Read Poumei Naga 2 SAMUEL 1 Bible Online

2 SAMUEL 1 - Poumei Naga bible

2 SAMUEL 1

¹Saul thaiyu thai David nou Amalek mai jünou reih veilou-a dakhaive teithe ahai Ziklag hinou chao-a bue.

²Teithe asü chezhou sü Saul vei reihmai buh hinou mai ali hai puhvei leveayu ngaoyu ali sou-a lah puhvei sah daophasa toure alia puhvei pei hi nainou boshopoa David hi tuvere. Puhnou David hiki takou pei pfünakou David ye khuhao-a khurüe.

³“Ne daichinou vewe?” tea David nou puh hi noue. “E Israel maivei reihmai buh hinou tupaloue,” tea puh nou chila peie.

⁴David nou paoe, “Daibüa vepare touyu khesü ahi paokhaio.” Puh nou chila peie, “Etao reihmai zü reihbuh hinou tu-a baire, Etao mai alaoye zhiwure alia Saul ae puhvei nahpoutu Jonathan koute-a zhiloure.”

⁵“Saul ae puh nahpoutu Jonathan hai thaire touyu sü ne kabüa süloue?” tea David nou nouda khaire.

⁶Puhnou haibüa chila peie, “E Gilboa deichi hi tapayu phaki, Saul sü lah puhvei heung hi vüpoa nou buyu zhingaoe, alia rheiluki pfüyu ae rheipfüyu ngaobamaitao sü puh nghiki koure.

⁷Puhnou reive Eye ngaolou-a Eye kuyu donou E puh hi takoue.

⁸Ne thaowe? tea puhnou ahi noue, ‘E Amalek mai alie’ tea Enou chila peie.

⁹Süthaisü puhnou ahi paokhaie, ‘Haihi takouloua Eye southa peio! Eye zhishishowure, E thai vuzülaire, ana thailouho-a bubaie,’ tea puhnou paoe.

¹⁰Südonou Enou takou puhye southa peie, daisounou touyuo puh sü kaolou chezü thai-a bailaire touyu Enou süe, süthai puhvei vepeirü alia baokha sü poloua ne hi pove peiwe, aduwo.”

¹¹David nou ko sü choulou-a puh sü levea sholou-a nou puhvei sabanü hai paiphawure, ae puhye koa buyu maitao-a puh nou souyu büa soure.

¹²Puletao hai leveasho-a heamajü toumo somoa lüa nou Saul ae Jonathan alia Ramai vei mai souyu Israel maitao donou dopfüe, daiolouzü reihbu hinou puletaoye mai alao southawure.

¹³David nou ko pfüve paopeiyu nahlepuna hisü “Ne daikinou veyu mai-e?” tea noue. Puh nou haibüa chila peie, “Ewo Amalek mai alie, ana E nevei teidei khevainou hrüwe.”

¹⁴David nou puh hi paoe, “Ne daizhou khu vei-a nou Ramai nou dopeiyu Veoye southawe?”

¹⁵David nou puhvei mai aliye kulou-a paoe, “Puhye southawo!” Mai nanou hounaye sü southawure.

¹⁶David nou Amalek puona hi paoe, “Ramai nou dopeiyu veo sü nenou southawure tea paoyu vanou pa-a buyu vah sovei nasü lah nenou pfüve-a baie.”

¹⁷David nou Saul alia puh nahpoutu Jonathan ye donou dopfüa kouli haina hai lie.

¹⁸Kouli haina hai Judah maitao hi doupeio tea paoe alia kouli haina sü Jashar touyu larübü hi rüthou khaitoue.

¹⁹“Oh Israel, nevei süthai-apei maitao sü deichi hinou southawure! Khuvei kayu reihmaitao sü kabüa kaodua baidesa!”

²⁰Ko haina hai Gath mai hi paoso, Ashkelon mai ludu hi ki paoso. Haiko hai süloua Philistin maipfütaoye panou lesaso; hee bimoyu maipfüye panou asayu sü souso.

²¹“O Gilbon deichitao hisü chuthai teirü moa vidzü panou koupu khaiso; nevei doutao sü panou thoudzü ae rashithou ali koute shikhai noue! Daisounou touyuo ne hinou veo vei rü sü panou hraongu ngaore, Saul veo vei rü sü theadzü napeia sousheepu peimore.

²²Jonathan vei lou alia Saul vei khoche sü soureihmai vasou alia zhe hai choulou monou khaiveyu hae.

²³“Saul alia Jonathan, puh haisü khupa soue ae leshi shoe; hri-a bukia ae athai hia puh haisü alikhei sou-a hrüe; puh haisü leche jünou thasho hie, souveo jünou khoupu hie.

²⁴“Oh Israel hi naotu maitaore, Saul ye donou dongai pfüpei khaio! Puh nou neletaoye sabanü veinou tupeie alia muteiyu zhusana ae sana khenou zhainga soupeie.

²⁵“Poutu khekai veitao sü reih hinou kaodutare, Jonathan sü deichi pei hinou kaodure.

²⁶“Athaihou Jonathan, ne vanou E sü ngai ngaidu soure; ne hai Eye donou daizhouzhou leshisa! Eye donou nevei leshi sü khupa soue, leshipai vei lesha jünoua duhie.

²⁷“Poutu khekai veimaitao sü kaodutare, Puletao vei reih baseitao sü hatare.”