Read Poumei Naga SHURAI 34 Bible Online

SHURAI 34 - Poumei Naga bible

SHURAI 34

¹Jakob ae Leah nahpai Dinah nou teitheli Kanaan maipfüye daolai tea tapae.

²Süphaki Hivmai puona Hamor, buh sühi veo souyuna nahpoutu Shekem nou puhye ngaolou khaie, puhnou süthailoua sazü peire.

³Ana puhnou naotupai sü hüvei shoa ngaoloua leshi loure alia naloulai tea tsücho loure.

⁴Südonou Shekem nou puh puo Hamor hisü paoe, “Naotupai haina hai aki noupeio.”

⁵Chuo Jakob nou puh nahpaiye sü mai haina nou mah soupeire touyu süloure; ana puhnah maitao hai rükounou cho khotare, südonou puhnou shamea nahmaitao khaiveyu khoa bue.

⁶Shekem puo Hamor nou Jakob hi nahpai donou chiphalai tea vere.

⁷Sükisü Jakob nahmaitao-a dou hinou kihi khaivere. Alia puletao nou ko haina süloukhaie levea shore ae rarou loure, daiolouzü Shekem nou Jakob nahpai hi hashi soupeiyu hai Israel mai hrülai pei hi hao soupeia baie, daiolouzü haibüyu vah hai souyu phamoe.

⁸Ana Hamor nou puletao hisü paoe, “Anah poutu Shekem sü ne nahpai leshi loure, zhuvea honapaiye sü puhki khaipeio.

⁹Ahai phaloua naotulou nalo laikhe; Etao nah naotumai-a neleki khaipeilai, ae neletao nah naotu tao-a Eh ki khaipeio.

¹⁰Sükulouzü nemai-a Eh nuh hinou koa hrülou veie, ae neletao nou jüpa buh taraki nou bua bailai, lah dosoua shuhra soua kini phoulou veie.”

¹¹Shekem-a Dinah puo ae pou maitao hisü paoe, “Neletao nou Eye zhuvea leshipeio, ae neletao nou jüpa-a khoyu nasü Enou peilai.

¹²Neletao nou shanghi vei na kazhou kholai, khonü kholo, sütaosü peilai, anou naotupai louzü achapfü soure donou Eye peio.”

¹³Shekem nou Dinah ye mah soupeiyu donou Jakob ae puhnah maitao nou Shekem ae puh puo Hamor hisü da-a chila peire.

¹⁴Puletao nou haibüa chila peie, “Etao tupaiye sü heerode moyu mai ki khaipei loushie, daiolouzü haisü Etao zhai moe.

¹⁵Neletao-a Etao büa poutumai hrülai nou heerode louzü ae toupei louveie.

¹⁶Sükua soulouzü ahai vei naotulou nalolou veie, alia neletao hinou hrüa nuhmai ali soulou veie.

¹⁷Ana neletao nou süsü ae tea heerode lou hore toulouzü naotupaiye sü saloua talaire.”

¹⁸Sükua paoyu nasü Hamor ae Shekem puonah nou ae tounüre.

¹⁹Alia nahle puona sünou Jakob nahpaiye leshi shoyu thaifüa paoyu taosü soure. Puh hai kikhamai hrülai jünou mainou tsükhou khayu nasüe.

²⁰Südonou Hamor ae puhnah poutu Shekem nou puletao nuhdu robomü hi takouloua puletao hisü paoe,

²¹“Mai haitao hai Etao hi veishoa baie, puletaoye panou Etao nuh hi hrülo ae dosoua panou talouwo, daiolouzü Etao donou füdei sü alao ka-a bue. Etao-a puletao naotulou polai ae Etao naotulou-a puletaoye peilai.

²²Ana puletao hai heerodeyu maie, südonou Etao poutumai hrülai-a heerodere toulouzü, puletao sü Etao koa nuhli hinou hrüzholai touwe.

²³Sükure toulouzü puletao vei kikhaorü ae kini khesü Etao vei soulai mowu? Puletao nou paoyu nasü ae toupeia koa hrüzho loubai laikhe.”

²⁴Hamor ae puh nahpoutu Shekem nou paoyu nasü ae touloua sühi vejüyu poutumai hrülai sü heerodere.

²⁵Teithe asü thaisü, puletao vei heerodeyu veiloumoa bukinou, Jakob nahmai ahai, Dinah pou Simeon ae Levi nou khoche poloua talou nuhdu hi hrüyu poutumai hrülaiye sü daothawure.

²⁶Hamor ae puh nahpoutu Shekem-a daothawure alia Dinah ye sü saloua tutare.

²⁷Daothayu thailo Jakob nahmai kukhenou puletao tupaiye soushi peiyu khüphoua talou kina teitei sü poloure.

²⁸Puletao nou kikhaorü, nghitu zhaotu, rheisüh, nuh hi buyu ae dou hi buyu na teitei sü potare.

²⁹Puletao vei kini teitei, napfü naonah hrülai alia ki hi buyu teitei poa tare.

³⁰Süthaisü Jakob nou Simeon ae Levi hisü paoe, “Buh haihi hrüa buyu Kanaan mai, Periz mai ae mai hrülai nou Eye panou ngaoraloua Eye souvea peire do ashi nasü nehai chena nou soupeire. Amaitao sü chita baie, alia puletao nou ve jüloua Eye hulouyu thaio Etao mai hrülai nou thai-a bailai.”

³¹Ana puhai nou paoe, “Ahai tupaiye sü khakhapfü ali büa panou soukhai laiho?”