Read Poqomchi 1 Sam 24 Bible Online

1 Sam 24 - Poqomchi bible

1 Sam 24

¹Noq xukohlaaj chee q'aq'inik i Saúl kuuk' i aj filisteo xkiq'or reh chi re' David ar wilik chupaam i chiq yuuq' En-gadi.

²Noq xrib'iraj chi je' re' i Saúl xusik' wach ixib' miil chi soldado chi kixilak i aj Israel, xooj chusik'ariik i David je' wo' taqe i winaq ruch'ihil chupaam taqe i paat ab'aj nah yuuq' wilkeeb' wii' i keej.

³Eh chupaam i b'eeh xik'ik ponoq wii' i Saúl xureq taqe i kikoraal i tentzun, eh ma' naj ta ar wilik jinaj i paat ab'aj re' i rukeb'aam wii' riib' i David haa' taqe ruch'ihil xokik i koq ar i Saúl chi sa'rik.

⁴Eh re' David je' wili i xq'orarik reh kuum i ruch'ihil: Yu'naak xooj eloq wach i ruq'orom chaaweh i QaJaaw Dios, chi naa ruq'asam panaq'ab' i nixowanik awach, neerub'an chi neena a'n ruuk' i Saúl nik' wach inawaaj i hat, inki taqe. Re' David q'uunq'uun xwuktik chaloq xujil i koq riib' ruuk' i Saúl xuyok' k'isiin i runim rooq so' chi ma' reht'al.

⁵Chi riij i re' xuyot' i ránima i David chi xuyok' i rooq i runim rooq so' i Saúl.

⁶Eh je' wili i xuq'or i David keh i ru soldado: Re' ta naq i QaJaaw Dios neentoob'inik weh chi ma' nee ta nub'an ti' k'axik reh i nureey, wila' re' reh wilik chi reey iraaj ruq'orom chi re' i QaJaaw Dios xsik' wik wach, inki.

⁷Je' wili noq xuq'il taqe i ru soldado i David re' chi ma' xkikansaj taj i reey Saúl. Eh re' Saúl xelik cho chupaam i paat ab'aj chi ma' xta kian reh xuchop wo' chik reje i rub'eeh.

⁸Eh re' David xelik chaloq chupaam i paat ab'aj chi riij i Saúl, xuk'er reje chii' chi riij chuq'orariik chi je' wili: Hat qareey, hat qareey, inki. Eh re' Saúl xtz'ehtanik reje chi riij, re' David xuxuk'aa' qohoq riib' wach ak'al ye'b'al ruloq'il i Saúl,

⁹je' wili xuq'or reh: Qajaaw reey: ¿Chib'ih reet noq inanimaj keh i kiq'orik aweh chi k'ahchi' kaat nusik'im reh akanteesjiik?

¹⁰Re' hat reey xakoj chik rehtaal chi re' QaJaaw Dios xat ruq'asaj naq panuq'ab' chupaam i paat ab'aj, xa re' la' re' hin ma' xat waaj ta nukansam i hat reey xnukuy la' amahk, xnuq'or la' chi ma' xta naa kaat wuchem, eh chi re' Dios xsik' wik chaawach chi reyil.

¹¹Hat nureey chawil itz'ihy wilik panuq'ab' re' i rooq aso' xnuyok' chupaam i paat ab'aj, xub'an naq chi ar xat nukansaj. Ruuk' taqe i wili neenakoj rehtaal i hat nureey chi re' hin ma' inwaaj ta nub'anam ti' k'axik aweh, eh chi ma' k'ahchi' ta kaat nusik'im reh akanteesjiik. Re' la' hat nureey k'ahchi' kiin asik'im reh i nukanteesjiik.

¹²Re' ta naq i QaJaaw Dios neenq'atwik i q'orik chi qanaah i awach qeh i wilik ru mahk mi re' hin, oon re' hat. Re' i Dios neenq'ajwik wach aweh i k'ahchi' kaat weh, xa re' la' re' hin ma' xta naa kaat wuchem i hat.

¹³Jinaj i q'orik inkiq'or chee qamaam qati't chi je' wili: Re' taqe i ma' holohik ta kina'ojb'al re' wo' keh kib'anik i yiib' wach na'ojb'al, inki. Je' re' noq re' hin ma' xta naa kaat wuchem.

¹⁴Re' hat qajaa reey. ¿Chib'ih reet noq k'ahchi' kiin asik'im? ¿Chib'ih reet noq kinawaaj kiin akansam? Re' hin ma' xta k'isinoq kinokik wii' xa je' nukab' i kamnaq tz'i', xa je' nukab' i k'aq.

¹⁵Re' i QaJaaw Dios neenq'atwik i q'orik chi qanaah qakab'cheel awuuk' re' reh neentoob'inik weh, re' reh neenko'linik weh panaq'ab' i hat qajaa reey, inki.

¹⁶Eh noq xukohlaaj q'orik i David je' wili xuq'or i Saúl: Hat David i hat wak'uun noq wilkaat. ¿Mi re' hat i k'ahchi' kaat chi q'orik wuuk'? inki. Re' Saúl xokik chi oq'ik noq xrib'iraj i ruq'oral i David.

¹⁷Eh je' wili i xuq'or reh: Korik wo' xaq'or chi re' hin wilik numahk. Re' hat korik chi panotob'il wilkaat wuuk', eh re' hin ma' holohik taj k'ahchi' kiin aweh.

¹⁸Yu'naak i hat xak'uhtaaj chik weh chi korik chi wilkaat panotob'il wuuk', ruum re' QaJaaw Dios xiruq'asaj naq panaq'ab', eh re' hat ma' xinakansaj taj.

¹⁹Xti korik chi ma' awach ta jino'q neemb'anik chi nee rureq i nixowanik wach, eh nee wo' chik i rukanaa' chi neenooj chi ma' xta neruchej. Re' ta naq i Dios neen ye'wik jilow aweh i otob'il xa a'n weh yu'naak.

²⁰Re' hin xnukoj rehtaal chi korik chi re' hat naa akahniik chi reyil chikinaah i aj Israel. Eh panab'ihnaal i hat naa ruwihiik rajaawriik i tinamit Israel.

²¹Xa re' i nupahqaaj otob'il aweh chi cha q'or weh i xti korik parub'ihnaal i QaJaaw Dios chi ma' naa ta sacham kiwach taqe i wiih numaam na'chub'an, eh chi ma' nee ta nasach wach i kib'ihnaal i nutuut wajaaw, inki.

²²Re' David xuq'or wo' korik reh i Saúl chi ma' naa ta rukansam taqe i riih rumaam, eh re' reey Saúl xooj chupaam i paat i rub'an wii' i taaq'anik. Eh re' David ruch'ihil taqe i ru soldado xiooj wo' chik chupaam i ye'aab' kikeb'aam wii' kiib'.