Read Poqomchi 1 Sam 25 Bible Online

1 Sam 25 - Poqomchi bible

1 Sam 25

¹Noq xkimik i Samuel chu'nchel i aj Israel xkimol kiib' xi okik chi oq'ik. Eh ar xkimuq'aa' chupaam i ruye'aab' Ramá. Chi riij i re', re' David xooj chupaam i chiq yuuq' ar Parán.

²Eh jinaj i winaq Nabal rub'ihnaal q'e' b'ehoom aj Maón xwihik rak'aal ar Carmel, ixib' miil i rutentzuun, eh jinaj miil i rukaprax. Eh pan jinaj q'iij k'ahchi' ruyok'om i rismaal riij i rutentzuun ar Carmel.

³Re' Nabal re' re', re' ruuk' taqe i riih rumaam Caleb. Re' Nabal kowlaj winaq, josq' wo' hoq. Eh re' i rehk'een Abigail i rub'ihnaal q'e' holohik, eh wilik runa'ojb'al.

⁴Noq wilik chee David chupaam i ye'aab' chiq yuuq' xrib'iraj chi k'achi' ruset'em i riij i rutentzuun i Nabal.

⁵Eh xuyuq'eej ruuk' taqe i lajeeb' chi k'ijool je' wili xuq'or keh: Yu'naak naa taq awojiik ruuk' i Nabal ar Carmel, nee taq i nayeew rusuqkiil ruk'ux panub'ihnaal i hin.

⁶Je' wili i neenaq'or reh: Re' ta naq i suq kiil k'uxliis neen wihik awuuk' i hat, kuuk' awach aweh, kuuk' chu'nchel i chib'ih aweh.

⁷Re' hin xb'iraj rib'iral chi k'ahchi' aset'em i riij taqe aatentzuun, eh re' taqe i cha'jen keh aachikoop xi wihik wuuk' ar Carmel. Noq xi wihik wuuk' ma' xnujot ta taqe ma' xta wo' hoq i xwelq'aaj keh.

⁸Eh chapahqaaj keh amoso, re' keh neenkiq'or aweh i nuq'or. Eh re' hin i nutaq'aaj reje awuuk' taqe i k'ijool wili chi taqarik, nee ta tinak'ul taqe chaloq pansuqkiil k'uxliis. Neeta tiinayeew cho keh i waj taqareel chib'ih jariik i wilik awuuk', eh weh wo' hoq i hin, hin awak'uun noq wilkiin, inki reje i David.

⁹Re' taqe i k'ijool xutaq'aaj reje i David xiooj wo' hoq, eh xkiq'or chu'nchel i kitaqariik reh i Nabal. Eh noq kiq'orom chik xi okik chi ruyub'jiik chib'ih naa kichaq'weesjiik wii'.

¹⁰Eh re' Nabal je' wili kichaq'weesjiik xub'an: ¿Awach i winaq re' re'? ¿Awach i David i rak'uun i Isaí taq inaq'or? Chupaam taqe q'iij yu'naak yohb'aal kiwach taqe i moso xaloq'ooj, eh elik inki a'n chuwach i kipatroon.

¹¹¿Mi neerub'an re' chi nee nuq'uch i kiwa' kihaa' i kitiib' i numoso kiyok' wiik rismaal taqe i nutentzuun, eh keh chik i ma' weht'al taj aha' kichalik neenuyeew reje? inki.

¹²Noq xkib'iraj chi je' re' i k'ijool xi sutinik wo' chik reje ruuk' i David xkiq'or ponoq reh chu'nchel i xq'orarik keh ruum i Nabal.

¹³Eh re' i David je' wili i xuq'or keh i rumoso: Chachop taq aq'as laj ch'ihch', inki. Eh chi kunchelaal xkiyeew nah kituuq i kiq'aslaj ch'ihch'. Re' David xuchop wo' reje i ruq'aslaj ch'ihch' i reh. Eh kijib' siento chi soldado i xuk'am reje chi riij noq xooj ruuk' i Nabal, eh kiib' siento i xi kahnik chi cha'jen reh i chib'ih keh.

¹⁴Xa re' la' jinaj keh i rumoso i Nabal xooj ruq'or reh i Abigail i rehk'een i Nabal chi je' wili: Ko chupaam i ye'aab' chiq yuuq' xutaq'aaj chee taqareel i David chi ruye'ariik rusuqkiil ruk'ux i qapatroon, xa re' la' re' reh pan josq'iil xchaq'wik reje.

¹⁵Xanaah re', re' taqe i winaq re' re' q'e' taqe atoob' quuk' nik' najtiil xooj wihik cho ruuk' panab'iix ma' nik' ta xoj kijot' ma' nik' ta wo' xkiq'uch chib'ih qeh.

¹⁶Re' la' keh xiko'linik qeh i hoj chi q'iij chi aq'ab', eh kiko'leej wo' taqe i qatentzuun.

