Read Poumei Naga SHURAI 3 Bible Online

SHURAI 3 - Poumei Naga bible

SHURAI 3

¹Chuo nghou hai Ramai MAPAO nou soukhai touyu rekhaona kukhe jünou do dushoyu hrikhaona alie. Puhnou naotupai hisü paoe, “Kipei hi buyu süübetao hinou rashithou tarasou haitouso tea Ramai nou paowu?”

²Naotupai nou nghou hisü paoe, “Ehnou kipei hi süübetao hinou rashi haitoua veie;

³ana Ramai nou paoe, ‘Kipei touchü hi buyu süübe sünavei rashithou haitou loushie, dei-a deilou shie, süsü souwu louzü ne thai bailai.’ ”

⁴Ana nghou nanou naotupai hisü paoe, “Ne thailai moe.

⁵Daiolouzü nenou rashi süna toulouyu thai, ne nghithou hrüpa loulai, Ramai büa aveih ashi süloulai touyu Ramai nou süwe.”

⁶Südonou naotupai hai rashibe nasü ngaovei sholoure, ae rashithou sü toua touvei shore büa ngaoloure, alia haisü touloua tsüsü laiyu rashie tea zhingaoloua rashi nasü haitou loure; alia honapai nou dali hai puh chaa hia peie, alia puhnou süsü touloure.

⁷Süthaisü puhai nghithou hrüpa khaie, puhaisü baitoua baie touyu süloua dousüünghou nou rücholoua sabanü soua banou loure.

⁸Süzhou koukhesü Ramai MAPAO nou kipei hi talouyu phikho süloua puh haisü süühro hinou bailoua Ramai MAPAO nghoujü nou tuchü tare.

⁹Ana Ramai MAPAO nou Adam ye kua “Ne daiki bue?” tea noue.

¹⁰Alia puh nou chila peie, “Kipei hi nenou talouyu phikho süloua Esü baitoua bubaiyu donou ngaopia tuchü tare.”

¹¹“Ne baitoua baie touyu thaonou ne hi paoe?” tea Ramai nou noue. “Tousowo tea ne hi kharochi peikhai touyu rashithou nasü ne touloure momo?”

¹²“Eye koa bure donou nenou khaipeiyu naotupai nanou rashithou nasü ahi peie ae Enou sünasü touloure” tea Adam nou chila peie.

¹³Süthaisü Ramai MAPAO nou naotupai hisü noure, “Nenou souyu haisü daie?” “Nghou vei shodo hinou Enou touloure” tea naotupai nou paoe.

¹⁴Süthaisü Ramai MAPAO nou nghou hi paoe, “Nenou vah haina souyu donou, kikhaorü teitei ae rekhaona teitei jünou chaa ashi nasü pfülai: ne nepou nou süroua talai, alia nevei hrümai hi vounai nou toua hrülai.

¹⁵Enou naotupai ae nehai kohi, alia netyao nah ae puh tyaonah kohi ngaoraiyu ae ngaobayu sü pothou peilai; puhnou ne pei sü souphe peilai, ae nenou puh phisü dao peilai.”

¹⁶Naotupai hi puhnou paoe, “Enou neye sü panou veashoa poupfülai, alia veashoa panou nah nalai, sübüyuma nenou nechaaye jüpa bailai, ae puhnou nepei kholai.”

¹⁷Puhnou poutu nahi paoe, “Nenou ne chapfü chi züloua Enou tousowo tea kharochi peikhai touyu rashi nasü toulouyu vanou, dei haisü neye donou chaa pfülai; ne hrümai sahsü vah soua nou toulai.

¹⁸Pouhou, raishu sü paopa talai, ae rekou vei vupou sü nenou toulai.

¹⁹Hudzü pa-a dei nai hi dakhai loumo koute, ne tah tahtou-tasolai, daiolouzü neye sünanou soupeia baie. Neye sü dei nai nou soupeia baie, südonou dei nai hisü dakhai loua bailai.”

²⁰Adam nou puh chapfü zhih sü Ef tea saloue; daiolouzü honapai hai deiphao mai hrülai vei pfüe.

²¹Alia Ramai MAPAO nou Adam ae puh chapfü Ef ye donou souhee nou sabanü souloua banou peie.

²²Süthaisü Ramai MAPAO nou paoe, “Zhukhaio, chuo mai hai Etao raibüa aveih ashi süloure. Puhye panou ahri süübe hinou rashithou sü haitou loua teisa panou hrilai moe.”

²³Südonou Ramai MAPAO nou puhsü lah puhye souyu deinai nasü panou tahtoure donou Eden kipei hinou hutare.

²⁴Puhnou maiye sü hulaiwure; alia teinghi palo Eden kipei hinou ahri rashibe nasü kholoure donou Cherabim ye holo hailo heiveiyu khoche ali pokhaire.