Read Poumei Naga SHURAI 28 Bible Online

SHURAI 28 - Poumei Naga bible

SHURAI 28

¹Süthaisü Isaak nou Jakob ye kuloua shiha peie, alia puh hi paoe, “Ne Kanaan maipfüye nakhai toulaimoe.

²Ne Paddan-aram nuh hi nepaoh Bethuel ki hi tawo, alia sühinou ne nepfü pou Laban nah naotumai hrohinou maili nalo.

³Khoukhoulai Ramai panou neye hapei theo, alia ne vanou tounah alao ngaoloua panou tyahrü alao vei puo soulou theo.

⁴Puhye panou ne pei hi ae ne tyaonah maitao pei hi Abraham vei shiha nasü peitheo, sübüa Ramai nou Abraham hi apaokhai touyu dei haina nevei soulou theo.”

⁵Sükua Isaak nou Jakob ye seitawure, ae puhnou Paddan-aram hi Jakob ae Esau pfü Rebeka pou Aramean puona Bethuel nahpoutu Laban hi seitare.

⁶Chuo Isaak nou Jakob ye shiha peia Paddan-aram hi seiho chapfü phoure donou tare alia Isaak nou puhye shiha peiyu phaki “Kanaan maipfü nasowo” tea Jokob hi paoyu Esau nou süloure.

⁷Jakob nou pfüpuo chi züa Paddan-aram hi hotare touyu süloure.

⁸Südonou Esau nou Kanaan maipfü nayu hai puh pfüpuo nou jüpamore touyu süloua,

⁹Abraham nahpoutu Ishmael hi taho puh nahpai ae Nebaioth tupai Mahalath ye napuloure.

¹⁰Jakob nou Beersheba thaowua Haran hilo tahore.

¹¹Teinghi loutayu thai puhnou buh alihi taho süzhou khei chaore. Puhnou chuhli poloua peikhü souloua zhitare.

¹²Puhnou zhiho mekou nou kisho ali deiphao hinou raki khete dokhaitoua ae sühisü rakivamai nou takou takhe-a ngaoe.

¹³Alia süpe hinou MAPAO nou lahloua paoe, “E hai Abraham ae Isaak Ramaie. Nenou züa buyu dei haina hai Enou ne hi alia nevei tyaonah taohi peilai.

¹⁴Ne tyaonah khesü panou deiphi vonai zhoua panou hrülai alia puletaoye panou hrüpoa teinghi loulo, teinghi palo, reikou ae khekou holai, alia ne ae netyaonah vanou Enou tyahrü hrülaiye shiha peilai.

¹⁵Zhukhaio Enou neye koa salai peilai alia nenou buh tarakia tayuma Enou neye vupeilai, alia neye dei haihi sa-a dakhai ve peilai, daiolouzü Enou ne hi apaokhai touyu teitei sü souche loumosa neye thaolai moe.”

¹⁶Süthaisü Jakob nou kaishuloua paoe, “MAPAO sü buh haihi bue, ae haisü Enou sülou more.”

¹⁷Puhsü ngaopi sholoua haibüa paore, “Buh haina hai sütho lihie! Füdei haina hai Ramai vei ki phae; raki hi khere bomüyu phae.”

¹⁸Süthaisü puhnou thainesho shohna kushuloua puhnou peikhü souyu chuh nasü poloua sholah khaire alia Ramai bah hi thaothoua chuh haina pei hisü theadzü lazü peie.

¹⁹Buh süna zhih sü “Bethel” tea saloue, ana raichoki louzü buh süna zhihsü “Luz” tea kuwe.

²⁰Süthaisü Jakob nou chaachou ali MAPAO hi soua paoe, “Nenou avei tatou teitei hi koa zhopei louzü, ae Eye vupei louzü alia Eye sabanü ae touso peilouzü,

²¹alia apuo ki hi kaona-a Eye sa-a dakhai vepeire toulouzü ne sü avei Ramai soulai.

²²Enou chuh sholah khaitouyu haina sü neye thoyu buh soulai alia nenou ahi peiyu zha kirou hinou zha ali neye peilai.”