Read Poqomchi 1 Sam 20 Bible Online

1 Sam 20 - Poqomchi bible

1 Sam 20

¹Re' David xelik reje Naiot wilik paruyuq'ul i Ramá, xooj ruuk' i Jonatán je' wili i xuq'or reh: ¿Chib'ih i xnub'an chib'ih i ma' holohik taj xnub'an? oon ¿Chib'ih i numahk chuwach awajaaw ruum kiraaj kiin rukansam? inki.

²Re' Jonatán je' wili xuq'or: Ma' ta naq nee ruyeew q'ab' i Dios chi nee tirukansaj. Re' hin weht'al chi re' wajaaw ma' jino'q i nim wach na'ojb'al ma' jino'q i k'isiin wach na'ojb'al neerub'an chi ma' ta nee ruq'or weh. Eh ¿Nik' wach noq nee rukeb'aa' chi nuwach i rukapaaj chawiij? Ma' ruk'ul ta chi neerub'an i je' re', inki.

³Re' David xuq'or wo' chik xti korik je' wili i xuq'or: Re' awajaaw reht'al chi korik chi re' hat q'e' kinak'ax, re' reh xama' raaj ta ruq'orom aweh, xa re' raaj chi ma' nee ta ntib'ik ak'ux. Re' hin xti korik i nuq'or aweh parub'ihnaal i QaJaaw Dios chi xanik' nee kirukansaj, inki.

⁴Re' Jonatán xupahqaaj reh i David chi je' wili: ¿Chib'ih inawaaj chi neenub'an chawiij? inki.

⁵Re' David je' wili ruchaq'weesjiik i Jonatán xub'an: Iqal inkininq'ijeej i ak' poh, eh re' hin chupaam i q'iij re' re' hin okrinaq chi kintzuhnik chi wi'k chucheel i reey re' aawajaaw. ¿Mi nee nayeew q'ab' weh chi neenukeb'aa' wiib' panab'iix? eh kore' chik ixq'eq kab'iij kinelik chaloq ar.

⁶Eh wila' xirupahqaaj aweh aawajaaw je' wili i neenaq'or reh: Re' David xapanjumehq'iil xupahqaaj weh chi chupaam i tinamit Belén, ar chu'nchel i awach reh naa b'ila' kininq'ijeem i ruye'ariik i mayiij inye'arik ar rajlaal i haab'.

⁷Eh wila' xuq'or aweh aawajaaw chi ma' xta reet chi xinooj neensuuqb'ik nuk'ux, eh wila' xkaqrik chi xinooj ar nee nakoj rehtaal chi xa koraaj wo' nukanteesjiik.

⁸Re' hin inwaaj chi neena a'n weh otob'il re' re' ruum hin awaj kamanoom. Eh qaq'orom xti korik chuwach i QaJaaw chi qamigo qiib' awuuk'. Wila' wilik wo' numahk neerub'an chi re' hat nee tikaansanik weh ma' kota ruman chi re' aawajaaw neenkansanik weh, inki.

⁹Re' Jonatán je' wili ruchaq'weesjiik xub'an: Re' hat maakapaaj chi neenak'ul i je' re', ruum nee ta nunab'eej i hin chi naa kaat rukansam i wajaaw reh hin jumehq'iil naq neenuq'or aweh, inki.

¹⁰Re' David je' wili xuq'or reh i Jonatán: Eh ¿Awach chik nee nq'orik weh wila' pank'aah xatruchaq'weej awajaaw? inki.

¹¹Eh re' Jonatán je' wili xuq'or: Kim ayu' taq chi wiij panab'iix, inki, eh xiooj wo' kikab'cheel panab'iix.

¹²Re' Jonatán je' wili xuq'or reh i David: Re' hin i nuq'or aweh i korik parub'ihnaal i QaJaaw qaDios i hoj aj Israel chi i iqal je' yu' ora, oon kab'iij neenunab'eej chib'ih jariik i rukapaaj chawiij. Wila' holohik i xukapaaj chawiij, re' hin neenutaq'aaj cho ruq'orariik aweh.

¹³Eh wila' korik chi ti raaj kaat rukansam i wajaaw, eh wii ma' xnutaq'aaj ruq'orariik aweh i ruk'ul chi nee ruyeew chee runimaal ti' k'axik chi nunaah i QaJaaw Dios. Re' ta naq i QaJaaw Dios neentoob'inik aweh. Je' rukab' noq xutoob'eej chee wajaaw.

