Read Poumei Naga SHURAI 48 Bible Online

SHURAI 48 - Poumei Naga bible

SHURAI 48

¹Teile jütou thaisü, ne puo soua bure tea Josef hi paovere. Südonou puhnou puh nahpoutu ahai, Manasseh ae Ephraim ye saloua puoye ve daoe.

²Jakob nou puh nahpoutu Josef hai puhye ve daolai tea laire touyu sülou khaie, puhnou tsüloua kushu züphao hinou chobu loure.

³Jakob nou Josef hisü paoe, “Khoukhoulai Ramai nou Kanaan teidei hi Luz tea kuyu buh sühinou Eye kouh zhungaoa shiha peie,

⁴alia haibüa paoe, ‘Zhukhaio, Enou neye tounah alao peilai alia puletaoye panou tyakahlai alia dei hainasü netou nahtao hi teisa vei panou soure donou peilai.’ ”

⁵Süthaia Jakob nou paopue, “Chuo ne nahpoutu ahai, Enou Ejipt hi kouhmojü nou nalouyu ne nahpoutu Ephraim ae Manasseh haina ahaisü Reuben ae Simeon khihao-a avei mai soulai.

⁶Nenou nahmai kukhea bupulouzü sütao hai nevei soulai, alia puletao hai Ephraim ae Manasseh zhih hinou kaa thao-a bailai.

⁷Daiolouzü Enou Mesopotamia hinou dakhai veyu kisü Ephrath (süolouzü chuo Bethlehem) hinou doushomoa buyu Kanaan teidei hinou nepfü Rachel sü thaipeia ale veashore. Ephrath talouyu ludupe hinou Enou puhye sü poa vuhpeie.”

⁸Jakob nou Josef nahpoutu ahaiye ngaolouyu phaki, puhnou paoe, “Haina haisü thao nahge?”

⁹Josef nou chila peie, “Haina haisü Ramai nou Eye Ejipt teidei hinou peikhai touyu anah poutue.” Jakob nou paoe, “Puh haiye shiha peire donou ahi sakouwo.”

¹⁰Jakob hai chü louyu donou nghithou ngaomo loure. Josef nou puh nahpoutu ahaiye sü puh hi sakou peie alia puhnou nahtou ahaiye sü bahnou kholoua münou teipeie.

¹¹Jakob nou Josef hisü paoe, “Enou neye ngaodakhai laihie tea chomore ana chuo Ramai nou nenah mai koutea panou Eye ngaoloure.”

¹²Süthaisü Josef nou puhaiye sü Jakob dekephao hinou saloure, alia puhnou puh puo phi hinou peipfüa nakou puh puoye khurüe.

¹³Josef nou Ephraim ye Jakob bakha nalo ae Manasseh ye bakha zhoulo poa sakou khaipeie.

¹⁴Ana Jakob nou puh bah poa reiloua puh bah zhoulo nasü anahna Ephraim pei hi khailoure alia puh bah nalosü Manasseh, atsüna pei hi khailoure.

¹⁵Süthaisü puhnou Josef ye haibüa shiha peie: “Apuo Abraham ae Isaak nou kuvah souyuna, zhou koute Eye sa-a laipeiyu Ramai sünaye panou nahpoutu haina ahaiye sü shiha peitheo!

¹⁶Hashi teitei hinou Eye khailupa peiyu rakivamai sünaye panou ne haiye shiha peitheo; Azhih ae apuo Abraham ae Isaak zhihsü nahpoutu haina ahai vanou hrikou loutheo! Puhai tounah panou deiphao kainghou teitei hrüve phoulou theo!”

¹⁷Puh puo bah zhoulo hai Ephraim pei hi khaiyu nasü Josef nou ngaoloua leveare, südonou puhnou puh puo bah zhoulo nasü poa Manasseh pei hi pokou khaire donou puh puo bah kou poloure.

¹⁸Alia puhnou puo hisü paoe, “Ne bah khaiyu hai kaomore, Apuo! Haina nou atsü nahie, südonou ne bah zhoulo nasü haina pei khaipeio.”

¹⁹Ana puh puo nou aetou more alia haibüa paoe, “Enou süwe, anahna, Enou süwe. Manasseh tounah-a alao hrülai alia dulai, ana puh thaihou nanou puh jünou dupu laihie, alia puhvei tounah khesü tyahrü aduli soulai.”

²⁰Südonou süteithe nou puh haiye puhnou haibüa shiha peie, “Israel mainou maiye ha peiyu phaki nehai zhih kua haibüa paolai: ‘Ramai panou neye Ephraim alia Manasseh khihao-a soupeilo.’” Haibüa Jakob nou Ephraim zhih nou Manasseh zhih jünou raia kupeie.

²¹Süthaisü Jakob nou Josef hi paoe, “Esü thailaire touyu nenou süwe, ana Ramai nou neye salai peilai alia neye nepuo-paoh vei füdei hisü sa-a dakhai ve thoupeilai.

²²Khoche ae voulou nou poa hulailoua polouyu Amor mai dei, deinai veishoyu Shekem nasü Enou neye chinamai kukhetao jünou peipulai.”