Read Poumei Naga SHURAI 22 Bible Online

SHURAI 22 - Poumei Naga bible

SHURAI 22

¹Süthaisü Ramai nou Abraham zhai zhure donou “Abraham” tea lare, alia puhnou “E haibue” tea chila peie.

²Ramai nou paoe, “Nenou leshi shoyu ne nahpoutu alikhei buyuna Isaakye saloua Moriah mai dei hi tawo, alia Enou ne hi ngaopei laiyu deichi ali hinou puhye sü Eye posheela peio.”

³Südonou Abraham nou shona kushuzhi loua meidei-a posheelare donou süü daohloua sünasü poa rheisühphao hi kou pokhai loure, alia puh kilai mai ahai ae Isaakye saloua Ramai nou paopeiyu buh hisü holai tea tare.

⁴Teithe asü zhousü Abraham nou buh sünasü doukou nou zhingaore.

⁵Süthaisü Abraham nou puh kilai ahai hisü paoe, “Nehai haihi nou avei rheisüh sa-a buwo, ahai puonah peilo tapa ratho-a nehai hi dakhai kouhlai.”

⁶Abraham nou meidei-a posheelare süü nasü poa Isaak phaova kapeie alia puh bah hinou mei alia kaitou poa tae. Sübüa puhai nou koa tayu phaki,

⁷Isaak nou “Apuo” tea kue, alia puo nou “Oe! E haibue” toure. Isaak nou paoe, “Zhukhaio, ne bah hi mei alia süü hai bure, ana meidei-a posheelare zhaotu sü daiki bue?”

⁸Abraham nou chila peie, “Anahna, posheelare zhaotu sü Ramai nou peilai.” Sükua puhai puonah sü koa tapare.

⁹Ramai nou paopeiyu buh hisü puhai puonah nou tapa louyu kisü, Abraham nou posheela buh ali souloure, alia süpei hisü süü khokhai loure alia Isaakye sü raiphu loua posheela buh phao hisü popa khailoure.

¹⁰Süthaisü Abraham nou puh nahpoutuye sü southare donou kaitou nasü poloure.

¹¹Ana raki vanou MAPAO vei rakivamai nou “Abraham, Abraham” tea puhye kuloure. Abraham nou “Oe! E haihi bue” toure.

¹²Süthaisü rakivamai nanou paoe, “Nahpoutuna pei hisü nebah khakhaiso, moa puhva hi halia souso, daiolouzü chuo Enou süloure, nenou leshi shoa buyu ne nahpoutu sü Ramai ye donou pangai moa alia Ramai ye pi-a khuhaowe touyu süloure.”

¹³Abraham nou peipfüa lashu zhukhaie, puh thailo nou zhaotu ali süühro hinou puh kai vaochü khaitoua zhingaoloue. Abraham nou tako zhaotu nasü poloua puh nahpoutu thaosoua posheela peire.

¹⁴Süvanou Abraham nou buh süna zhihsü “MAPAO nou peilai” tea saloue.

¹⁵Rakinou MAPAO vei rakivamai nanou Abraham hi vu ahai chena soua paoe,

¹⁶“Nenou vah haina souyu alia likhuyu ne nahpoutuye sü Eye peiba moyu vanou lah E vuzünou chou peilai,

¹⁷süolouzü Enou neye shiha peivu zülai, ne tyaonah khesü panou teivuh zhoulai alia zai pehi vonai büa panou tya kaalai. Nevei tyaonah taoye panou ngaobamai jünou koloulai.

¹⁸Nevei tyaosholea hi Enou shiha peiyu büa deiphao hi buyu tyahrü hrülai nou avei shiha kholai, daiolouzü nenou avei kharochi züyu vanou.”

¹⁹Süthaisü Abraham nou puh kilai ahai hi khaikouh puhnou hrüyu buh Beersheba hisü puletao koa vetare.

²⁰Süthaisü Milkah nou ne thaihou Nahor kikhahi nahmai acha napei khaitoure tea Abraham hi paovere.

²¹Puh nah narai na zhih sü Uz, puh thaihou Buz, Aram puo Kemuel.

²²Süthaisü Chesed, Hazo, Pildesh, Jidlaph, alia Bethuel puletaoe.

²³Bethuel sü Rebekah puoe. Milkah nou nahpoutu acha haitao hai Abraham thaihou Nahor hi napeie.

²⁴Süli themoa Nahor chapfü napai Reumah nou Tebah, Gaham, Tahash alia Maakah napeie.