Read Poumei Naga SHURAI 20 Bible Online

SHURAI 20 - Poumei Naga bible

SHURAI 20

¹Abraham nou buh sühinou Negeb füdei hilosa tapoa Kadesh ae Shur ko hinou ve hrüe. Puhnou Gerar nuh hinou shetumai ali soua hrüa buki,

²puhnou “puh chapfü Sarah ye nou atupai baie” tea pao-a baiwe. Südonou Gerar hi veo Abimelek nou mai seiho Sarah ye saloure.

³Ana Ramai nou süzhou khei zhiho mekou nou Abimelek hi paoe, “Zhukhaio, ne thailai, daiolouzü nenou polouyu naotupai hai maivei chapfüe.”

⁴Ana Abimelek nou naotupai nghiki koumo hie, südonou puhnou paoe, “MAPAO, ne mahmo soumoyu mai-a southa bailaiwu?

⁵Abraham-a lah haibüa ahi paoe, ‘Naotupai sü atupai baie’. Alia naotupai-a ‘Puhsü apou baie’ tea paomowu? Süvanou Esü tsü sheemoyu lia ha-a haisü souwure.”

⁶Süthaisü mekou hinou Ramai nou puh hi paoe, “Ovai, nenou tsüle sheemoyu lia ha-a haisü soua baie touyu Enou süwe. Südonou neye panou anghoujü hinou mah soulou moe, alia neye panou naotupaiye deiloumoe.

⁷Ana chuo mai chapfü sü maipuo hi dakhai peio, daiolouzü puh hai rachipaolayu mailie alia neye panou thaimore donou puhnou neye veachi paopeilai. Ana nenou naotupaiye lukhai peimo louzü, ne alia nevei mai hrülaiye sü southa khai bailai touyu sülo.”

⁸Südonou Abimelek nou shona kushu loua puh maitaoye kuloua haibüa vepare touyu teitei sü paongao peie, alia puletao nou süsü süloua ngaopi shore.

⁹Süthaisü Abimelek nou Abraham ye kuloua puh hi paoe, “Nenou ahi souyu haisü daige? Enou ne hi daimah soupei khaitoua ahi ae avei vedei hi hashi pove thou peilai touwe? Nenou souzü moyu vah ali ahi soupeiwure.

¹⁰Ne daitsüli choloua haibüyu vah sü ahi souwe?”

¹¹Abraham nou chila peie, “Enou haibüa souyu hai, buh haina hi hrüa buyu mainou Ramai ye piyu hai bupai moe, alia achapfüye shaoloua Eye southa shulai tea Enou choloua souwure.

¹²Süli themoa chechea honapai hai atupai baie, apuo nah-e, ana apfü nah moe, süvanou Enou puhye naloue.

¹³Ramai nou Eye apuo ki hinou vakou seitayu phaki, Enou puh hisü haibüa paowure, ‘Nenou Eye tsükhouyu zhai hinou ahai nou buhliki veyuma, E hai ne pou baie’ tea paolo.”

¹⁴Süthaisü Abimelek nou zhaotu, chode, ae qila mai taoli poloua Abraham hi peie, alia puh chapfü Sarah ye sü puh hi dakhai peie.

¹⁵Puhnou Abraham hi paoe, “Zhukhaio, avei vedei haitao hi nenou hrünüyu buh hisü hrüa bailai.”

¹⁶Alia Sarah hi puhnou paoe, “Zhukhaio, Enou nepou hisü shahu theli peiwure. Haisü neye koa buyu mai hrülai nghoujü nou ne hai mah hae touyu shee souyu nasüe, alia mai hrülai nghoujü nou ne hai sheetou tea baie.”

¹⁷Süthaisü Abraham nou Ramai hi veachi paopeia Ramai nou Abimelek ye souvei peie, alia puh chapfü, puh qila maipfü hrülai-a souvei peia panou tounah hrüloure.

¹⁸Daiolouzü Abraham chapfü Sarah ye polo vanou Abimelek kikha buyu naotumai hrülaiye sü panou nahmai hrümore donou Ramai nou khuwure.