Read Poumei Naga SHURAI 7 Bible Online

SHURAI 7 - Poumei Naga bible

SHURAI 7

¹Ramai nou Noha hisü paoe, “Ne kihikhamai saloua sakhao hi taloulo, daiolouzü maiphao haina hai ne likhei anghoujü hi cheche-a hrübaie touyu Enou ngaoloure.

²Sheeyu khaonatao hai reijü-reike koa nou pa anai-nai pothoulo alia sheemoyu khaonatao hai reike reizü koa pa alili pothoulo,

³alia tei raohou reike reijü pa anai-nai haitao vei tyai hai deiphao hi khailoure donou sakhao hi pothoulo.

⁴Daiolouzü teithe anai zhousü Enou teirü seikou Enou soukhai touyu hrikhaona hrülai hai panou souhawure donou teithe raidai hea-khei panou teirülai.”

⁵MAPAO nou kharochi peiyu teitei hai Noha nou souloue.

⁶Deiphao hi dzüdu veyu phaki Noha hai po 600 pare.

⁷Puh, puh chapfü, puh nahpoutu ae puletao vei chapfütao sü puhye koa dzüdu hinou turei loure donou sakhao hisü salou loure.

⁸Ramai nou Noha hi kharochi peiyu büa sheeyu sheemoyu hrikhaona reike reizü, khaonü khaolou,

⁹pa ahai-hai sakhao hisü salou loure.

¹⁰Teithe anai thaisü deiphao hi dzüdu vere.

¹¹Noha nou po 600 payu phaki, sünavei khoukha kianai zhou hai dzüdu bomü teitei popare ae teipei dzü bomü taosü houpa peire,

¹²alia deiphi hisü hea-khei teithe raidai teirü koure.

¹³Süzhou teithe hinou Noha koa puh nahpoutu Shem, Ham ae Japheth, Noha chapfü alia puh nahpoututao vei chapfütao hai sakhao hisü talouloue.

¹⁴Puletao koa kikhaorü, rekhaona atai adu, tei raohao alia haitao vei tya kukuyu khemai,

¹⁵hrikhaona hrülai khaonü khaolou, reike reijü ahai-hai Noha koa sakhao hi talou loure,

¹⁶Ramai nou kharochi peiyu thaifüa talou loure. Süthaisü Noha thailo nou MAPAO nou kikhusü khuwure.

¹⁷Teirüshi hai deiphao hi teithe raidai rükouyu phaki, dzü sü dulailai paloua sakhaosü pfüa phaopare.

¹⁸Dzü hai kulailai kheloua sakhao nasü dzüpei nou phaoloure.

¹⁹Dzü sü prousho kheloua deichi adu teitei hai holoure,

²⁰ae dzü nou deichi adu pei jünou mitar anai phali hai kuloure.

²¹Deiphao hi hria buyu hrikhaona, tei raohou, soukhaona ae mai hrülai,

²²deithe hi buyu ssüpha ssüthouyu hrülai hai thaire.

²³MAPAO nou deiphao hi hrikhaona- mai, soukhaona ae tei raohao hrülai souhawure. Noha alia puhye koa sakhao hi loulouyu tao likhei shokhai peia baie.

²⁴Dzünou deipei hinou khaita moa buyu hai teithe 150 bue.