Read Poumei Naga SHURAI 35 Bible Online

SHURAI 35 - Poumei Naga bible

SHURAI 35

¹Ramai nou Jakob hi paoe, “Ne kushuloua taho Bethel hi hrütawo. Ne jürai Esau hinou ne tutayu phaki, ne hi kouh zhuh ngaopeiyu Ramai ye donou sheelabuh ali sühinou soupeio.”

²Südonou Jakob nou puh kikhamai alia puhye koa bumai hrülai hisü paoe, “Neletao hi buyu vakou maivei bashara teitei polaiwo alia lah neye sousheelo ae sheeyu sabanü banoulo.

³Etao Bethel hisü ho hrüta laire, ae sühinou Enou vea-a buyu phaki alia buh taraliki veyu phaki Eye soukha peiyu Ramai puh hi sheelayu buh ali soulai.”

⁴Südonou puletao nou vakou maivei bashara taosü ae nouboh taosü Jakob hi peire alia Jakob nou sütaosü Shekem nuh nghiki buyu phüsü phili hi hepao khaire.

⁵Puletao nou tapayu kisü, nuh sütao haohi buyu mai hrülai hisü ha ngaopiyu ali Ramai nou thoupeie, südonou mailia puletao thai huta more.

⁶Jakob nou puhvei mai hrülai sa-a Kanaan hi buyu Luz tea kuyu Bethel hisü hote loure.

⁷Südonou puhnou buh sühisü sheelabuh ali souloue alia süna zhih sü El-bethel (Bethel Ramai) tea sapeie, daiolouzü puhnou puh jürai hinou tutayu phaki buh sühinou Ramai nou puh hi zhuh ngaopeie.

⁸Rebekah kilaipai Deborah sü buh sühinou thaire alia puhye sü Bethel khekou buyu phüsü phili hinou daovure. Südonou buh sünasü Allon-bakuth (Krayu Phüsü) tea zhih sapeie.

⁹Jakob nou Mesopotamia hinou dakhai veyu kisü Ramai nou puh hi kouh zhuh ngaoda khaie alia puhye shiha peie.

¹⁰Ramai nou puh hi paoe, “Ne zhih hai chu thainou Jakob tea kupu laimoe ana Israel tea kulai.” Südonou Ramai nou puh zhih sü Israel tea sapeie.

¹¹Ramai nou puh hi paoe, “E hai Khoukhoulai Ramaie. Tounah alao hrülo. Tyahrü khemai ne hinou hrüvelai alia neye sü panou vemaitao vei puopaoh soulai.

¹²Enou Abraham ae Isaak hi peilai tea paokhai touyu teidei nasü ne hi peilai alia shiha nasü netyao nahtao hi peilai.”

¹³Süthaisü Ramai nou puhye thaowua khaitare.

¹⁴Ramai nou puhye chayu buh hisü puhnou chuh ali shokhai loue alia süna pei hisü darkhadzü ae oliv theadzü lanea peie.

¹⁵Buh sünasü Bethel tea saloue.

¹⁶Jakob alia puh kikhamai nou Bethel thaowua tare. Puletao nou Ephrath hi koute loumo jünou Rachel hai nah nare teile sü veloua khea sousho loure.

¹⁷Puhnou veashoa nah nakouyu kisü puhye sa-a nah napeiyu painou puh hisü paoe, “Ngaopiso Rachel, nahpoutu ali ngaopu laire.”

¹⁸Ana puhsü thailoure ae puhnou thaimo jünou puh nah zhih sü Benoni tea sapeire, ana puh puo nou Benjamin tea sapeie.

¹⁹Sükua Rachel sü thaire ae puhye sü Ephrath hi koure ludu, chuo Bethlehem tea kuyu buh hinou poa vupeire.

²⁰Jakob nou sühisü chuh ali shokhai peie, alia sünasü chukoute Rachel vei khüh chuhkho tea süwe.

²¹Jakob nou takou puloua Eder kipeitaoh thalilo vanou sahpao haoloua bure.

²²Jakob nou buh sühi hrüa buyu phaki, Reuben nou puh puo khapfü Bilhah ye sazü peire. Jakob nou süsü süloua raroure. Jakob hai nahpoutu kiahai bue.

²³Leah nou napeiyu nahmai taosü Reuben (Jakob nahpoutu tsükhana), Simeon, Levi, Judah, Issakar, ae Zebulun.

²⁴Rachel nou napeiyu nahpoutu ahaisü Josef ae Benjamin.

²⁵Rachel qilapai Bilhah nahpoutu haisü Dan ae Naphtali.

²⁶Leah qilapai Zilpah nahpoutu haisü Gad ae Asher. Nahpoutu haitao hai Mesopotamia hinou naloue.

²⁷Abraham ae Isaak nou hrüyu Hebron nghiki buyu Mamre hinou Jakob nou puh puo Isaakye tave daoe.

²⁸Isaak nou po kaihlia raicha hrüloue,

²⁹alia puhsü tsükhao khao-a thaitare, alia puh nahpoutu Esau ae Jakob nou puhye poa vupeie.