Read Poqomchi 1 Sam 19 Bible Online

1 Sam 19 - Poqomchi bible

1 Sam 19

¹Re' i reey Saúl xuq'or reh i Jonatán re' i rak'uun, xuq'or wo' keh chu'nchel i k'amal kib'eeh soldado chi naa kikansam i David. Xa re' la' re' i Jonatán q'e' raaj wach i David.

²Je' re' noq je' wili i xuq'or reh i David: Re' wajaaw ti raaj kaat rukansam. Je' re' noq i iqal cha wik'raaj awiib' chakeb'aa' awiib' chupaam jino'q i ye'aab' aha' ma' nee ta tikan wii'.

³Eh re' hin nee kinooj chi riij i wajaaw chupaam i ye'aab', aha' nee ti wihik wii'. Re' hin neekinq'orik i koq chawiij ruuk' i reh neenqilow chib'ih i nee ruq'or, re' hin neenuq'or aweh, inki.

⁴Re' Jonatán holohik xq'orik i koq chi riij i David chuwach i Saúl re' i rajaaw je' wili i xuq'or: Re' hat qajaaw reey ma' ruk'ul taj chi neena a'n i ma' holohik ta laj na'ojb'al reh amoso David, ruum re' reh ma' jino'q i yiib' wach rub'anam aweh, holohik la' taqe i rub'anam aweh.

⁵Re' reh xuyeew riib' pankimik noq xukansaj i Goliat, eh re' QaJaaw Dios xuko'leej chu'nchel i aj Israel. Re' hat xawil noq xukansaj i Goliat, eh xsuuqb'ik ak'ux. Eh ¿Chib'ih chik reet noq naa amahkuniik ruuk' i rukanteesjiik i David chi xama' xta wo' ru mahk? inki.

⁶Eh noq xrib'iraj i Saúl i xuq'or i Jonatán re' rak'uun je' wili i xuq'or: Xti korik i nuq'or parub'ihnaal i k'achlik Dios chi ma' naa ta rukanteesjiik i David, inki.

⁷Eh re' Jonatán xuyuq'eej i David xuq'or reh chu'nchel i k'utaaj xkian ruuk' i Saúl i rajaaw. Eh xuk'am reje i David chuwach i Saúl xkahnik wo' chik chi kamanik ruuk' je' rukab' noq wilik pampeet.

⁸Eh xtohq'ik wo' chik i q'aq'inik xooj wo' chik chi q'aq'inik kuuk' i aj filisteo, eh xub'an wo' chik cho keh korehtaal xkimol chi elik chikiwach.

⁹Eh re' QaJaaw Dios xutaq'aaj wo' chik chaloq i ma' tob'laj uxlab'al chinaah i reey Saúl. Re' reh tzuhnik chupaam i paat i rub'an wii' i taaq'anik, wilik i ruq'as ju' ch'ihch' pan q'ab', eh re' David reh k'ahchi' ruq'ojem i ru arpa.

¹⁰Re' Saúl xukut reje i ruq'as ju' ch'ihch' reh naq chi naa ruch'ahpaam i koq chupaam i David wach tz'aq. Re' David xuk'uhtzaaj riib', chinaah xik'ik, wach tz'aq xch'aplojik i koq i ch'ihch'. Eh chupaam aq'ab' re' re' xuko'leej riib' i David xumol chi elik.

¹¹Eh re' reey Saúl xa chupaam wo' aq'ab' re' re' xutaq'aaj taqe i ru soldado reh chi xooj kicha'jeej i rupaat i David reh naq chi naa kikansam parusaq'iik. Eh re' Mical i rehk'een i David je' wili i xuq'or reh i rub'ahiil: Wila' ma' xako'leej riij aak'achariik chupaam aq'ab' wili, hat kamnaq noq neensaq'ik, inki.

¹²Re' Mical ar xresaj cho pan ventana xuqasaj cho pant'uylik i David, xumol chi elik i David, xa je' re' noq xuko'leej riib' chupaam aq'ab' re' re'.

