Read Poumei Naga 2 SAMUEL 10 Bible Online

2 SAMUEL 10 - Poumei Naga bible

2 SAMUEL 10

¹Haibüyu teile phaki Ammon mai Veo Nahash sü thaire, ae puh nahpoutu Hanun nou vekou loue.

²David nou paoe, “E Hanun hi leshiyu samai khamai aveih alie touyu soungao molouzü shie, daisounou touyuo puh puo Nahash nou raiki ahi tebüa soupei khaitoue.” Südonou David nou kopomaiye seiho panou puh thaosou levea dopfüyu chi paopeie.

³Ana Ammon maivei süthai-apei maitao nou veo Hanun hisü haibüa paoe, “David nou mai haitaoye seiveyu hai cheche vuzünou ne puoye tsükhouyu donoue tea ne chowu? Sütou khaimoe, puhnou mai haitaoye seive Etao vei teidei sühao zhulou-a reih huloure donou baie.”

⁴Südonou Hanun Veo nou homaitaoye sü nüloure alia puletao vei mümai dahli hai saipeie ae puletao vei sabanü sü teike hinou paipha laipeia nou puletaoye sü seidakhai tapeiwure.

⁵Puletao hai ki hi dakhai ve hraore. David nou ko hai choulou-a puletao vei mümai paopa loumo koute ki hi dakhai vemoa Jeriko hinou chao-a buo tea kopao tapeie.

⁶Ammon maitao nou chuo puletao hai David ye hraiyu mai soure touyu sü lah süloua Bethrehob alia Zobah hinou Sairia maivei reihmai thekai ngaloure, Tob hinou mai thekiahai, alia Maakah vei veo hinou reihmai theli hai ngaloure.

⁷Ko hai khesü David nou sülou-a puhvei reihmai hrülaiye Joab panou salou-a tare.

⁸Ammon maitao nou lah puletao vei nuhdu Rabbah hi talou bomü hinou tapa vyalou-a souda loure ae Zobah alia Rehob hi buyu Sairia maitao, Tob alia Maakah hinou veyu maitao tea vakou deika hinou vejüloua souda-a buloure.

⁹Ngaoba maitao nou thailao alia palao nou huloulai touyu Joab nou ngaoloure. Südonou puhnou Israel reihmai veikayu maitao sapalou-a Sairia reihmai nou huloure hilao khailoure.

¹⁰Süthaisü Israel maivei reihmai shotaosü puhvei thaihou Abishai ye panou sa-a nou Ammon maitao hilao khaipeie.

¹¹Joab nou puh hi paoe, “Hakinou Sairia maitao nou ajünou veiloulai na toulouzü, nevei maitao-a sa-a kou Eye soukha peio, alia Ammon mainou ne jünou veilou laina toulouzü avei maitao-a sa-a kou neye soukha peilai.”

¹²Khouchilo ae khuveilo! Etao vei maitao donou alia Etao Ramai vei nuhdutao donou eihtea reih zülai. Ramai MAPAO vei jüpa alia lelih nasü panou soulou theo.

¹³Joab alia puhvei maitao nou takou peikhaie Sairia maitao sü tuta-a baire.

¹⁴Sairia maitao tutayu hai Ammon maitao nou ngaolou-a puletao-a tupoa lah puletao nuh hi loutare. Süthaisü Joab nou puhvei reihmaitaoye sa-a Jerusalem hi khaivere.

¹⁵Sairia maitao hai Israel mai hinou pah shiyu ngaore tea puletao nou Sairia maivei reihmai hrülaiye kuve jüloure.

¹⁶Veo Hadadezer nou Euphratis rei polaova, teinghi palova nou buyu Sairia maitaoye sü tave puhye soukhare donou kure. Südonou reihmaitao sü puhye soukhare donou Zobah hi Veo Hadadezer vei reihmai peichana Shobach nou sa-a Helam touyu buh hinou tave soudaloure.

¹⁷Ko sükhesü David nou sülou-a puh vei reihmai hrülaiye salou-a Jordan Rei tachopalou-a Sairia mainou buyu buh Helam hisü tave reih sü soutare,

¹⁸ae Israel maitao nou Sairia maitaoye sü hupoa thai tsütare. David alia puhvei maitao nou Sairia mai rheiluki pfüyu mai kaihnai alia rhei pfüyu mai the raidai southa peie alia Sairia maivei reihmai peichawo Shobach ye zhipeiwua puhsü reihbu hinou thaire.

¹⁹Veo Hadadezer khenou buyu vemaitao hai Israel maitao nou reih veilouyu sü ngaolou khaie, puletao nou reih züpu more donou puhye koa kaonayu vei vo souloure, ae puhvei khakhe hinou hrüa baire. Sairia maitao sü chuwo Ammon maiye soukha peipire.