¹⁷Xa re' la' re' ab'ahiil i hat q'e' josq' ma' raaj ta chi awach inq'orinik reh. Re' hat cha kapaaj riij chi korik cha sik' chi riij i naa a'nam, ruum xti korik chi wilik i ti' k'axik naa ruchaliik chinaah ab'ahiil, je' wo' chikinaah i awach reh, inki.

¹⁸Eh re' i Abigail xa chi jumehq'iil xumol wach i kiib' siento chi kaxlanwi'k, eh kiib' koxtaal tz'uhuum i riis uuva, eh ho'oob' i b'ahoj tentzun. Eh kiib' nimaq chakach inaq'wach trigo k'ilimaj, jinaj siento i suq laj kaxlanwi'k uuva korjinaq wii', eh kiib' siento i suq laj kaxlanwi'k higo korjinaq wii' chi riij i re' xuyeew reje chu'nchel chi riij i b'uurux.

¹⁹Eh je' wili i xuq'or reje keh i rumoso: Hiy taq i hat chi peet b'eeh re' hin nee taq tinureq reje wach b'eeh, inki. Re' xub'an re' re' ma' xuq'or ta reh i rub'ahiil.

²⁰Eh re' Abigail xjotik reje chi riij jinaj i b'uurux chi ma' ehtalimaj noq johtik i rub'an chinaah i yuuq' chi ma' reht'al xrilow reje wach i David chalik i rub'an ruch'ihil taqe i ru soldado, eh re' reh xooj chi k'ulariik.

²¹Re' David k'ahchi' naq cho rukapaam chi xama' xta nkih chi xuko'leej riij chupaam i ye'aab' chiq yuuq' i chib'ih reh i Nabal, eh chi ma' xuq'uch taj i chib'ih reh, ruum re' Nabal ruuk' i yiib' wach na'ojb'al xutoj riij i otob'il xb'aan reh.

²²Ruum aj re' i ruk'ul chi re' i QaJaaw Dios neen ye'wik weh chi tojariik i numahk wila' xukanaa' chi kok'achalkeeb' noq neensaq'ik taqe awach reh i Nabal, inki.

²³Eh re' i Abigail reh noq xrilow wach i David xqajik chi riij i rub'uuruux xupach'aa' qohoq riib' wach ak'al k'uhtb'al reh chi xuyeew ruloq'il.

²⁴Eh xukut i koq riib' wach'ehk i David je' wili i xuq'or reh: Neerub'an chi neenkahnik wach nunaah i hin i mahk xub'an i nub'ahiil, xa re' i nupahq'aaj aweh chi chayeew q'ab' weh chi nee nub'an nuk'utaaj awuuk', eh nee ta tinab'iraj weh chib'ih i naa nuq'orom aweh.

²⁵Eh ma' ta tiinenayeew panak'ux i xuq'or aweh i winaq re' re' ma' holohik ta runa'ojb'al. Re' Nabal xkiyeew wo' naq ruloq'il i rub'ihnaal xa re' la' re' reh ma' xta runa'ojb'al pank'aah inq'orik. Eh re' hin, i hin awaj kamanoom ma' xwilow ta kiwach i xataq'aaj taqe reje chi awaj taqareel.

²⁶Re' hin xti korik chi re' i QaJaaw Dios ma' xuyeew ta q'ab' aweh chi xat chalik chi kansanik chi re' hat naa aq'atwiik i q'orik xachawib'il awiib'. Inko'q ta naq i QaJaaw chu'nchel i ki-ixowanik awach inkaaj akanteesjiik eliik ta naq wach i ti' neen kik'ul ruuk' i Nabal.

²⁷Re' hin i nuq'or aweh chi re' taqe i chib'ih jariik xchalik nusiij aweh nee ta tii nach'aq taq chawach kuuk' taqe amoso ki uhch'ihlinik aweh.

²⁸Eh nee ta tinakuy numahk i hin, hin ixoq awaj kamanoom wila' ximahkunik chawach, re' hat junelik naa kaat rutob'eem i QaJaaw ruuk' i rajaawriik. Ruum re' hat k'ahchi' achopom ak'ux chi ko'ljiik riij, runimjiik i QaJaaw. Eh chu'nchel aak'achariik ma' xta ti' naawilom wach.

²⁹Eh wila' awach insik'wik aweh i hat reh akanteesjiik re' i QaJaaw Dios neenko'linik riij ak'achariik. Re' taqe i ki-ixowanik awach i hat naa kiq'ehb'iik reje wulu' naa rub'aan keh ruum i QaJaaw je' rukab' noq inkutarik reje jino'q ab'aj ruuk' tolo'x.

³⁰Eh noq naa rojiik eloq wach i q'e' holohik ruq'orom cho chawiij i QaJaaw Dios, re' noq naa kaat rukojom chi kireey i aj Israel.

