Read Poqomchi 1 Sam 28 Bible Online

1 Sam 28 - Poqomchi bible

1 Sam 28

¹Pan jinaj q'iij xkimol kiib' i ki soldado i aj filisteo reh ojik chi q'aq'inik kuuk' i aj Israel. Eh re' i reey Aquis je' wili i xuq'or reh i David: Re' hat awuch'ihil taqe aa soldado naa awojiik chi wiij chi q'aq'inik, inki.

²Re' David je' wili i xuq'or: Re' hoj, i hoj awaj kamanoom ar naa anab'eem chib'ih qohchol rub'aan, inki. Eh re' i Aquis je' wili xuq'or reh i David: Re' hat naa kaat nupab'aam chi k'amal kib'eeh taqe i nu soldado kicha'jinik weh, inki.

³Chupaam i q'iij re' re' kamnaq chik i Samuel, eh chu'nchel i aj Israel xioq'inik reh i rukimiik. Eh kimuq'aam chik parutinamiit ar Ramá. Re' Saúl rukaham chik taqe reje pan kitinamiit i aj q'iij, je' wo' taqe i kiq'orinik keh i kamnaq.

⁴Re' taqe i aj filisteo xkimol reje kiib' xooj kiyejaa' ki-itz'ihy naah paat ar Sunem. Eh re' Saúl xumol wo' kiwach chu'nchel i aj Israel xooj kimol kiib' ar Gilboa.

⁵Noq xrilow reje i Saúl i ki-itz'ihy naah paat i aj filisteo, ma' k'isiin ta xyojik, eh xsahchik ruk'ux.

⁶Eh re' i Saúl xupahqaaj reh i Dios, xa re' la' ma' xchaq'weesjik ta ruum i Dios, ni xata paruwiriik xk'uhtjik reh, ni xata ruuk' i rukojariik i Urim, ni xata re' taqe i jalal ruq'oral i Dios xq'orarik reh.

⁷Ruum i re' je' wili i xuq'or i Saúl keh i rumoso: Yu'naak taq i hat hiy taq cha sik' jino'q weh ixoq inq'orik kuuk' i kamnaq reh chi re' hin neenooj nupahqaaj reh chib'ih naa nub'anam. Re' taqe rumoso je' wili ruchaq'weesjiik xkian: Ar Endor wilik jinaj ixoq i ruq'oreej taqe kamnaq, inki taqe.

⁸Eh re' reey Saúl tokoom i ruso' xukoj reje re' naq iraaj chi ma' xnaab'jik ta wach, kiib' i rumoso xiooj chi riij noq xooj chaq'ab' chi q'orob'jiik ixoq re' re', je' wili i xuq'or reh: Re' hin i nupahq'aaj otob'il aweh chi neenaq'ijej weh i ránjel rut'osil awach i neenuq'or aweh i hin, inki.

⁹Re' ixoq je' wili xuq'or: Re' hat Saúl aweht'al chib'ih i xa a'n noq xawesaj taqe chaloq i aj q'iij panatinamiit je' wo' taqe inq'orinik keh i kamnaq. ¿Chib'ih reet noq kinamin chupaam jinaj i na'ojb'al nee kinkanteesjiik ruum? inki.

¹⁰Eh re' Saúl je' wili i xuq'or: Re' hin xti korik i nuq'or aweh parub'ihnaal i QaJaaw chi ma' xta neenb'aan aweh ruum i re'.

¹¹Re' ixoq i je' wili xuq'or reh i Saúl: Awach i kamnaq inawaaj chi nee nuq'oreej aweh, inki. Inwaaj chi nee naq'oreej weh i kamnaq Samuel, inki noq chaq'wik i Saúl.

¹²Re' ixoq xuk'uhtaaj riib' i Samuel chuwach, eh xuk'er chii' ruum ruyo'jiik, je' wili i xuq'or: ¿Chib'ih reet noq xinajot' i hat reey Saúl? inki.

¹³Eh re' Saúl je' wili xuq'or: Maa yohb'isaj awiib' cha q'or weh ¿Chib'ih jariik i k'ahchi' awilom wach? inki. Re' ixoq je' wili i xuq'or: Re' hin xwilow chi elik i rub'an cho panak'al i je' ruwii' dios, inki.

