Read Poqomchi 1 Sam 16 Bible Online

1 Sam 16 - Poqomchi bible

1 Sam 16

¹Re' QaJaaw Dios je' wili i xuq'or reh i Samuel: ¿Kojaruuj i rumay i ruti'kiil ak'ux chi riij i Saúl, re' xwesaj i rajaawriik i hin chi ma' naa ta chik rukahniik chi reey? Yu'naak chaham aseite chupaam uk'aa' nee tiooj ar Belén ruuk' i Isaí ruum re' hin jinaj keh i rak'uun naa nusik'im wach reh chi naa rukahniik chi reey chikinaah i aj Israel, inki.

²Re' Samuel je' wili ruchaq'weesjiik i QaJaaw xub'an: ¿Jaaw nik' wach noq neenooj nub'an i re' ar? Wixunab'eej i Saúl nee kirukansaj, inki. Re' QaJaaw Dios je' wili ruchaq'weesjiik xub'an: Chak'am reje jino'q k'isa qahxoq wakax neenaq'or reh i Saúl chi k'atal mayiij tiooj chi nuwach.

³Eh noq nee ti ponik ar neenayuq'eej awuuk' i Isaí noq nee nayeew amayiij. Re' hin neekinq'orik aweh chib'ih i neena a'n, awach i neenuq'or aweh i hin chi nee najalk'iij i aseite wach naah re' wo' re' neena a'n reh, inki.

⁴Re' Samuel xub'an wo' hoq i xq'orarik reh ruum i Dios. Eh noq xponik ar Belén xi elik chaloq taqe i k'amal b'eeh xa yo'jik chik inki a'n je' wili xkiq'or reh: ¿Mi suq kiil k'uxliis i xak'am cho panqatinamiit? inki taqe.

⁵Re' Samuel je' wili xuq'or: Korik chi je' re' xin chalik chuye'ariik i mayiij chuwach i QaJaaw, chasaqb'isaj taq awiib' nee taq tiooj chi wiij chi ruq'ahteesjiik i mayiij, inki. Eh re' i Samuel xuq'asaj i Mayiij chi saqb'eesb'al wach i Isaí ruch'ihil taqe i rak'uun xuyuq'eej taqe ruuk' noq xuq'asaj i mayiij.

⁶Eh noq xi ponik chupaam i ye'aab' wilik wii' i Samuel, re' Samuel xrilow wach i Eliab, eh je' wili i xuq'or paruk'ux: Xti korik chi re' winaq wili sik'ooj wach ruum i Dios chi naa rokiik chi reey, inki.

⁷Re' i QaJaaw Dios je' wili i xuq'or reh i Samuel: Re' hat ma' naa ta wilom nik' wach inka'yik i winaq ni xata re' i runimaal rooq ruum re' hin ma' re' tee re' inwaaj. Re' hin ma' re' taj nik' wach i nka'yik inwilow je' rukab' i rub'an i winaq re' wach i rilow. Re' hin ma' re' taj i wach i winaq inwilow, re' la' ránima inwilow, inki.

⁸Eh re' i Isaí xuyuq'eej i Abinadab re' jinaj keh i rak'uun xupab'aa' chuwach i Samuel, eh re' Samuel je' wili xuq'or: ¿Ma' re' ta naak i wili rusik'im wach i QaJaaw Dios? inki.

⁹Chi riij i re', re' i Isaí xupab'aa' i Samá jinaj keh i rak'uun chuwach i Samuel. Eh re' Samuel je' wo' chik wili i xuq'or: Ma' re' ta wo' re' i rusik'im wach i QaJaaw Dios, inki.

¹⁰Je' re' noq re' Isaí i wuq'uub' i rak'uun xupab'aa' chuwach i Samuel. Xa re' la' re' Samuel xuq'or reh i Isaí chi ma' jino'q keh taqe i rak'uun re' re' rusik'im wach i QaJaaw Dios.

¹¹Eh re' Samuel xupahqaaj reh i Isaí chi je' wili: ¿Ma' xta naa chik jino'q awak'uun chikiij taqe i wili? inki. Re' i Isaí je' wili xuq'or: Jinaj chik i wak'uun re' i komanlik, re' incha'jinik keh i nutentzuun, inki. Re' Samuel je' wili xuq'or: Chataq'aaj ruk'amariik chi jumehq'iil ruum ma' nee ta rub'an chi neenqatoq'aa' chib'ih i naaqa'nam wila' komajaa' ink'uloq i reh, inki.