³¹Ma' naa ta rutib'iik ak'ux ma' naa ta ruchaliik ruyot'kiil awánima ruum ma' awach taj i xakansaj chi ma' xta ru mahk. Eh chi ma' xa a'n ta jilow i yiib' wach xkian aweh. Noq naa ruye'em awajaawriik i QaJaaw Dios k'oloq panak'ux i xnuq'or aweh i hin, hin ixoq amoso, inki.

³²Re' David je' wili ruchaq'weesjiik i Abigail xub'an: Neeta naq inye'arik ruloq'il i QaJaaw Dios xtaaq'anik chaaweh chi nuk'ulariik.

³³Eh nee ta wo' naq tikuxesjik chee hat ruuk' aha' wilik i holohik inakapaaj xa awuum chik i hat ma' naa ta wojiik chi kansanik ar, eh chi naa rojiik nuq'ajam wach i hin chi wib'il wiib' i yiib' wach xb'aan weh.

³⁴Re' hin i nuq'or aweh i korik parub'ihnaal i QaJaaw qaDios i hoj, hoj aj Israel. Re' hin ma' naa ta nub'anam i ti' k'axik aweh, wita ma' xanik'eej chaq'iij chi chalik chi nuk'ulariik i iqal ma' k'achlik ta naq chik i Nabal ab'ahiil, eh ma' jino'q naq chik i winaq wilik ruuk' naa rukahniik chi k'achlik, inki.

³⁵Eh re' David xik'ul wo' reh i Abigail taqe xk'amarik reje reh, je' wili i xuq'or reh: Neerub'an chi neetisutinik reje panapaat chi suq ak'ux. Re' hat xakoj chik rehtaal chi xb'iraj aweh aha' wilik taqe i xaq'or weh, eh xnuk'ulaa' wo' aweh taqe i xapahqaaj weh.

³⁶Eh noq re' i Abigail xponik parupaat i rilow i Nabal i rub'ahiil k'ahchi' chi ninq'ijinik, je' rukab' i ruk'ul chi reh jino'q i reey. Eh xiik' naah suq kiil ruk'ux, eh kamnaq xohk'reel, je' re' noq re' i Abigail ma' xta xuq'or reh koxruy-eej chi junwaar.

³⁷Eh chi junwaar noq ik'inaq chik i ruxohk'riik i Nabal. Xq'orarik reh ruum i Abigail i rehk'een chu'nchel i chib'ih xk'ularik. Noq xrib'iraj i Nabal chi je' re' xanoq wo' xq'ehb'ik wach ak'al, eh xsikrik i ruti'jolal.

³⁸Eh lajeeb' q'iij-oq chik rik'iik i re' xehteesjik chee ruk'achariik i Nabal ruum i QaJaaw Dios, xkimik reje.

³⁹Noq xrib'iraj i David chi xkimik i Nabal je' wili xuq'or: Loq'imaj ta naq i QaJaaw Dios ruum re' reh xb'anik jilow reh i Nabal i ma' holohik taj xub'an weh. Eh xi ruko'leej chuwach i rub'anariik i ma' holohik taj xuyeew wo' chutojariik i ru mahk i Nabal chi riij i xub'an, inki. Chi riij i re', re' David xutaq'aaj reje ruq'orariik reh i Abigail chi raaj rub'anam kaxáro ruuk'.

⁴⁰Noq xi ponik taqe i rumoso i David ar Carmel chi q'orob'jiik i Abigail je' wili xkiq'or reh: Re' David xooj rutaq'aaj cha wuuk' chuq'orariik aweh chi raaj b'ila' kaxáro awuuk', inki taqe.

⁴¹Eh re' i Abigail xupach'aa' qohoq riib' chikiwach xuyeew kiloq'il je' wili xuq'or: Re' hin xa hin tii jinaj raj kamanoom i David, neerub'an chi nee kinkahnik chi hin tz'ajal reh i rooq i rumoso i David wila' je' re' i xraaj wuuk', inki.

⁴²Eh noq ruq'orom chik taqe i re' i Abigail xuyejaa' riib' chi jumehq'iil ruch'ihil i ho'oob' chi ixoq re' taqe i rumoso, xjohtik reje chi riij jinaj i b'uurux xooj chi riij taqe i rumoso i David. Eh re' David xub'an wo' kaxáro ruuk' i Abigail.

⁴³Re' David rub'anam wo' kaxáro ruuk' i Ahinoam pampeet ar inchalik Jezreel kikab'cheel xi kahnik chi rehk'een.

⁴⁴Re' Saúl ruye'em wo' chee rixq'uun Mical i rub'ihnaal chi rehk'een i David. Re' Saúl xumin chupaam i rixq'uun re' re' chi xub'an kaxáro ruuk' i Palti rak'uun i Lais Galim i rutinamiit.