Read Poumei Naga SHURAI 21 Bible Online

SHURAI 21 - Poumei Naga bible

SHURAI 21

¹Ramai vei chipao thaifü puhnou Sarah ye shiha peie, alia paohkhai touyu nasü Sarah hi vete peie.

²Sarah nou nahmai hrüloua nahpoutu ali Abraham nou chükhaivu louyu thainou puhye napeie.

³Sarah nou napeiyu nahpoutu zhih sü Abraham nou Isaak tea saloue.

⁴Ramai nou kharochi peiyu thaifüa teithe acha zhousü Abraham nou puh nahpoutu Isaakye heerode peie.

⁵Puh nahpoutu Isaakye nalouyu phaki puh hai po kaih pare.

⁶Sarah nou paoe, “Ramai nou Eye savayu ae nüyu hai peie, ako sülouyu mai hrülai nou Eye koa nülai.”

⁷Sarah nou paopue, “Thaonou Abraham hi Sarah nou nah salai hie tea paokhailai? Ana puh nou chipao louyu thainou nahpoutu ali puh hi napeie.”

⁸Nahtou nasü vikhe loua naophawure, Isaak nou naophayu teithe sü Abraham nou puhmai khemai sa-a nüdu nüe.

⁹Teitheli Sarah nou Ejipt pfüpai Hagar nahpoutu Ishmael alia puh nahpoutu Isaak koa ko buyu ngaoloue.

¹⁰Südonou puhnou Abraham hi paoe, “Qila pfüpai alia puh nahpoutu Ishmael ye seitawo, daiolouzü qilapai nou nayu nahpoutu nanou anah poutu Isaakye koa kaalo pozho louhoe.”

¹¹Haina vanou Abraham hai levea shore, daiolouzü Ishmael-a puh nah-e.

¹²Ana Ramai nou Abraham hisü paoe, “Qila pfüpai Hagar ae nahpoutu naye donou ne leveaso. Sarah nou ne hi paoyu na thaifüa soupeio, daiolouzü Isaak vanou Enou ne hi vo soukhai touyu nasü velai.

¹³Enou qila pfüpai nahpoutu Ishmael-a panou tyahrü ali soulai, daiolouzü puh-a ne nah-e.”

¹⁴Südonou Abraham nou thainesho shona sü kushuloua raokhao ae souhee dzübvüli poloua Hagar phao hisü nahtou noupu khaipeia vakou seitare. Chuo qila pfüpai nou tapaloua Beersheba vao hinou sühao-a ta-a laire.

¹⁵Souhee dzübvü hi dzü halou khaie puhnou puh nahtouye sü süübe phili hi khaiwure.

¹⁶Süthaisü puhnou mitar 100 pha talakou chobuloua puh lah haibüa tsüchoe, “Anahtou thaire sü E zhuthoulou hore.” Honapai nou sübüa tsüchoyu phaki nahtou sünou shusoua krapare.

¹⁷Ramai nou nahtou krayu paisü chouloure, alia MAPAO vei rakivamai nou raki hinou Hagarye sü chare, “Ne daisou nou leveayu bue? Ngaopiso, daiolouzü Ramai nou ne nahtou paisü süloure.

¹⁸Tashulo alia nahtouye kou daopolo, daiolouzü Enou puhvei tyaonahye sü tyahrü aduli soupeilai.”

¹⁹Süthaisü Ramai nou honapai nghithou sü hapa peie, alia puhnou dzükhao ali bua zhingaoloue. Puhnou takou souheebvü nasü dzü louthou phouloua puh nahtouye panou dzü keloue.

²⁰Ramai nou nahtouye koa salai peia puhsü dushu loure. Puhnou Paran rekounou hrüa louh posü shoyu mai ali soure.

²¹Puh pfünou puhye Ejipt maipfü ali phoupeie.

²²Süteile phaki, Abimelek ae puhvei reihmai peicha Phikol koa Abraham hi ve haibüa paoe, “Nenou souyu vah teitei hi Ramai nou koa zhopeiwe.

²³Südonou ahi, anah maitao hi, moa atyaosholea hi kaozü moyu vah soulai moe, ana Enou ne hi chechea souyu büa ne-a ahi alia nenou ve shetumai ali soua hrüyu teidei haina hi chechea hrülai touyu Ramai zhih hinou ahi chaachou soupeio.”

²⁴Abraham nou chila peie, “Enou chou peilai.”

²⁵Abimelek vei kilai mainou saolouyu dzükhao na vanou Abraham nou Abimelek hi paoyu phaki,

²⁶Abimelek nou paoe, “Thaonou sünasü saolousa E sümoe. Ne-a süsü ahi raiki paokhai toumoe, E zhounou sürai baihie.”

²⁷Süthaisü Abraham nou zhaotu ae chode taoli Abimelekye hupeie alia sükua puhai nou ae-ao soua chaachou souloue.

²⁸Abraham nou zhaokhome hinou zhaotu anai daiku paloue,

²⁹alia Abimelek nou puh hi paoe, “Ne zhaotu anai daikupa khaiyu hai daido noue?”

³⁰Süthaisü Abraham nou chila peie, “Zhaotu haitao anai hai ne ahi nou polo, sübüa dzükhao nasü Enou he-e touyu neye panou shakhi soulai.”

³¹Südonou buh sünasü Beersheba tea saloue, daiolouzü puhai nou buh süna hinou ae-ao souloua chaachou souloue.

³²Sübüa puhai nou Beersheba hinou chaachou soulouyu thai, Abimelek ae puhvei reihmai peikho Phikol sü shuloua Philistin mai deihi hotare.

³³Süthaisü Abraham nou Beershaba hi tamarisk süübe ali shopeie, alia süna hinou puhnou teisa ahri Ramai MAPAO ye tholoue.

³⁴Sükua Abraham nou Philistin mai dei hinou shetumai ali soua phashoyu hrüe.