¹²Eh re' i Isaí xutaq'aaj ruk'amariik i rak'uun chaaq'b'ees. Re' aak'un re' re' q'e' holohik, q'anputzik i naah, eh kow riib'. Eh re' i QaJaaw Dios je' wili i xuq'or reh i Samuel. Re' aak'un wili i nusik'im wach, chakuxisaj reh chi neenkahnik chi kireey i awuch aj Israel, inki.

¹³Eh re' Samuel xuchop chaloq i uk'aa' xujalk'iij i aseite wach naah i k'ijool chikiwach i ras xupab'aa' chi reey chinaah i tinamit Israel. Re' i k'ijool re' re' David i rub'ihnaal, eh chupaam i junk'aam re' re' xokik ruuk' chi jumpech i Ruxlab'al i Dios i David. Chi riij i re', re' Samuel xuchaq' kahnoq xooj wo' chik Ramá.

¹⁴Re' i Ruxlab'al i QaJaaw Dios xelik ruuk' i Saúl. Eh jinaj i ma' tob'laj uxlab'al xtaq'ab'jik cho ruum i QaJaaw rik'saj chi ti' k'axik.

¹⁵Eh re' i Saúl je' wili i xq'orarik reh kuum i rumoso: Re' QaJaaw Dios xutaq'aaj chee jinaj i ma' tob'laj uxlab'al reh chi k'ahchi' kaat rik'sam chi ti' k'axik.

¹⁶Ruum aj re', re' hat neerub'an chi qoh ataq'aaj reje i hoj, hoj amoso chi nee qohooj chusik'ariik jino'q i winaq inchol q'ojinik arpa chi korik. Noq nee titohq'ik rik'sam chi ti' k'axik i ma' tob'laj uxlab'al, re' winaq re' re' neentohq'iik ruq'ojem i arpa reh chi re' hat neensuuqb'ik ak'ux, inki taqe.

¹⁷Re' Saúl je' wili xuq'or: Neerub'an chi nee taq inooj asik' jino'q weh re' i winaq inchol q'ojinik arpa reh chi nee taq i nak'am cho weh ayu', inki.

¹⁸Eh jinaj keh i rumoso je' wili i xuq'or reh: Re' hin jinaj i weht'al wach inchol q'ojinik arpa chi korik rak'uun i Isaí aj Belén. Re' k'ijool re' re' inchol q'aq'inik, kow riib', inchol q'orik, q'e' holohik, eh q'e' intoob'jik ruum i Dios, inki.

¹⁹Eh re' Saúl xutaq'aaj i aj taqareel ruuk' i Isaí je' wili i xuq'or reje reh: Chaq'or reh i Isaí chi chutaq'aaj cho weh i rak'uun ayu' re' i k'ijool incha'jinik reh i rutentzuun, inki reje.

²⁰Re' Isaí xutaq'aaj wo' chaloq i David re' i rak'uun ruuk' i Saúl. Eh xutaq'aaj wo' chaloq i kaxlanwi'k xub'ak' cho chi riij i b'uurux, eh jinaj i uk'aa' i riis uuva, jinaj i kaprax xuk'am chaloq.

²¹Je' aj re' noq re' David xooj rupab'aa' riib' chuwach i Saúl, xkahnik chi kamanik ruuk'. Re' Saúl q'e' xuk'ax i David, xupab'aa' chi to'ool reh.

²²Re' Saúl xutaq'aaj wo' chik reje jinaj i aj taqareel ruuk' i Isaí xutaq'aaj ruq'orariik reh chi chub'an otob'il chi chuyeew q'ab' chi neenkahnik ruuk' i David, ruum q'e' xponik chuwach.

²³Eh xkahnik i David ruuk' i Saúl. Eh noq re' i ma' tob'laj uxlab'al i rutoq'aa' rub'anam i ti' k'axik reh i Saúl, re' David intohq'ik ruq'ojem i ru arpa. Re' i ma' tob'laj uxlab'al i rukanaa' rub'anariik i ti' k'axik reh i Saúl, eh insuuqb'ik wo' chik ruk'ux.