¹³Eh re' i Mical xuchop chaloq jinaj i tz'aqoj tiyoox xooj ruyok'aa' chuwach i ch'aht kiwirik wii' xukoj i riij kaprax wach naah, eh xub'ur naah chi chamaar.

¹⁴Noq re' Saúl xutaq'aaj reje i soldado chi ruchopariik i David re' Mical i rehk'een je' wili i xuq'or: Re' David yowaab', inki.

¹⁵Re' Saúl xutaq'aaj wo' chik taqe reje taqareel k'amal reh i David je' wili xuq'or keh: Chaqerej taq cho weh i David waruyokaab' atoob' ta yowaab' reh chi nee nukansaj, inki.

¹⁶Eh noq xi okik i koq i taqareel parupaat i David ar xkireq chi yoklik wach ch'aht jinaj i tz'aqoj tiyoox rismaal kaprax i wilik wach naah.

¹⁷Re' Saúl je' wili i xuq'or reh i Mical: ¿Chib'ih reet noq xinajot', eh xayeew q'ab' chi xumol chi elik i nixowanik nuwach? inki. Eh re' Mical je' wili i xuq'or: Re' hin xnuyeew q'ab' chi xooj ruum xuq'or i korik chi naa kiin rukansam wila' ma' xnuyeew q'ab' reh, inki.

¹⁸Eh re' i David xuko'leej riib' xumol chi elik xooj ruuk' i Samuel ar Ramá xuq'or reh chu'nchel i xb'anarik reh ruum i Saúl. Re' David kikab'cheel ruuk' i Samuel xiooj chi patinik ar Naiot.

¹⁹Eh chi riij i re' xq'orarik reh i reey Saúl chi re' David ar wilik chupaam i ye'aab' Naiot wilik paruyuq'ul i Ramá.

²⁰Eh re' i Saúl wilik wo' chik taqe i ru soldado xutaq'aaj reje chi ruchopariik i David reh naq chi naa kik'amam cho ruuk'. Re' taqe i aj taqareel re' re' xkilow wach i juntuhb' chi jalal ruq'oral i Dios re' Samuel ink'amwik kib'eeh. Eh re' taqe i raj taqareel i Saúl re' re' xchalik i Ruxlab'al i Dios chikinaah xtohq'ik wo' kiq'orom i keh inkiq'or taqe i jalal ruq'oral i Dios.

²¹Eh re' i Saúl wilik wo' chik taqe i ru soldado xutaq'aaj reje. Eh re' keh xsahchik wo' kik'ux xkitoq'aa' wo' kiq'orom i keh inkiq'or i jalal ruq'oral i Dios. Re' Saúl xutaq'aaj wo' chik taqe i raj taqareel paroxpeech, eh je' wo' chik re' i xkik'ul.

²²Eh xrilow chi je' re' i Saúl re' chik i reh xooj chi rusik'ariik i David ar Ramá, eh noq xponik chi chii' i nimlaj jul ha' wilik Secú ar xtohq'ik rupahqaam chi je' wili: ¿Mi aweht'al taq i hat aha' wilik i Samuel ruch'ihil i David? inki. Eh jinaj xchaq'winik cho reh chi je' wili: Ayu' chupaam i ye'aab' Naiot wilkeeb', re' wilik paruyuq'ul i Ramá, inki.

²³Re' Saúl xooj wo' chupaam i ye'aab' Naiot wilik paruyuq'ul i Ramá. Re' reh xchalik wo' chinaah i Ruxlab'al i Dios xitoq'aa' tz'uuy xutoq'aa' ruq'orom inkiq'or i jalal ruq'oral i Dios, korehtaal xponik chupaam i ye'aab' Naiot wilik paruyuq'ul i Ramá.

²⁴Eh xsahchik ruk'ux resaj i ruso' i soldado chi riij xkahnik chi t'uslik xitoq'aa' k'erlik chii' chi tz'uuy xtohq'ik ruq'orom inkiq'or i jalal ruq'oral i Dios. Eh xiko'leej riib' i David. Ar aj xtohq'ik cho ruq'orariik re' i q'orik i ruq'or chi je' wili: ¿Mi jalal wo' ruq'oral i Dios re' i Saúl reh? inki.