Read Poumei Naga SHURAI 15 Bible Online

SHURAI 15 - Poumei Naga bible

SHURAI 15

¹Haina thaisü, Abram zho kounou haibüa MAPAO nou puh hi paoe, “Ngaopiso, Abram! Enou nevei rüh soupeilai, alia nevei buusü dushoa peilai.”

²Ana Abram nou chila peie, “Oh Ramai MAPAOwo, nenou ahisü daili peilai, Esü nahmai ali-a hae, ae akaa thaoresü Damaskas hi Eliezer baimowu?

³Zhukhaio, nenou Eye nahmai peimoe, akikha hinou nalouyu aqila maili nou akaa sü thaoloua bailai.”

⁴Süthaisü MAPAO nou puh hi haibüa paoe, “Ne qila Eliezer nou nekaa sü thaolai moe, lah nevei nahpoutu alinou nevei kaa nasü thao-a bailai.”

⁵MAPAO nou puhye vakou sapaloua paoe, “Teipei zhukhaio, nenou cholousüe toulouzü teihi vuhtao chokhaio, nevei tyaonah khesü panou taizhoulai.”

⁶Abram nou MAPAO ye loucheloue; alia süna vanou MAPAO nou puhye acheche mai-e tea poloue.

⁷Süthaisü MAPAO nou puh hi paoe, “E hai Khaldean mai dei Ur tea kuyu nuh nahinou neye dei haina peilai tea sapa peiyu Ramai nasüe.”

⁸Ana Abram nou paoe, “Oh MAPAO, haina hai avei soulai touyu kabüa Enou süloulai?”

⁹Ramai nou puh hi chila peie, “Eye po asü payu cholou ali, nghitu ali, ae zhaotu ali alia khao ali ae rahou ali pove peikhaio.”

¹⁰Abram nou sütaosü Ramai hi pove peie alia daode ahai hai souloua buh kukua khaipeire, ana raohou ahaisü puhnou daode moe.

¹¹Rashopeiki khenou athai phaotao hisü kou toure, ana Abram nou sütaosü hulaiwure.

¹²Teinghi loutayu thai Abram nou zhai shishoa zhitei tare; ae süphaki puh hisü ngaopiyu ae zhiteiyu hali puh hi vere.

¹³Süthaisü MAPAO nou puh hi paoe, “Ne tyaonah khesü vakou maivei teidei hinou shetumai ali soulai, ae mai qila soua mainou taidei-a po 400 hrülai.

¹⁴Ana puletaoye souveayu tyahrü na peisü Enou chikulai ae puletao nou teidei süna thaowua tapayu phaki kini alao poa panou tapa loulai.

¹⁵Alia neye hrücheyu thainou kaona-a panou thailoulai, ae kaolu soua neye panou povuh peilai.

¹⁶Maiphao adai thainou netyaonah khesü buh haina hi dakhai velai, daiolouzü Amormai hai Enou tudee laiyu hashi souche loumoa buhie.”

¹⁷Teinghi louta-a tei mailouyu thai, meikhao khaoyu meibvü ali ae meikei ali nou soutao phao ko hisü tahao-a bure.

¹⁸Süzhou teithe hinou MAPAO nou Abram hi vo soua paoe, “Nevei tyaonah hisü dei haitao peilai, süolouzü Ejipt mai deirai hinou poa Euphratis rei koute,

¹⁹Kenmai, Kenizmai, Kadmon mai,

²⁰Hit mai, Periz mai, Rephai mai,

²¹Amor mai, Kanaan mai, Girgash mai alia Jebus mai haitao vei teidei teitei-a loua nou peilai.”