Read Poumei Naga SHURAI 11 Bible Online

SHURAI 11 - Poumei Naga bible

SHURAI 11

¹Arai hi deiphao mai hrülai hai khola ali baie.

²Maihrü hai teinghi palova hrüsho poa veyu phaki, puletao nou Shinar (Babilon) hinou deikho ali ngaoloua sühinou füsho loure.

³Puletao hai alinou alihi haibüa paoe, “Khe Etao konai taoloua mei deithou naichuh soulou laikhe.” Sübüa puletao nou naichuh souloure alia süna mea loure chuhnai-a souloure.

⁴Süthaisü puletao nou paoe, “Etao nuhdu ali soushu loua sühinou ratei khe nghiyu kipeitaoh ali soulou laikhe, alia sükua Etao kathe souloua deiphao holo hailo ratalai mokhe.”

⁵Süthaisü MAPAO nou takou deiphao mainou soukhai touyu nuhdu ae kipeitaoh nasü zhuloua,

⁶haibüa paoe, “Zhukhaio, puletao hai maitya ali baie ae la-a ali baie, alia haisü puletao nou soupfüa koulaiyu taohi soushu araina bai hie; puletao nou soulai tea lichoyu nasü soulou hoyu hashu laire.

⁷Etao takouh loua puletaoye panou alinou ali la sülou hore donou puletao la hai soubüsa peilai khe.”

⁸Sübüa nou MAPAO nou puletaoye deiphao holo hailo pora tare alia puletao nou nuhdu soushuyu nasü thaokhaire.

⁹Süvanou haina zhih hai Babel tea sapeie, daiolouzü sühinou MAPAO nou deiphao mai la soukuku peie ae sühinou MAPAO nou puletaoye deiphao holo hailo pora tapeie.

¹⁰Haitao hai Shem vei tyaonah maitaoe. Shem nou po 100 payuki, dzüdu thai po ahai nahi nahpoutu ali, Arpakshad tea kuyu nahai naloue.

¹¹Süthai nou puh hai po 500 hrüloue, alia nah naotu poutu kukhea bue.

¹²Arpakshad nou po shiangou payuki nahpoutu ali Shelah tea naloue.

¹³Shelah nalouyu thai Arpakshad hai po 403 hrüloue alia puh hai nah naotu poutu kukhea bue.

¹⁴Shelah po shiangou payu phaki nahpoutu Eber naloue.

¹⁵Eber nalouyu thai Shelah nou po 403 hrüloue, alia puh hai nah naotu poutu kukhea bue.

¹⁶Eber nou po shiadai payuki, puh nou nahpoutu Peleg naloue.

¹⁷Peleg nalouyu thainou puhnou po 430 hrüloue, ae puh hai nahmai kukhea bue.

¹⁸Peleg nou po shirou payu kisü, puhnou nahpoutu Reu naloue.

¹⁹Reu nalouyu thai puhnou po 209 hrüloue, alia puh hai nahmai kukhea bue.

²⁰Reu nou po shiahai payu phaki nahpoutu Serug naloue.

²¹Serug nalouyu thai puhnou po 207 hrüloue alia puh hai nahmai kukhea bue.

²²Serug nou po shirou payu phaki nahpoutu Nahor naloue.

²³Nahor nalouyu thai puhnou po 200 hrüloue alia nahmai kukhea bue.

²⁴Nahor nou po kaikü payu phaki nahpoutu Terah naloue.

²⁵Terah nalouyu thai Nahor hai po 119 hrüloue, alia puh hai nahmai kukhea bue.

²⁶Terah nou po rainai payuki, puh nou nahpoutu haitao vei puo soure: Abram, Nahor ae Haran.

²⁷Mai haitao hai Terah vei tyaonah maitaoe. Terah hai Abram, Nahor ae Haran puoe, ae Haran hai Lot vei puoe.

²⁸Haran hai puh puo jünou rai-a puhye napeiyu buh Khaldean teidei hi Ur tea kuyu nuh hinou thaitare.

²⁹Abram ae Nahor hai kilo souloure. Abram chapfü zhih nou Sarai ae Nahor chapfü zhih hai Milkah toue. Milkah hai Haran nahnaotu paie alia Iskah hai puh puoe.

³⁰Sarai hai nahapfü ali soua nahzütou ngaolou moe.

³¹Terah nou puh nahpoutu Abram, Haran nahpoutu puh tyao Lot alia puhtyao Abram chapfü Sarai koa Khaldean teidei hinou buyu Ur nuhdu nasü thaokhaia Kanaan teidei hi holai tea tare, ana puletao nou Haran hi kouloukhaie, puletao nou sühinou füsholoua hrüe.

³²Terah nou po 205 hrüloua Haran hinou thaide.