¹⁴Eh noq k'achalkiin neena a'n otob'il weh i hat je' rukab' otob'il xub'an aweh i QaJaaw Dios i hat.

¹⁵Eh wila' xin kimik xa konaa wo' a'nam i otob'il keh chi juneliik i awach weh. Ni xata naq noq re' QaJaaw naa rukuxiik rusacham kiwach i nixowanik awach i hat maayeew q'ab' chi neensahchik panak'ux i otob'il xqaq'or, inki Jonatán.

¹⁶Re' Jonatán wilik i xuyejaa' wach ruuk' i David je' wili xuq'or: Re' ta naq i Dios neen ye'wik keh chutojariik i kimahk taqe i nixowanik wach i David, je' wo' hoq i naa ruxowaniik kiwach i riih rumaam.

¹⁷Re' Jonatán xuq'or wo' chik reh i xti korik i David ruum q'e' ruk'ax je' rukab' noq i ruk'ax riib' i reh.

¹⁸Eh re' Jonatán je' wili i xuq'or reh i David: Iqal inkininq'ijeej i ak' poh ma' naa ta chik kiye'em awajaawriik noq naakilom chi ma' wilkaat ta panatzunaab'.

¹⁹Eh paroox q'iij naa ruk'utiniik chi ma' wilkaat ta ar. Re' hat naa wo' chik rojiik akeb'aam awiib' aha' xakeb'aa' awiib' juriim. Ar neenakeb'aa' awiib' chi riij i juntuhb' chi ab'aj Ezel i rub'ihnaal.

²⁰Re' hin oxpech neenukut reje i nuflecha neenub'an chi je' ti chik kore' k'ahchi' nutijem wiib' chi kut.

²¹Eh neenuq'or reh i numoso chi hiy chamol weh taqe i nuflecha wila' xab'iraj chi nee nuq'or reh chi ayu' cho reh i juntuhb' chi ab'aj xqajik i ar naa akojom rehtaal chi ma' xta naa ak'ulum. Neerub'an chi nee ti chalik ruum korik i nuq'or aweh parub'ihnaal i QaJaaw chi ma' xtaj i naa ak'ulum.

²²Eh wila' xnuq'or reh chi, chi juntar i juntuhb' chi ab'aj xqajik taqe i nuflecha neerub'an chi nee namol chi elik iraaj ruq'orom chi re' i QaJaaw Dios iraaj chi naa awojiik.

²³Aha' wilik taqe i qayejaam wach awuuk' pankib'al re' i Dios ineht'alinik reh chi korehtaal inooj eloq wach, inki.

²⁴Eh xponik i q'iij reh i runinq'ijiik i ak' poh xooj wo' rukeb'aa' riib' i David, eh re' reey Saúl xutzunaa' riib' chi wi'k naah mexa.

²⁵Re' Saúl ar wo' xutzunaa' riib' aha' intzuhnik wii' wach tz'aq i koq. Eh re' Jonatán chuwach xutzunaa' i koq riib'. Eh re' Abner chucheel i Saúl xutzunaa' i koq riib', eh re' i rutzunaab' i David xkahnik chi ma' xta paam.

²⁶Eh chupaam i peet q'iij ree i runinq'ijiik i ak' poh ma' xta xuq'or i reey Saúl ruum je' wili xukapaaj paruk'ux: Re' David ma' xta ayu' ruum chib'ih nee xuk'ul, oon ma' ruk'ul ta naa chi reh chi nee nokik haa' pamoloj-iib', inki.

²⁷Eh parukab' chik q'iij ree ninq'iij xkahnik wo' chik i rutzunaab' i David chi ma' xta paam. Xrilow chi je' re' i Saúl je' wili i xuq'or reh i Jonatán re' i rak'uun: ¿Chib'ih reet noq ma' xk'ulik wa'aal i rak'uun i Isaí eew, je' wo' chik yu'naak? inki.

²⁸Re' Jonatán je' wili ruchaq'weesjiik i rajaaw xub'an: Re' David xa pan jumehq'iil xupahqaaj otob'il weh chi xnuyeew q'ab' reh chi xooj pan tinamit Belén

²⁹Eh je' wili i xuq'or weh: Cha a'n otob'il chayeew q'ab' chi nee kinooj Belén ruum re' taqe i awach weh k'ahchi' kiq'asam i mayiij ar re' inkiyeew rajlaal i haab', eh re' i was xtaaq'anik cho nuk'amariik. Wila' korik aweh chi suq ak'ux wuuk' chayeew q'ab' weh chi nee kinooj chi rilariik taqe awach weh, inki weh, ruum aj re' ma' xk'ulik ta wa'aal awuuk' i hat reey eew, eh je' wo' yu'naak, inki.

