Read Poqomchi 1 Sam 3 Bible Online

1 Sam 3 - Poqomchi bible

1 Sam 3

¹Re' k'isa k'ijool Samuel kamanik i rub'an parupaat i Dios re' Elí ink'amwik rub'eeh. Eh chupaam taqe q'iij re' re', re' i QaJaaw Dios ma' xata k'ahchi' taqe ruq'oreem i tinamit, eh ma' xata wo' k'ahchi' ruk'uhtaam cho keh i xa chib'ih jariik pan kisaq wiriik.

²Re' Elí rijib' chik ma' nilwik ta chik chi korik, eh pan jinaj aq'ab' yoklik paruwarb'al.

³Eh re' i Samuel reh ar yoklik chupaam i rupaat i QaJaaw Dios re' wilik wii' i loq'laj kaxa. Eh re' i rusaquumb'aal i QaJaaw koqoplik naq.

⁴Re' QaJaaw Dios je' wili i xuq'or chaloq: Samuel, inki. Re' Samuel je' wili chaq'wik xub'an: Ayu' wilkiin jaaw, inki.

⁵Eh re' Samuel rajimam riib' xooj ruuk' i Elí je' wili xuq'or: Ayu' wilkiin jaaw ¿Chib'ih naq inche kinawaaj wii'? inki. Re' Elí je' wili i ruchaq'weesjiik xub'an: Re' hin ma' k'ahchi' ta kaat nuyuq'eem hiy wo' chik tiyook ar, i nuchjik, eh xooj wo' chik yohkoq.

⁶Eh xq'orob'jik wo' chik cho ruum i QaJaaw Dios: Samuel, inuchjik. Eh re' Samuel xooj wo' chik rajimam riib' ruuk' i Elí: Ayu' wilkiin jaaw ¿chib'ih naq inche kinawaaj wii'? inki. Re' Elí je' wo' chik wili i xuq'or reh: Re' hin wak'uun ma' k'ahchi' ta kaat nuyuq'eem, hiy wo' chik tiyook ar, i nuchjik.

⁷Eh re' Samuel komajaa' naq i runab'eej chi re' i QaJaaw Dios k'ahchi' ruq'orinik reh, ruum komajaa' wo' naq inq'orob'jik cho juriim-oq ruum i Dios.

⁸Eh paroxpeech re' QaJaaw Dios xuq'oreej wo' chik i Samuel, eh re' Samuel rajimam wo' chik riib' xooj ruuk' i Elí je' wili xuq'or: Ayu' wilkiin jaaw ¿Chib'ih naq inchel kinawaaj wii'? inki. Xrilow chi je' re' Elí xunab'eej chi re' QaJaaw inq'orinik cho reh i k'isa k'ijool Samuel.

⁹Ruum aj re', re' i Elí je' wili i xuq'or reh: Hiy wo' chik tiyook ar wila' xat ruq'oreej chik cho junriim-oq i QaJaaw Dios je' wili ruchaq'weesjiik cha a'n: Ayu' wilkiin Jaaw hin awaj kamanoom cha q'or chib'ih i naa aq'orom, tiko'q reh, inki. Eh re' i Samuel xooj wo' chik yohkoq paruye'aab'.

¹⁰Eh re' i QaJaaw Dios xchalik ruuk' i Samuel xiq'oreej wo' chik, je' rukab' i xub'an taqe pampeet je' wili xuq'or: Samuel, Samuel, inki. Re' Samuel je' wili i chaq'wik xub'an: Jaaw re' hin, hin awaj kamanoom k'ahchi' kaat b'iram cha q'or chib'ih i naa aq'orom, inki.

¹¹Re' i QaJaaw Dios je' wili i xuq'or reh i Samuel: Re' hin jinaj i na'ojb'al naa nub'anam kuuk' i aj Israel, noq naakib'iram rib'iral naa rutib'iik i kixikin kab'chel.

¹²Chupaam ponoq i q'iij re' re' naa nub'anam ruuk' i Elí re' k'amal kib'eeh aj tiij aha' wilik i ti' k'axik nuq'orom cho rib'iral chi naakik'ulum i rak'uun je' wo' taqe i riih rumaam ma' naa tarik'iikwach.

¹³Re' hin nuq'orom cho rib'iral chi naa nuye'em taqe panti' k'axik chi juneliik i rak'uun taqe i riih rumaam i Elí ruum i yiib' wach na'ojb'al i xkian taqe i rak'uun. Re' hin naa nusacham kiwach chi jumpech ruum re' Elí reht'al wo' naq, eh ma' xuq'il ta taqe.

¹⁴Ruum aj re', re' hin nuq'orom i xti korik chi re' yiib' wach na'ojb'al xkian i rak'uun i Elí ma' jaruuj naa nukuyum, ni xata naq ruuk' k'atoj mayiij, ni xata naq ruuk' chik jino'q mayiij, inki.

¹⁵Eh re' i k'isa k'ijool Samuel xooj wo' chik yohkoq korehtaal chik saq'ik chi junwaar, eh xuteh taqe i ru puertahiil i rupaat i QaJaaw Dios, xyo'jik ma' xuk'utjaaj ta reh i Elí i xq'orarik reh parusaq wiriik ruum i Dios.

¹⁶Eh re' i Elí xuyuq'eej ruuk' i Samuel je' wili xuq'or reh: Samuel hat wak'uun noq wilkaat anq'or aweh, inki. Ayu' wilkiin jaaw, inki noq chaq'wik i Samuel.

¹⁷Eh re' Elí je' wili i xuq'or reh: ¿Chib'ih jariik i xuq'or aweh i QaJaaw Dios? Re' hin i nupahqaaj otob'il aweh chi cha q'or weh chu'nchel maakeb'aa' chi nuwach, ruum wii xakeb'aa' chi nuwach chib'ih i xuq'or aweh i QaJaaw re' reh kow i ti' k'axik naa ruye'em cho cha naah, i nuchjik.

¹⁸Eh re' i Samuel xuk'utjaaj wo' reh i Elí chu'nchel i xq'orarik reh ruum i QaJaaw Dios. Re' Elí je' wili i xuq'or reh: Chu'nchel i re', re' QaJaaw Dios xq'orik i ruk'ul chi neena a'n je' rukab' imponik chuwach i reh, i nuchjik.

¹⁹Eh re' Samuel kow johtoq ruk'iih, ma' xkanab'jik ta ruum i QaJaaw Dios xub'an wo' ruuk' chu'nchel i ruq'orom rib'iral reh.

²⁰Eh chu'nchel i aj Israel wilkeeb' chupaam i ye'aab' Dan, eh xponik ko chupaam i ye'aab' Beerseba xkireq chi riij chi re' i Samuel xti manlik jalal ruq'oral i QaJaaw Dios.

²¹Re' QaJaaw Dios xuk'uhtaaj wo' chik riib' chuwach i Samuel parusaq wiriik ar Silo. Eh ar xuq'or reh i ruk'uhb'aal. Eh re' Samuel i ruq'or wo' chik keh i aj Israel i xq'orarik reh ruum i QaJaaw Dios.