Read Poumei Naga 2 SAMUEL 13 Bible Online

2 SAMUEL 13 - Poumei Naga bible

2 SAMUEL 13

¹David nahpoutu Absalom hai tupai ali Tamar tea hüvei sho-a bue. Amnon tea kuyu David nahpoutu kukhe ali-a bue, puh sü Tamar ye leshi loure.

²Puhnou Tamar ye leshi zhuleyu donou puhsü soua nou bure, daisounou touyuo puhnou leshi-a buyuma Tamar ye nalou hoyu tsücho poshu veasho loure, puh sü loumaina aliyu thaifüa maiye tarasou-a panou daomoe.

³Do ashi chosü shoyu puh vei samai ali bue, puh zhih sü David thaihou Shammah vei samai nahpoutu Jonadab tea kuwe.

⁴Jonadab nou Amnon hi paoe, “Ne sü vemai nah alie, ana ne hai teitheli shu shilailai shilailai-a ngao-a baire, ne le vamoyu buho daisoue?” “E athaihou Absalom tupai Tamar ye leshi loure,” tea Amnon nou paoe.

⁵Jonadab nou puh hi paoe, “Ne souyu khokho soulou-a züphao hi zülo, ne puo nou neye ve zhu-a chayu phaki haibüa paolo, ‘Apuo, leshia Tamar ye panou ve Eye kipeio, puhye panou hai hi ve anghingao hinou touso kholou-a Eye panou touso soupeio,’ tea ne puo hi paolo tea paodou peie.

⁶Südonou Amnon nou souyu khokho soulou-a züphao hinou züloure.” David veo nou tave puhye zhue alia Amnon nou puh hi paoe, “Puo, Tamar ye panou ahi ve anghingao hinou raokhao khaolou-a puhye panou Eye souka peio.”

⁷Südonou David nou Tamar ye tave Amnon ki hinou puh vei touso kho-a soupeio tea chi paota peie.

⁸Tamar nou ae tea veyu phaki Amnon sü züphao hinou zü-a ve ngaoloue. Puhnou sou chitea polou-a puh nghingao hinou raokhao khaolou-a

⁹raokhao toulo tea pokou peie, ana puh nou toubare. Puh nou “Mai kukhemaiye panou vakou pakhai toulo,” tea paoloure, südonou mai kukhe maitao hai takhaire.

¹⁰Süthaisü puhnou honapai hisü paoe, “Nenou raokhao polou-a avei züphao hi pokou nebah nou Eye soukapeio.” Honapai nou raokhao sü polou-a puhvei züphao hi koure.

¹¹Honapai nou raokhao sü toulo tea bah thaikouyu phaki, Amnon nou puhvei baokao sü kethai loure ae puh hi haibüa paoe, “Eye koa zülaikhe.”

¹²Honapai nou chila peie, “Moe, ne Eye taitsü-a avei hrü souzhowuso! Vah haipaitya hai Israel mainou souyu zhaimoe, hashi haipaitya soukhai touso.

¹³Vah haibüyu paitya soulouzü E daitoulai? Avei hraongu sü kakua E pfüloulai? Ne-a daitoulai? Zhuvea nou Veo hisü rai-a noulo, sükulouzü Eye puhnou ne hi peivuzüa bailai.”

¹⁴Ana honapai nou paoyu sü puhnou halia keipei baloure, puhnou Tamar jünou khouchi puyu donou puhye sü taitsü-a sazü peiwu baire.

¹⁵Sazü louyu thaisü, Amnon nou Tamar ye sü ngaora sholoure, raiki puhnou leshiyu jünou dupu-a puhye sü ngaora loure. Puh nou “Taha toulo!” tea paoe.

¹⁶“Talai moe, haibüa Eye hulaiyu hai nenou Eye sazü louyu mah jünou dupu hie,” tea honapai nou paoe, ana Amnon nou ali-a aetou bare.

¹⁷Puhnou puhvei kilai maitaoye kulou-a naotu hainapaiye sa-a anghingao hinou tapeio! Honapaiye süthaipa laiwu-a kikhu tangi peio tea paore.

¹⁸Süthaifüa Amnon vei kilai maitao nou Tamar ye sü kijü süthaipa peiwua kikhu tawure. Tamar nou zao chazha touyu alia baokao soyu zao ali nouwe, haihai nghimoyu vemai nah naotumai nou zhaoyu zhaoe.

