Read Poqomchi 1 Sam 21 Bible Online

1 Sam 21 - Poqomchi bible

1 Sam 21

¹Re' David xooj ar Nob ruuk' i Ahimelec k'amal kib'eeh aj tiij. Eh re' i Ahimelec xelik cho chi k'ulariik i David je' wili i xuq'or reh: ¿Chib'ih reet noq awutkeel xat k'uloq ma' awach ta awuch'ihil? inki.

²Re' David je' wili ruchaq'weesjiik xub'an: Re' reey xuq'or weh chi ma' awach ta naa runab'iniik reh i xirutaq'aaj cho wii', eh chib'ih jariik i xuq'or cho weh. Eh re' hin xaxnuq'or keh i nu soldado aha' taqe nanuk'ulum.

³Re' hin inwaaj naq chi nee naa siij chib'ih weh, chayeew ho'oob'-oq nukaxlanwi'k, oon chib'ih chik jariik i wilik awuuk', inki.

⁴Eh re' i k'amal kib'eeh aj tiij je' wili ruchaq'weesjiik i David xub'an: Re' hin ma' xtaj i xa kaxlanwi'k wuuk'. Re' kaxlanwi'k wilik wuuk' re' ruuk' i kuxisamaj reh mayiij, re' hin neenuyeew aweh xa re' la' wii re' taqe a soldado ma' xi wirik ta ruuk' i kehk'een, inki.

⁵Re' David je' wili ruchaq'weesjiik i k'amal kib'eeh aj tiij xub'an: Re' taqe i nu soldado keb'ejer noq xinelik chee hin xama' wirinaq ta wo' chik taqe ruuk' i kehk'een, je' re' inki a'n atoob' ta ma' q'e' nim wach i qab'eeh ra'j naa chik ma' neenkik'ax kiib' yu'naak re', inki.

⁶Eh re' k'amal kib'eeh aj tiij xuyeew wo' hoq i mayijimaj kaxlanwi'k reh i David ruum ma' xta naq chik jino'q i tokoom kaxlanwi'k ruuk', xa re' wo' hoq i kaxlanwi'k inye'arik chi mayiij xkesaj cho chuwach i QaJaaw. Eh tz'a' laj kaxlanwi'k chik i xkiyeew chi jilow nah mexa.

⁷Chupaam i q'iij re' re' jinaj i rumoso i Saúl xkahnik chupaam i rupaat i QaJaaw Dios. Re' winaq re' re' Doeg i rub'ihnaal aj Edom re' ink'amwik kib'eeh taqe i ki ilwik reh taqe i rutentzuun i reey Saúl.

⁸Eh re' David je' wili i xuq'or reh i Ahimelec: ¿Mi wilik awuuk' jino'q i q'aslaj ch'ihch', oon jino'q i q'as ju' ch'ihch'? Re' hin xa pan jumehq'iil xirutaq'aaj chee reey ruum i re' ma' xnuk'am ta cho nuq'as laj ch'ihch', eh ni xata jino'q i nutz'a'aamb'aal xnuk'am chaloq, inki.

⁹Re' Ahimelec k'amal rub'eeh aj tiij je' wili i xuq'or: Re' hin xa re' wo' i ruq'aslaj ch'ihch' i Goliat wilik wuuk' re' i xakansaj wach k'ixkaab' Ela, ar wilik i molik taqe wii' Efod b'otlik pan itz'ihy neerub'an chi nee nak'am reje mi nawaaj, re' hin ma' xta chik jino'q tokoom tz'a'amb'al wuuk', inki. Re' David je' wili i xuq'or: Neerub'an chi neenuk'am ruum ma' xta chik jino'q i q'aslaj ch'ihch' chihooj chuwach i re', inki.

¹⁰Eh chupaam i q'iij re' re' xumol wo' chik chi elik i David chuwach i Saúl, xooj ruuk' i Aquis wilik chi reyil ar Gat.

¹¹Re' taqe rumoso i Aquis je' wili i xkiq'or reh: Re' winaq wili re' i David raj kamanoom i reey Saúl. Chi riij i winaq wili xkian kisoon xkian kitz'uuy noq xkiq'or chi je' wili: Re' Saúl jinaj miil chi winaq i xukansaj, eh re' David lajeeb' miil i xukansaj, inki taqe.

¹²Re' David xukoj rehtaal i xq'orarik chi riij ruum i re' ma' k'isiin ta xyojik chuwach i Aquis reey ar Gat.

¹³Ruum aj re' noq wilik chikiwach i David xujal wach i runa'ojb'al je' ti chik yojeel paam i naah xub'an riib' xtohq'ik taqe rutz'ihb'aam wach taqe i ookb'al reh i tinamit, eh ma' k'isiin i riis chii' xelik chaloq xut'aqsaj i rusinchii'.

¹⁴Noq xrilow chi je' re' i Aquis je' wili xuq'or keh i raj kamanoom: Re' winaq wili ahqaal ¿Chib'ih reet noq i nak'am taq cho weh?

¹⁵¿Mi koruman chi weh re' i ahqaal ruum i nak'am taq cho weh ayu' reh chi xchalik rub'an rahqalil panupaat? inki.