5 Bible Online

1 Juan 5 - Poqomchi bible

1 Juan 5

¹Awach i nimanik reh chi re' i Jesús i Cristo q'orooj cho rib'iral chi naruk'uliik, re' re' aasjinaq ruka'peech ruuk' Dios. Eh awach ink'axwik reh jino'q i ajaab'ees, i ruk'ax wo' taqe rak'uun rixq'uun i ajaab'ees re' re'.

²Eh noq inqak'ax chik i Dios, eh inqanimaj i ruq'or i ruk'uhb'aal, ruuk' re' inqanab'eej chi k'ahchi' qak'axam taqe i rak'uun rixq'uun i Dios.

³Re' i ruk'axariik i Dios re' wo' hoq i runimjiik i ruq'or taqe ruk'uhb'aal. Eh re' taqe ruq'or i ruk'uhb'aal ma' k'axik ta runimjiik,

⁴ruum re' i aasjinaq chik ruuk' i Dios ma' xta chik nee nuuchjik ruum i mahk ayu' wach ak'al. Eh xa ruum chi nqayeew qak'ux chi nimanik, ma' xta nee qoh ruchej i yiib' wach na'ojb'al.

⁵Xa re' wo' hoq i nimanik reh chi re' Jesucristo Rak'uun i Dios, ma' xta nee nuuchjik ruum i yiib' wach na'ojb'al imb'aan wach ak'al.

⁶Re' rehtalil noq xk'ulik i Jesucristo wach ak'al re' ha' noq xqajik ruhaa', eh je' wo' kik' noq xkimik wach kuruus. Ma' xata ha' chi je' wili ruch'ihil la' kik' i ha'. Re' Santolaj Uxlab'al inq'orik i korik chiriij taqe wili, ruum xa re' wo' Santolaj Uxlab'al i korik.

⁷Ixib' i wilkeeb' pan taxaaj kiq'orik rub'ehel i wili: Re' Ajaab'ees Dios, re' ruQ'oral i Dios, eh re' i Santolaj Uxlab'al. Eh xa jinaj wach inkiq'or taqe ixib' wili.

⁸Eh ixib' wo' hoq i kiq'orik rub'ehel ayu' wach ak'al: Re' Santolaj Uxlab'al, re' ha', eh re' i kik'. Eh xa jinaj wach inkiq'or taqe ixib' wili.

⁹Wila' inqanimaj inkiq'or taqe i xa winaq, ra'j naa chik re' i ruq'or rukorkiil i Dios ma' neenqanimaj, ruum re' re' xiik' naah loq'il chuwach inkiq'or taqe i xa winaq ruum re' Dios i ruq'or qeh i korik chiriij i Rak'uun.

¹⁰Eh awach i nimanik reh i Rak'uun i Dios, wilik chik paránima i korik re' re'. Eh awach i ma' runimaj taj i Dios, i rukoj chi chukul q'orik i Dios, ruum ma' runimaj taj i korik i ruq'orom chee reh chiriij i Rak'uun.

¹¹Re' wili i korik ruq'orom chee Dios: Re' chi ruye'em qeh i juneliik k'acharik, eh re' i juneliik k'acharik wili xa ruuk' i Rak'uun i Dios inkan.

¹²Eh awach i ruk'ulum paránima i Rak'uun i Dios, ye'ooj reh i juneliik k'acharik. Raaj i ma' ruk'ulum ta paránima i Rak'uun i Dios, ma' ye'ooj ta reh i juneliik k'acharik.

¹³Re' hin inutz'ihb'aaj taq reje aweh i huuj wili i tinimanik taq reh i Rak'uun i Dios, reh chinee taq inanab'eej chi wilik taq aak'achariik chi juneliik.

¹⁴Re' hoj ch'iklik qak'ux ruuk' i Dios, ruum chib'ih jariik i neenqapahqaaj reh pan qatiij ruuk' rub'ehel je' rukab' iraaj i reh, qeht'al chi nee qoh rib'iraj.

¹⁵Wila' qeht'al chi rib'iraj i qatiij, qeht'al wo' hoq chi neeruyee qeh aha' wilik i neenqapahqaaj reh.

¹⁶Eh awach i xrilow i ruch hermano chi xub'an i mahk ma' k'amwik ta pankimik, inchol rub'anam rutiij chiriij, reh chi neenye'arik ruk'achariik ruum i Dios. Xa re' la' wi ma' re' ruuk' i mahk ink'amwik pankimik xub'an. Eh awach imb'anik reh i mahk ink'amwik pankimik, ra'j ma' nee ta nuq'or re' chi neenb'aan tiij chiriij.

¹⁷Chu'nchel i yiib' wach na'ojb'al mahk chi b'anarik, xa re' la' wilik i mahk ma' ink'amwik ta pankimik.

¹⁸Re' hoj qeht'al chi re' taqe i rak'uun rixq'uun i Dios ma' nkian ta chik i keh i mahk, ruum re' chik i Rak'uun i Dios incha'jinik keh, eh ma' xta chik ki uchjik ruum i ruwinqilal i aj Yahm.

¹⁹Re' hoj qeht'al chi re' i Dios inehchanik qeh. Eh re' i kib'anik reh i mahk sut i wach ak'al, re' i aj Yahm wilik rajaawriik chikinaah.

²⁰Eh qeht'al wo' chi xk'ulik i Rak'uun i Dios ayu' wach ak'al chuye'ariik qana'ojb'al, reh chi chanab'eej wach i korik laj Dios. Eh wilkooj chik ruuk' i korik laj Dios, ruuk' i Rak'uun, re' i Jesucristo. Re' wili i korik laj Dios, eh re' reh inye'wik i juneliik k'acharik.

²¹Hat taq kok' wak'uun wixq'uun noq wilkaat, maayeew taq chik kajaawriik i xatz'aqoj tiyoox. Je' ta wo' naq re'.