Read Poqomchi 1 Sam 29 Bible Online

1 Sam 29 - Poqomchi bible

1 Sam 29

¹Re' taqe i aj filisteo xkimol wach i ki soldado ar Afec. Eh re' taqe i aj Israel ar xkimol kiib' Jezreel wilik wii' i k'achlik haa'.

²Eh noq re' taqe i k'amal b'eeh chi kixilak i aj filisteo chi q'aq'inik chi kich'uhqaal wilik jinaj miil chi kiib' i soldado, wilik i jinaj siento chi kiib'. Eh re' David ruch'ihil taqe i ru soldado xam b'eeh taqe reje ruch'ihil Aquis.

³Re' taqe k'amal kib'eeh i aj filisteo je' wili i xkiq'or: ¿Chib'ih inki a'n ayu' i aj hebreo wili? inki taqe. Re' reey Aquis je' wili i xuq'or: ¿Mi ma' nawil re' chi re' i David i wili i raj kamanoom naq i Saúl wilik chi reyil ar Israel? Re' reh wilik q'iij, wilik haab' rokiik wuuk', ma' xtaj i yiib' wach rub'anam i ruq'ahxiik cho wuuk' ayu', xa ko je' wo' yu'naak, inki.

⁴Xa re' la' re' taqe i k'amal kib'eeh i aj filisteo chalik kik'aah chinaah i Aquis je' wili xkiq'or reh: Re' hat cha q'or reh i David chi sutinoq reje chupaam i ye'aab' xayeew reh ma' ruk'ul taj chi nenooj chiqiij panq'aq'inik, ruum nee-oq inche sutinik chi ixowan qawach panq'aq'inik. Ru q'iij re' k'ahchi' rusik'im chi naakooj rukansam i hoj, noq neerib'iraj i ru reey neensuuqb'ik ruk'ux neenk'amarik pansuqkiil ruum.

⁵Re' hoj qeht'al chi chi riij wo' i David wilik xkian kisoon kitz'uuy noq xkiq'or chi je' wili: Jinaj miil xukansaj i Saúl, eh lajeeb' miil i xukansaj i David, inki taqe.

⁶Eh noq xrib'iraj chi je' re' i reey Aquis xuyuq'eej ruuk' i David je' wili xuq'or reh: Re' hin parub'ihnaal i k'achlik Dios i nuq'or aweh i korik chi q'e' imponik chi nuwach ana'ojb'al i na a'n jank'al ti chalik wuuk' ayu'. Re' hat ma' xtaj i yiib' wach a'nam chi nuwach, xa re' la' ma' suq tankilow i aj filisteo chi wilkaat ayu'.

⁷Yu'naak neerub'an chi nee wo' chik tiooj pana ye'aab' chi suq ak'ux reh chi ma' xtaj i neen qa'an chi ma' nee ta imponik chikiwach i re', inki.

⁸Eh re' David je' wili i xuq'or reh i Aquis: ¿Chib'ih jariik i ma' holohik taj nub'anam? ¿Chib'ih jariik i nub'anam i nuchaliik awuuk' chi ma' nee ta ruyee riib' chi nee kinooj chi q'aq'inik kuuk' i ki-ixowanik awach i hat wajaaw i nureey? inki.

⁹Re' i Aquis je' wili i xuq'or reh i David: Korik re' hat q'e' imponik chi nuwach ana'ojb'al je' cho hat ruánjel i QaJaaw noq inwilow, xa re' la' re' taqe i k'amal kib'eeh i aj filisteo je' wili xkiq'or weh chawiij: Ma' ruk'ul taj chi neenooj chi q'aq'inik chiqiij, inki taqe.

¹⁰Je' re' noq i nuq'or aweh chi i iqal kowahq'eq xa re' wach neetiwuktik reje nee tiooj nee wo' nak'am reje chawiij taqe i rumoso aawajaaw aareey re' wo' taqe ak'amam cho chawiij, inki.

¹¹Eh kowahq'eq chi junwaar re' David xuk'am wo' taqe reje i winaq ruch'ihil xsutinik wo' chik reje pan kiye'aab' i aj filisteo. Eh re' taqe i aj filisteo xiooj reje chikiwach ar Jezreel.