Read Poumei Naga SHURAI 6 Bible Online

SHURAI 6 - Poumei Naga bible

SHURAI 6

¹Deiphao hi maitya krapa loua nahnaotu maikhe hrükou loukhaie,

²Ramai vei nahpoutu maitao nou deiphao mai naotu-loukhe hüvei shoyu zhingaolou khaie lah kukunou jüpa doloua naloure.

³Süthaisü MAPAO nou paoe, “Arako hai deiphao mai hi panou teisa bulai more, daiolouzü puhsü vahsou pfüyu vanou alia puhsü po 120 jünou lah-a panou hrülai more.”

⁴Sükisü alia süthailo-a deiphaomai naotulou ae Ramai nahpoutu maitao nou koloua nalouyu Nephilim touyu maikhou tya deiphao hi hrüe. Haimai tyasü dao raiki zhih tashoyu rapfühchi pfüyu maie.

⁵Deiphao hi maikhe mainou hrüzüyu ae puletao lekhe hisü tsü sheemoyu khaikho chokoutea buyu MAPAO nou zhingaolou khaie,

⁶Puhnou deiphao maiye souloua deiphao hi khaipeiyu vanou vamo sholoua le veare.

⁷Südonou MAPAO nou paoe, “Enou soukhai touyu mai alia soukhaona, pounou roua tayu khaona, teihi raohou haitao hrülai hai souhawulai, daiolouzü puletaoye soukhai touyu hai E le veare.”

⁸Ana Noha toulouzü MAPAO nou khuleshi loue.

⁹Haina hai Noha vei ko-e. Puh hai nahpoutu asü bue, Shem, Ham ae Jepheth. Puhsü chaa hayu ae cheche shoa hrüyu mai alie ae puh hai Ramai ye koa hrüe.

¹¹Ana deiphao mai hrülai nou Ramai nghoujü hinou ashi soukhai toure alia deiphao hi bürarouyu hainou phoukhare.

¹²Ramai nou deiphaomai zhuyu phaki, ashi khaikho nou zhingao-a baire, daiolouzü mai hrülai nou vah ashi soua bubaire.

¹³Ramai nou Noha hisü paoe, “Maihrü hai deiphao haina nou koa souha khailaire tea Enou lelah loure, daiolouzü deiphao haihi taidayu ae ashi souyu hainou phoukha loure.

¹⁴Neye donou Gopher süünou sakhao daolouwo, kide khadelo, ae phaovai levai hai teichidzü (kolas) nou myalouwo.

¹⁵Nenou sakhao nasü haibüa soulo: Sah shoyu mitar 133, jha nou mitar 22, ae kuyu hainou mitar 13 nou soulo.

¹⁶Sakhao nahisü vabomü phalo alia vabomü ae thea ko hisü sentimitar 44 khailo; teikouna, peina ae peikhana tea kikha sho asü soua dadelo ae sütao thea hinou kikhu alili phalo.

¹⁷Daiolouzü zhukhaio hrikhaona hrülai souhawure donou Enou deiphao hi dzüdu seikoulai. Deiphao hi hrikhaona hrülai thai khailai.

¹⁸Ana Enou ne hi vo soukhai peilai, ne, ne chapfü, ne nahpoutu maitao ae puletao vei chapfütao koa sakhao hi taloulowo.

¹⁹Hrikhaona hrülai- reikeli, reijüli, nüli pouli, ahai-hai neye koa hriloure donou pothoulo.

²⁰Tya kukuyu khao shirina ahai-hai panou hriloure donou sakhao hi pothoulo.

²¹Neletao nou alia sütao nou toure touso tya veishi pothou jükhailo.”

²²Ramai nou kharochi peiyu teitei hai Noha nou souloue.