Read Poqomchi 1 Sam 8 Bible Online

1 Sam 8 - Poqomchi bible

1 Sam 8

¹Noq xrijb'ik chik chi korik i Samuel xupab'aa' taqe i rak'uun chi q'ataj q'orik chinaah i tinamit Israel.

²Re' i peet rak'uun, Joel i rub'ihnaal, eh re' i chaq'b'ees Abías i rub'ihnaal. Re' taqe re' i xi wihik chi q'ataj q'orik chinaah i tinamit Beerseba.

³Xa re' la' re' taqe ak'uunb'ees re' re' ma' xkian ta chik i q'ataj q'orik je' rukab' i xub'an i kajaaw. Eh xkik'ax wach i tumiin, xkik'ul i tumiin xa ruuk' i chukuj q'orik ma' xkian taj i q'ataj q'orik parub'ehel.

⁴Xkilow chi je' re' taqe i k'amal kib'eeh i aj Israel xkimol reje kiib' xiooj chi q'orob'jiik i Samuel ar Ramá.

⁵Je' wili xkiq'or reh: Re' hat, hat chik mama' winaq. Eh re' taqe awak'uun ma' je' ta chik rukab' i hat. Je' re' noq chapab'aa' jino'q qareey reh chi re' chik i reh neenkahnik chi taaq'anik chi qanaah, je' rukab' noq wilik kireey nimaq tinamit, inki taqe.

⁶Eh re' Samuel ma' xponik ta chuwach chi xkipahqaaj reh chi naa rupaab'aam jino'q kireey chi re' chik i reey re' re' naa rutaaq'aniik keh ruum aj re' xuq'oreej i Dios parutiij.

⁷Eh re' QaJaaw Dios je' wili i xuq'or reh i Samuel: Re' hat chayeew keh i tinamit inkipahqaaj aweh chanab'eej noq ma' re' tee hat ma' ti ponik ta panaq'kiwach, re' la' hin ma' kimponik ta panaq'kiwach reh chi ma' nee ta nub'an i taaq'anik chikinaah.

⁸Xa re' wo' noq xwesaj taqe cho Egipto kitoq'aam cho rub'aan taqe i yiib' wach na'ojb'al re' re'. Eh xi k'uloq ayu' yu'naak xin kiq'eb' chi riij kik'ux. Xa k'ahchi' wo' cho kiloq'em i tiyoox, je' wo' re' i k'ahchi' keeb' aweh i hat yu'naak.

⁹Je' re' noq chayeew keh inkipahqaaj aweh: Xa re' la' xti cha q'or rikorkiil keh chib'ih i naa kianam, eh nik' wach i wihik chi ri'sil i rajaawriik jino'q i reey, inki.

¹⁰Eh re' Samuel xuq'or keh i tinamit k'ahchi' kipahqaam kireey chu'nchel i xuq'or i QaJaaw Dios.

¹¹Re' Samuel je' wili i xuq'or keh: Re' i naa rokiik chi reyil taq cha naah, je' wili i naa rub'anam taq awuuk', wilik taq aawak'uun naa rukojom chi soldado hiil, wilik i naa rukojom chi b'ehik pan kareta, wilik naa rukojom chi b'ehik chi riij taqe kawáyu, wilik i naa rukojom chi b'ehik chi kooq naa kojiik chi peet b'eeh chuwach i rukareta.

¹²Eh wilik i naa rukojom chi k'amal kib'eeh i jinaj miil chi soldado, eh wilik i naa rukojom chi k'amal kib'eeh i lajeeb' roxk'ahl chi soldado Eh wilik taq aweh i hat i naa rukojom chi b'anaj arado parak'aal, eh chi molariik taqe i wach i rutik. Wilik i naa rupab'aam chi ruyejeb'jiik i kareta taqe i tz'a'amb'al reh q'aq'inik.

¹³Eh wilik awixq'uun naa rukojom chi ye'jan reh ink'ohnik laj iq'oom eh naa rukojom chiyej-an ruwa', eh naa taqe rukojom chiyej-an rukaxlanwi'k.

¹⁴Eh naa ruchopom kinaah taqe i xti holohaq ak'al, naa wo' ruchopom naah taq aholohaq uuva, je' wo' taq aholohaq chee' olivo. Eh naa ruq'asam keh taqe naa kiwihiik chi kamanik ruuk'.

¹⁵Eh naa taq kaat ruminim chupaam chi naa taq aye'em i jinaj libra naa taq awesam chinaah i lajeeb' libra i wach taq atik, je' wo' re' i naa rub'anam ruuk' i wach taq aa-uuva, naa ruye'em keh i raj kamanoom.

¹⁶Re' reey re' re', naa wo' ruq'uchum taq aweh taqe amoso winaq, je' wo' taqe amoso ixoq. Eh naa wo' ruq'uchum aweh taq i holohaq b'ooyax je' wo' taq aholohaq b'uurux naa rukojom taqe chi kamanik.

¹⁷Eh wila' wilik lajeeb'-oq taq aachikoop jinaj i naa ruq'uchum taq aweh. Eh naa wo' taq kaat ruminim parukamaj i reh.

¹⁸Re' taq i hat naa taq awoq'iim ruum i ti' k'axik naa rub'anam taq aweh i reey naa taq asik'im wach, naa naq taq chik apahqaam otob'il reh i QaJaaw Dios xa re' la' re' reh xama' naa ta wo' chik taq kaat rutob'eem, inki.

¹⁹Eh re' taqe i tinamit ma' xkiyeew ta rajaawriik i xq'orarik keh ruum i Samuel, je' wili i xkiq'or: Re' hoj ma' xta nqaaj reh, inqaaj la' chi nee napab'aa' jino'q qareey.

²⁰Chi je' re', re' chik i reh neenkahnik chi taaq'anik chi qanaah, eh nee ruk'am qab'eeh panq'aq'inik je' rukab' noq kitaq'ab'jik i tokoom tinamit ruum i kireey, inki taqe.

²¹Eh noq xrib'iraj i Samuel chi je' re' i xkiq'or i tinamit Israel xuq'or wo' chik reh i Dios parutiij.

²²Eh je' wili xq'orarik reh ruum i QaJaaw Dios: Chayeew keh inkipahqaaj aweh chapab'aa' jino'q kireey. Chi riij i re', re' Samuel xuq'or keh chu'nchel i aj Israel chi kisutinoq reje chi kiju'junaal chupaam i kiye'aab' xi chalik wii'.