Read Poumei Naga SHURAI 9 Bible Online

SHURAI 9 - Poumei Naga bible

SHURAI 9

¹Ramai nou Noha alia puh nahpoutu maitaoye shiha peia paoe, “Tya kapaloua deiphao phoulo.

²Soukhaona, teihi raohou alia zaihi kha teitei ne hi peilai. Sütao teitei nou ne bah hi thaothou peiwure.

³Lüa hriyu khaona hrülai neto soulai, Enou vupou-a ne hi peiyu büa ha teitei neye peire.

⁴Ana hali, süolouzü zhe nahai nenou toulai moe, daiolouzü zhe nasü ahri raie.

⁵Nevei hrirai poyu nahi Enou tudeelai, nevei hrirai poyu soukhaona navei hrirai polai.

⁶Ramai nou Ehmai hai puh zhuh rai hinou soupei khaitoue, südonou maita linou-a mai ali southare toulouzü puh-a southalai.

⁷“Ne tya kaapaloua deiphao buh teitei phoulo.”

⁸Ramai nou Noha ae puh nah maitao hi paoe,

⁹“Enou chuo ne hi ae ne tyaonah maitao hi,

¹⁰alia teihi raohou, soukhaona, sakhao hinou palouyu hrikhaona hrülai hi vo ali soulai.

¹¹Enou ne hi vo haina souwe, süolouzü hrikhaona hrülai hai dzüdu panou dakhai souha pulai more, alia dzüdu panou deiphao souhapu khailai more.

¹²Ne alia neye koa buyu hrikhaona hrülai, ae haithai nou velai bonakha hrülaiye donou Eye koa vo soukhai touyu vei shee nasü haihai-e:

¹³Enou avei rüraipao hai panou teihao hi palai. Haina nou deiphao mai hi Enou vo soukhai touyu shee soulai.

¹⁴Teihao nou teihi holoua teihao hisü rüraipao pare toulouzü,

¹⁵Enou ne hi alia hrikhaona hi soukhai touyu vo, süolouzü dzüdu panou hrikhaona souha dakhai pulai more touyu licho loulai.

¹⁶Rüraipao nahai teihao pei pare toulouzü Enou süna zhuloua deiphao hrikhaona alia ne hi Enou soukhaiyu teisa vei vo nasü tailoulai.

¹⁷Haihai deiphao hi hrikhaona hrülai alia Ahai ko hi vo soukhai touyu shee nasüe.”

¹⁸Noha nahpoutu maitao sakhao hinou palouyu hai Shem, Ham ae Japheth-e. Ham hai Kanaan puoe.

¹⁹Noha nahpoutu haitao asü hinou deiphao mai hrüpaloue.

²⁰Noha nou tahta raikhana soua darkha kipei shothoue.

²¹Puh nou darkhadzü keloua luloure alia sabanü pha-a puh vei sahpao hisü lou zütare.

²²Kanaan puo Ham nou puh puo baitoua buyu ngaoloua puh jürai ahai hisü paopeie.

²³Süthaisü Shem ae Japheth nou sahli poloua puh hai phaohi khailoua thaitsü polou puh hai puo baitoua buyu sü hopeie; puh hai nou pah pfüku loua puh hai puo nou baitoua buyu sü ngaomoe.

²⁴Noha nou zhia buyu hinou chüpa loukhaie, puh nahpoutu anakha nanou puh hi dai soukhai toue touyu süloua,

²⁵Puh nou paoe, “Kanaan sü chaa pfütheo! Puhye panou puh jürai mai qila soulai.

²⁶Avei Ramai MAPAO ye sü panou Shemye shiha peitheo, alia Kanaan panou puh vei qila soulai.

²⁷Ramai panou Japheth ye souvi khe peitheo! alia puhvei tyaonah khesü panou Shem vei sahpao hinou bulou theo, alia Kanaan panou puh qila soulai.”

²⁸Dzüdu thailo Noha nou po 350 hrüloue.

²⁹Puhnou po 950 hrüloua thaitare.