¹⁹Puhnou vounai nou pei bosholou, puhnou zaoyu zao nasü paiphawu-a bah nou pei vaopoa kra-a tare.

²⁰Puhvei prou Absalom nou haisü ngaoloua puh hi noue, “Ne prou Amnon nou neye sazüwu baivu? Atupai ne chuo hai donou krapu soubaio, puh sü lah ne prou baie, maili hia paokhaiso.” Sübüa Tamar sü leveasho-a puh prou Absalom ki hinou bure.

²¹Veo David nou ko hai sülou-a rarou shore.

²²Ae Absalom nou Amnon hi halia chakhai toumoe, ana puh tupaiye taitsü-a sazü peiyu donou Amnon ye ngaorasho-a bure.

²³Po ahai thaisü, Ephraim teidei nghia buyu Baal Hazor hinou Absalom vei zhaotu mai saiyu phaki, Absalom nou veo nahpoutu maitao hrülaiye ko-a ve nüh nüzhore donou kue.

²⁴Absalom nou David veo hi paoe, “Puo veowo, Enou avei zhaotu mai sailai, südonou zhuvea-a nou veo alia ne khehi buyu peikhomai hrülai nou khonüh nüyu hisü velou peilai moge?”

²⁵Veo nou chila peie, “Moe, anahna, Etao mai hrülai velouzü neye donou kou süle-e.” Absalom nou kukhai kukhaiyuma veo nou bare, ana puo nou puhye sü ha peie.

²⁶Ana Absalom nou paoe, “Neletao nou velou hoyuma, avei thaihou Amnon sü panou velou peilai homoe?” “Daidonou puhye vemolouzü shia?” tea veo nou nouloure.

²⁷Ana Absalom nou veo nahpoututao teitei nou veloupeio tea kutei loure.

²⁸Absalom nou puhvei kilai maitao hi haibüa kharochi peie “Keilo, Amnon nou zhaoh sozhi loure toulouzü, Enou paopeilai, Amnon ye southawo. Pikhai touso, Enou dathawo tea lüpei-a baie, piso, khuveilo.”

²⁹Südonou Absalom vei kilai maitao nou Amnon ye dathawure. Süthaisü veo nahpoutu kukhetao hai tashu lahkuku vei rheisüh pfülou-a tuvai tare.

³⁰Puletao nou sübüa ludu kounou tu-a buyu phaki, Absalom nou veo nahpoutu mai hrülaiye sü southa khaire she tea ko sü ve David veo hi paopeie.

³¹Sütea sülouyu donou Veo David nou tashu lalou-a puhvei sabanü sü paipha-a deiphi hi kaokou züre alia puhye koa buyu kilai maitao-a sübütoua soure.

³²Ana David vei jürai Shammah nahpoutu Jonadab nou paoe, “Veo, ne nahpoutu hrülai ye southa moe, Amnon likhei southa-a baie. Daisounou touyuo puhnou Absalom tupai Tamar ye taitsüa sazü peiyu teithe hinou haibüa soulai tea puhvei lekha nou lelapoa buyu sü puhvei khaozhai hinoua süwe.

³³Südonou ne nahpoutu taoye southa khaiwure tea paoyu sü loucheso, Amnon likhei southa-a baie.”

³⁴Sübüyu teile hinou Absalom-a tutare. Süthaibü hi veo vei reihkhao maitao nou mai alao hai Heronaim deichi hinou takouyu zhingao lou-a sü ko hai veo hi paongao-a bue.

³⁵Mai taitaosü Enou ne hi paoyu büa nevei nahpoutu maitao baie tea Jonadab nou David veo hi paoe.

³⁶Sübüa paocheyu thaibü, David vei nahpoutu maitao sü veloure; puletao nou shusoua kra rapare, ae David alia puhvei maitao-a shusou-a krae.

³⁷Süphaki Absalom sü tupoa Geshur hi veo, Ammihud nahpoutu Talmai hi ve po asü bure. Alia David sü teithetsü puh nahpoutu Amnon ye donou dongai pfüa bue.

³⁹Amnon thaiyu vanou dopfüyu halou khaie, chuo veo sü puh nahpoutu Absalom ye licholou-a leshi pare.