¹⁴Eh re' reey je' wili i xuq'or reh ixoq: ¿Nik' wach ruwii' xawil? inki. Je' ruwii' mama' winaq wilik i ruso' xarutak'aam chi riij, inki, ixoq. Re' Saúl xureq chi riij chi re' i kamnaq Samuel, ruum i re' xupach'aa' qohoq riib' wach ak'al korehtaal xureq wach aak'al ruuk' i yejal wach.

¹⁵Re' Samuel je' wili i xuq'or reh i Saúl: ¿Chib'ih reet noq kiinajot' eh kinaq'oreej cha yu'? inki. Re' Saúl je' wili xuq'or: Re' hin q'e' ti' k'ahchi' nuk'ulum re' taqe i aj filisteo k'ahchi' keeb' chi q'aq'inik wuuk'. Eh re' hin i nupahqaaj naq ree Dios chib'ih i naa nub'anam, ma' xiruchaq'weej taj, ni xata panuwiriik xuk'uhtaaj cho weh, ni xata ruuk' kichii' taqe i jalal ruq'oral, ruum i re' xat nuq'oreej i hat reh chi nee naq'or weh chib'ih i naa nub'anam, inki.

¹⁶Eh re' Samuel je' wili i xuq'or: ¿Chib'ih reet noq inapahqaaj weh i hin? Re' hat aweht'al chik chi xat rukanaa' cha wutkeel i Dios xsutinik chi ma' raaj ta chik awach, inki.

¹⁷Re' QaJaaw Dios k'ahchi' rub'anam chaa wuuk' i ruq'orom chaloq re' i xnuq'or aweh i hin ruuk' nuchii'. Re' reh xq'uchwik awajaawriik chi reyil re' chik i David awuch'ihil xuyeew rajaawriik chi reyil.

¹⁸Re' hat ma' xanimaj taj i ruk'uhb'aal i QaJaaw Dios, eh ma' xa a'n ta wo' hoq noq xuq'or aweh chi naa asacham kiwach taqe i aj Amalec ruum i re' xresaj awajaawriik chi reyil yu'naak.

¹⁹Re' QaJaaw Dios naa kaat ruq'asam i hat awuch'ihil taqe i awuch aj Israel pan kiq'ab' i aj filisteo. Eh re' hat awuch'ihil taqe aawak'uun naa awihiik wuuk' i iqal Re' i QaJaaw Dios naa wo' rukanaam pan kiq'ab' i aj filisteo aa soldado taq i hat aj Israel, inki.

²⁰Re' Saúl q'e' wo' naq nimlaj winaq ma' k'isiin xyo'jik noq xrib'iraj chib'ih i xuq'or i kamnaq Samuel. Xqehb'ik wach ak'al, xama' xta chik k'isinoq raansil ruum ma' runik'eem ta naq chik wach ruwa' ruhaa' chi q'iij chi aq'ab'.

²¹Eh noq xrilow ixoq chi ma' xta chik k'isinoq raansil i Saúl xujil i koq riib' ruuk' je' wili xuq'or reh: Re' hat reey re' hin, hin amoso xnub'an aha' wilik i xaq'or weh atoob' ta xnuyeew wiib' pankimik chub'aan.

²²Eh re' hin i nuq'or aweh chi chak'ulaa' i naa nuq'orom aweh. Re' hin neenuyeew k'isinoq awa' ahaa' reh chi neen k'ulik ak'ux reh chi nee tiooj chawach ruuk' ab'eeh, inki.

²³Re' Saúl ma' xraaj ta naq rub'anam ruwa' ruhaa', xa re' taqe i kikamanik ruuk' ruch'ihil ixoq kow xkiq'or reh chi xub'an ruwa' ruhaa'. Je' re' noq xwuktik johtoq wach ak'al xutzunaa' riib' nah ch'aht.

²⁴Eh re' ixoq xukansaj i jinaj q'ina' laj k'isa wakax wilik parupaat. Eh xuyuq' paam i arina reh chi xuyejaa' jinaj i suq laj kaxlanwi'k.

²⁵Chi riij i re' xuk'am reje reh i reey Saúl je' wo' keh i kikamanik ruuk' reh chi xkik'ux. Eh noq kianam chik kiwa' kihaa' xiooj chupaam aq'ab' re' re'.