Read Poumei Naga SHURAI 47 Bible Online

SHURAI 47 - Poumei Naga bible

SHURAI 47

¹Südonou Josef nou chinamaitao angou saloua veo hisü taloure, alia puhnou paoe, “Apuo ae athaihou jürai maitao sü Kanaan hinou puletao vei kikhaorü ae na buyu teitei koa haihi veloure. Puletao sü chuo Goshen hisü ve bure.”

²Süthaisü puhnou chinamaitao angou salou veo hisü zhuh shingaopeie.

³Veo nou puletao hisü “Neletao daivah souyu maie?” tea noue. “Ne kilai Etao hai Eh puopaoh mai büa zhaotu ae nghitu khoyu maie” tea puletao nou chila peie.

⁴“Etao nevei teidei hai hinou hrülai tea vewe, daiolouzü Kanaan teidei hisü tokaayu hai shishoyu thaifüa Etao kikhaorü panou pou toure hiphao hare. Ne kilai Etaoye panou Goshen hisü bulowo.”

⁵Süthaisü veo nou Josef hisü paoe, “Ne puo ae ne thaihou jürai maitao sü ne hi vere.

⁶Ejipt teidei sü nebah hi bue. Puletaoye sü dei aveih khana buh Goshen hisü panou bolowo. Puletao hrohinou soulousü mai bulouzü sümaitaoye panou avei kikhaorüa zhupeio.”

⁷Süthaisü Josef nou puh puo Jakob ye salou veo hi zhuhshingao peie, alia Jakob nou veoye shiha peie.

⁸Alia Pharaoh nou Jakob hi noue, “Ne po kizho pare?”

⁹Jakob nou Pharaoh veo hi chila peie, “Enou sühaoa tayu po kaihlia shirou pare. Avei hrümai hisü po poulao hai veahoyu nou ve dao-a baie. Apuo-paoh maitao nou po alao hrüsho poa tayu bümoe avei hrümai hiolouzü.”

¹⁰Jakob nou veoye shiha peia tapare.

¹¹Veo nou paoyu thaifüa Rameses nuhdu pehi buyu dei aveih hinou puhnou puh puo ae puh thaihou jürai maitaoye panou fükha loure.

¹²Josef nou puh puo, thaihou jürai maitao ae puh puo kikha maitao atsü khana hinou poa anahkhana hi koute, puletao hrülai vei touso souda peie.

¹³Tokaayu hai shipusho louyu thaifüa buliki touso sü hare, alia Ejipt hi mai ae Kanaan hi mai hrülai sü pouzüa lelouho loure.

¹⁴Puletao nou thouh hüyu pousha teitei sü Josef nou pojüloua veo ki hi pove peire.

¹⁵Ejipt hi ae Kanaan hi pousha buyutao souha cheyu thai, Ejipt hi mainou Josef hi tave paoe, “Etaoye touso peio; daisounou Eye panou ne nghoujü nou touha-a thailai? Daiolouzü Etao vei pousha sü hachere.”

¹⁶Josef nou puletao hi chila peie, “Neletao pousha halouzü, neletao vei kikhaorü haihi poveo, Enou neletao vei kikhaorü thaosü touso nou peilai.”

¹⁷Südonou puletao nou kikhaorü khesü Josef hi pove peie, alia Josef nou puletao vei rhei, zhaotu, nghitu, cho ae rheisüh thaosü puletaoye touso nou peie. Süna po hisü Josef nou puletao vei kikhaorü hai touso nou lyapeie.

¹⁸Süna thailo po nahisü puletao nou Josef hi ve haibüa paoe, “Etao nou apaopu nghoujü halia pokukhai laimore, süolouzü Etao pousha teitei souha chewure, ae kikhaorü hrülai sü nevei souloure. Chuo Etao pfüphao alia Etao vei dei moa nou hakukhe halia neye pove peiloure hare.

¹⁹Tsücho peikhaio, Eye panou thaiwuso. Etao dou-a panou vukhaiwuso. Touso nou lya-a Etaoye ae Etao vei dei sü hülowo. Etao sü veo vei qila soulai alia Etao deisü veo vei soulai. Ehye panou hriloure donou touso peikhaio alia Etao dou hi daothoure thouhtai peio.”

²⁰Sükua veo donou Josef nou Ejipt mai dei teitei sü hüloure, daiolouzü tokaayu sü shishoyu thaifüa Ejipt mainou puletao vei deisü zhotou loure, alia puletao vei deisü veo vei soure.

²¹Ejipt teidei hinou hrüyu mai hrülaisü puhnou poa qila souloure.

²²Ana napao maitao vei deiwo louzü puhnou hülou moe, daiolouzü napao maitao hai Pharaoh hinou vahzho ngaoyu bue, ae Pharaoh nou peiyu sünanou puletao nou poa hrikouloue, südonou puletao vei deisü zho moe.

²³Süthaisü Josef nou mai khemai hi paoe, “Zhukhaio, chuo Enou neletao ae neletao vei deisü veo donou hüloure. Thoutai sü poloua dou hi vuhthoulo.

²⁴Chachiyu teile kisü zha angou hinou zha ali hai veo vei soulai alia thouh zha angou hinou zha adai taosü thoutai soure donou alia neletao, neletao kikhamai ae nahmai panou toure donou khailo.”

²⁵Alia puletao nou chila peie, “Aduwo, nenou Etao hrirai khailupeie, ae Etaoye leshi peie. Etao nou veo vei qila soulai.”

²⁶Sükua Ejipt mai vei teidei hinou payu zha angou hinou zha ali sü veo vei soulai touyu chikha haina hai Josef nou soupeie, ae süsü chukoute ta-a bue. Ana napao maitao vei dei louzü veo vei soumoe.

²⁷Israel mainou Goshen touyu Ejipt mai teidei hinou hrüa puletao nou alao toungi pare alia tounah hai-a alao ngaoloure.

²⁸Jakob nou Ejipt hi lou po kianai hrüloue alia puhvei hrü hai po 147 hrüloue.

²⁹Jakob nou thaire nghikouyu phaki, puhnou puh nahpoutu Josef ye kuloua paoe, “Nenou Eye leshiwe toulouzü, alia cheche-a ae paochi züa soupeilai toulouzü adeke kohi ne bah thaithou loua Eye Ejipt hi vuhlai moe tea chaachou soupeio.

³⁰Apuo-paoh maitao nou vuhyu buh hisü E-a pove vuh peiyu jüpae, Eye Ejipt hinou vakou popaloua puletaoye vuhyu buh hisü vuhpeio.” Josef nou puh hi chila peie, “Nenou jüpayu nasü Enou soupeilai.”

³¹Jakob nou paoe, “Nenou sübüa soupeilai touyu ahi chaachou soupeio.” Josef nou chou peiwure. Süthaisü Jakob nou pei pfükouh züphao hi khailoua kalo chi paore.