Read Poumei Naga SHURAI 8 Bible Online

SHURAI 8 - Poumei Naga bible

SHURAI 8

¹Ramai nou Noha ae puhye koa sakhao hi buyu rekhaona ae kikhaorü taoye ngaipei moe, puhnou dei pei hi teikhai panou hüloua alia dzü sü panou khaiho tare.

²Deikhe nou dzüla payu ae teipei dzübomü taosü khuwure, teipei nou rükouyu teirüsü khaire,

³alia dzü sü shosho nou khaitare, teithe 150 thaisü dzü sü koutare.

⁴Khouh anai vei khoukha kianai zhou sakhao nasü Ararat deichidu pei hi kouh sholoure.

⁵Dzü sü khailailai kouh khouh kirou vei khoungao ali zhou deichi adutao pei zhingaore.

⁶Teithe raidai akhai hisü Noha nou sakhao vei vabomü sü houpa loua,

⁷puhnou lüche ali phapeie, ana sünanou dzü themodzü koute holo hailo zhaohoua bure.

⁸Süthaisü dzü hai theloure mosa touyu zhure donou puhnou khao ali seitae;

⁹ana khao nanou taoloure buh phouha-a sakhao hisü dakhai ve-e, daiolouzü dei pei hisü chua dzü buhie. Südonou puhnou puh bah thaikou khao nasü sakhao hi pothou loue.

¹⁰Puhnou teithe anaili kholoua khao nasü sakhao hinou seitapue.

¹¹Süzhou koukhe sü khao nanou oliv süünghou ali daopoa sakhao hisü khaivere. Sühi sünou dzü hai theloure touyu Noha nou süloue.

¹²Süthaisü Noha nou teithe anaili buloua khao nasü seitae, anou khao nasü puh hi dakhai vepu more.

¹³Noha po 601 payu phaki, khouh ngaorai navei khoungao ali zhou deihi dzü sü there alia Noha nou sakhao pei hoyu nasü hapaloua zhukhaie dei sü the-a zhingao loue.

¹⁴Khouh ahai navei khoukha kainai zhousü dei teitei hai dzü there.

¹⁵Süthaisü Ramai nou Noha hisü paoe,

¹⁶“Ne, ne chapfü, ne nahpoutu maitao alia puletao vei chapfütao saloua tapalo.

¹⁷Neye koa sapalo hrikhaona hrülai - raohou, soukhaona ae pounou roua tayu khaona taosü sapalo, puletaoye panou toukoa tya kapaloua deiphao phou loure donou.”

¹⁸Südonou Noha nou puh koa puh nahpoututao, puh chapfü alia puh nahmaitao vei chapfü maitao sa-a paloure.

¹⁹Alia soukhaona hrülai, pounou taitayu hrikhaona hrülai, raohou hrülai, deiphi hinou lüa tayu hrikhaona hrülai, lahkuku meme soua sakhao hinou vakou tapaloue.

²⁰Süthaisü Noha nou rathobuh ali souloua sheeyu soukhaona alia raohou tya che hinou alili poloua rathobuh hinou sütao teitei hai mei deia Ramai hi sheela peie.

²¹Posheelayu kaivei nahai MAPAO nou süloua rukha-a lah puh hi haibüa paoe, “Mai vanou deiphao hai Enou chaa peipu khailai more, daiolouzü mai hai, nahle-a buki nou hashi tsücho pare, Enou souhayu büa hrikhaona hrülai hai souhapu laimoe.

²²Deiphao hai nanou bukisa daothou-southouyu, chachiyu, teilü-teisai, kah-hou, hea-khei touyu hai panou bulai.”