Read Poqomchi 1 Sam 31 Bible Online

1 Sam 31 - Poqomchi bible

1 Sam 31

¹Re' taqe i aj filisteo xkian i q'aq'inik kuuk' i aj Israel. Eh re' aj Israel xkimol chi elik chikiwach. Eh ma' k'isiin i aj Israel xkikansaj chinaah i yuuq' Gilboa.

²Re' taqe i aj filisteo xkajimaj reje i Saúl eh xkikansaj ixib' chi rak'uun, je' wili kib'ihnaal: Jonatán, Abinadab, Malquisúa.

³Eh chayeew i peleto inki a'n reje chi riij i Saúl, eh re' taqe i aj filisteo xkireq ruuk' kiflecha i Saúl, eh ma' k'isiin ta xchalik ruyo'jiik.

⁴Eh je' wili i xuq'or reh ink'amwik reh i ruch'ihch': Kinakansaj i hat ruuk' ach'ihch'. Re' hin ma' inwaaj ta chi re' taqe i aj filisteo aj mahk neekikansanik weh, eh nee kinkikaqse'laaj, inki. Eh re' ink'amwik reh i ruch'ihch' ma' xraaj taj ruum ma' k'isiin i ruyo'jiik. Eh re' i Saúl xuchop i ruq'aslaj ch'ihch' xukut riib' chinaah.

⁵Noq xril chi xkimik i Saúl ink'amwik reh i ruch'ihch' xukut wo' riib' i reh chinaah ruq'aslaj ch'ihch', junkimiik ruuk' i Saúl noq xkimik.

⁶Je' re' i kimik xuk'ul i Saúl chupaam i q'iij re' re' ruch'ihil taqe ixib' chi rak'uun, ruch'ihil ink'amwik reh i ruch'ihch'. Eh xikimik wo' chu'nchel i winaq ruch'ihil.

⁷Eh re' taqe i aj Israel wilkeeb' juntar yuuq' wilkeeb' chi juntar i nim ha' Jordán. Xkilow chi re' i ki soldado i kuch aj Israel xkimol chi elik. Eh xkib'iraj chi xkimik i Saúl ruch'ihil taqe i rak'uun, re' keh xkikanaa' kahnoq i kitinamiit xkimol chi elik. Re' chik taqe i aj filisteo xi okik chi patinik pan kiye'aab'.

⁸Eh chi junwaar chik re' taqe i aj filisteo xiooj chi rumolariik i chib'ih keh i kamnaq. Eh xponik kireq i ruti'jolal i Saúl ruch'ihil taqe i kiti'jolal i ixib' chi rak'uun chi kutulkeeb' chinaah i yuuq' Gilboa.

⁹Eh xkiyok' i ralaq i Saúl xkik'am reje taqe i ruch'ihch' reh q'aq'inik, eh xkitaq'aaj i taqareel chupaam chu'nchel i kitinamiit i aj filisteo reh chi naa kiq'orom rib'iral ar chib'ih i xk'ularik eh xkiq'or wo' rib'iral chupaam i rupaat i kitz'aqoj tiyoox.

¹⁰Chi riij i re' xkit'uyaa' i ruq'aslaj ch'ihch' i Saúl chupaam i rupaat i kitz'aqoj tiyoox Astarot. Eh xkit'uyaa' i ruti'jolal chinaah i koraal tz'aq wilik Bet-sán.

¹¹Noq xkib'iraj rib'iral taqe i aj Jabes wilkeeb' Galaad chi re' taqe i aj filisteo xkikansaj i Saúl.

¹²Chu'nchel i kowlaj winaq xkimol reje kiib', jinaj aq'ab' xib'ehik reje xponik kesaj i ruti'jolal i Saúl chinaah i koraal tz'aq Bet-sán, ruch'ihil i kiti'jolal i ixib' chi rak'uun. Eh xkik'am chaloq Jabes ar xkik'at.

¹³Eh ar xkimuq'aa' irub'aqil Jabes chi ri'sil jinaj i chee'. Chi riij i re' wuquub' q'iij ma' xkian ta kiwa' kihaa'.