³⁰Ruum i re' xqop wach i rujosq'iil i Saúl, je' wili i xuq'or reh i Jonatán re' i rak'uun: Re' hat yiib' wach ana'ojb'al, hat rak'uun jinaj ixoq yiib' wach runa'ojb'al. Yu'naak i hin xnunab'eej chi re' hat xti awamigo i rak'uun i Isaí. Re' xa a'n re' re' k'ixb'ilaal cha weh i hat je' wo' chi reh atuut.

³¹¿Mi ma' weht'al re' hat nik' najtiil neenk'acharik i rak'uun i Isaí ma' nee ta ti elik korik, eh ni xata nee ti okik chi reey i hat, je' wo' taqe awak'uun? Yu'naak hiy cha sik' nee nak'am cho weh ruum xti ruk'ul chi naa rukanteesjiik, inki.

³²Noq xrib'iraj chi je' re' i Jonatán re' i rak'uun xupahqaaj reh i rajaaw chi je' wili: ¿Chib'ih reet noq i ruk'ul chi naa rukimiik chib'ih i mahk xub'an? inki.

³³Ruum i re', re' Saúl xukut reje chi q'as ju' ch'ihch' i Jonatán. Ruuk' i re' xunab'eej i Jonatán chi re' i rajaaw korik chi ruyejaam wach rukanteesjiik i David.

³⁴Re' Jonatán yohb'aal wach i rujosq'iil noq xwuktik reje nah mexa, ma' xub'an ta chik ruwa' parukab' q'iij reh i runinq'ijiik i ak' poh, ruum q'e' xtib'ik ruk'ux chi riij i David ruum xuq'or i rajaaw chi naa rukansam.

³⁵Eh chi junwaar chik kowahq'eq xooj panab'iix i Jonatán je' wo' rukab' i xuq'or reh i David xuk'am reje i rumoso chi riij kok'ijool ak'un.

³⁶Eh je' wili i xuq'or reh i rumoso: Hiy lom awajimam awiib' chamol chaloq i flecha naa nukutum reje, inki. Noq rajimam riib' xooj i k'ijool re' i Jonatán xukut wo' reje i flecha, eh ko chi juntar i wilik wii' i k'ijool xponik qajoq.

³⁷Eh noq xponik i k'ijool aha' xqajik wii' i flecha xukut i Jonatán, re' Jonatán kow xuk'er reje chii' chuq'orariik reh i k'ijool chi je' wili: Hiy reje chawach ko chi juntar i wilkaat wii' xqajik i flecha.

³⁸Hiy awajimam awiib', inki. Re' i k'ijool xponik wo' rumol i flecha xuk'am cho reh i Jonatán.

³⁹Xa re' la' re' i k'ijool ma' xureq ta chi riij chib'ih jariik i xub'an i Jonatán, ruum xa re' wo' reh ruch'ihil i David kiyejaam wach chi je' re' i naa kianam.

⁴⁰Eh chi riij i re', re' Jonatán xuq'asaj i ru flecha reh i k'ijool re' i rumoso, xuq'or reh chi xuk'am wo' chik reje pan tinamit.

⁴¹Eh noq elinaq chik reje i rumoso, re' i David xelik cho chi riij i juntuhb' chi ab'aj. Oxpech xuk'utzaa' qohoq riib' chuwach i Jonatán korehtaal xureq wach ak'al ruuk' i yejal wach. Eh xkiq'ahcheej kiib', k'ul xkitz'ub' kiib' xkimol chi oq'ik kikab'cheel. Re' David xuch'ikaa' ruk'ux chi oq'ik.

⁴²Eh re' i Jonatán je' wili i xuq'or reh i David: Neerub'an chi nee tiooj chi suq ak'ux, re' i xti korik xqaq'or awuuk', parub'ihnaal i QaJaaw Dios xqaq'or. Re' ta naq i QaJaaw Dios neentoob'inik weh i hin, je' wo' hat, je' wo' taqe i qiih qamaam, inki. Eh re' David xuchop reje rub'eeh, re' i Jonatán xsutinik wo' chik reje pan tinamit.