Read Poumei Naga 2 SAMUEL 14 Bible Online

2 SAMUEL 14 - Poumei Naga bible

2 SAMUEL 14

¹Veo David nou Absalom hathai hai bushi sho-a puhye vuzhiyu hai Joab nou ngaoloure.

²Südonou puhnou Tekoa hi buyu kaishoyu naotumai aliye puh hi ve-o tea kuveloue. Puhnou naotupai hi paoe, “Ne dopfüyu zhaido soulo, dopfüyu sabanü nou banoulo, nevei pei kumoa peishu haokao-a pfülo. Teile sosho-a dopfüyu naotu ali zhai soulo.”

³Sükia tulou-a nou veo hi tave Enou ne hi paodou peiyu büa paolo, Joab nou naotupai hisü haibüa paolo tea paopeie.

⁴Naotupai nou veo hi tavelou-a puhye tsükhouyu zhai hinou nakou khurülou-a haibüa paoe, “Eye soukha peio, Puo Veo!”

⁵“Ne dai jüpawe?” tea Veo nou naotupai hi noue. “E lelou hoyu mimeapfü alie, aduwo avei chapu sü thaire.

⁶Aduwo, avei nahpoutu ahai bue, teitheli puhai thaihou jürai hai sü rekounou züvapa loure, puhai chinaye mou khopeire mai ali-a hae, sütea china haisü davalou-a mai alinou mai aliye dathawure.

⁷Sütea chuwo avei tyarai mai hrülai nou tave lah thaihou jüraiye dathayu nasü peio, puhye dathawulai tea ahi pao-a bure. Puletao nou anahye datha louzü E sü nahmai lia ha-a bailaire. Avei chapu vei toudzü ali-a ha-a bailaire,” tea naotupai nou paoe.

⁸“Ne ki hi khaitawo, Enou nevei jüpa nasü vetere donou soupeilai,” tea veo nou chila peie.

⁹“Veo, nenou avei jüpana soupei-a bukhai-a avei tyarai maitao sü avei kikhamai pei hi puletao vei rarou nasü bua bailai, veo kikhamai mah moe tea bailai,” tea naotupai nou paoe.

¹⁰“Mai talinou neye pira-a chi paolouzü, mai süna sü ahi saveo, puhye panou neye pi-rapu khailai moe,” tea veo nou paoe.

¹¹“Veo, zhuvea-a nou avei tyarai maitao nou khüngu phou-a nou avei nahye southawu-a dupuyu mahmo soulou more donou nevei Ramai hi veachi paopeio,” tea naotupai nou paoe. “Ramai zhih hinou ne hi chaachou soua paowe, süolouzü nevei nahye sü halia soushi souvea khaitou laimoe,” tea David nou chila peie.

¹²“Veo, zhuvea-a nou Eye panou chi ali ne hi paopu lourai-o,” tea naotupai nou khoe. “Paokhaio,” tea veo nou aetou peie.

¹³Naotupai nou paoe, “Ne daisounou Ramai vei mai pei hi kaomoyu souwe? Nuh hinou tutayu lah nevei nahpoutuye sü panou ki hi dakhai velou moe, südonou chu lah nenou pao-a buyu sü lah nenou neye kaomoe tea paowe.

¹⁴Etao mai hrülai thaikhai toulai; Etao hai deiphi hi dzü lakouyu büa baie, deiphi hi lakouyu dzü sü podakhai louhoe. Ana hrü toulia Ramai nou polaiwu moe, sükure thaosü puhnou pa dou-a tamore donou hulai khaitouyu maiye donoua puhnou ludu aveih ali phoupeiwe.

¹⁵Enou chipao hai hai veo ne hie paore donou ve-a baie, daisounou touyuo maikhe mai hai ne hi ve paoyu sü ngaopire, naotupai Enou veo ne hie hai hai paolouzü avei akho nasü nenou soupei moa baipai moe tea chowe.

¹⁶Veo nou avei akho kei-nou pei-a E alia avei nahpoutu ahai pfünaye southawu-a Ramai nou puhvei maitao hi peiyu teidei hinou souhawure hinou ahaiye khailupa peimoa baipai moe tea chowe.

¹⁷Nevei kilaipai Enou paowe, süolouzü veo nenou ahi paohpeiyu chipao vanou Eye panou kaona-a soyu ngaolo, daisounou touyuo Veo ne sü havei hashi sükuyu rakivamai kheihaoe. Nevei Ramai MAPAO nou neye sa-a laipeiyu soulou theo.

¹⁸“Enou ne hi chi ali noulai, ne dayu ae kheiyu ali-a hazei tea ahi khepeio,” tea veo nou naotupai hi paoe. “Noure sü noupei khaio, Puoveo,” tea naotupai nou paoe.

¹⁹“Nenou souyu teitei hai Joab vei tsü hinou mowu?” tea veo nou noue. Naotupai nou paoe, “Avei veo nou hri-a busasü, maita linou-a bakha zhoulo mokhai-a bakha nalao tarei loure hae, cheche vuzüe, ouvai haibüa soulo, haikia paolo touyu pfüphou hai nevei kilaio Joab nou ahi paodou pei-a baie.

²⁰Ana haisü puhnou souvei souzü loure donou sou-a baie. Newo Ramai vei rakivamai büa tsüdo aveih sü ne hi bue, pa-a buyu pfüphou sü nenou sükhai-a bue.”

²¹Süthai veo nou Joab hi paoe, “Nenou jüpa-a buyu nasü panou souloure donou ale laloure. Taho nahle puona Absalom ye salou-a hai hi dakhai velo.”

²²Joab nou veoye tsükhou sho-a nou deiphi nakou khurüa nou paoe, “Veo, neye Ramai panou hra peitheo! Chuo nenou Eye leshie touyu Enou süloure, daisounou touyuo veo nou avei akho sü aetou peiwure.”

²³Süthaisü puhnou tashulou-a Geshur hi ve Absalom ye salou-a Jerusalem hi dakhai vere.

²⁴Sütou-a bukhai-a, veo nou kharochi ali peie, süolouzü Absalom ye panou veo ki hi velai moe, lah puh vei ki hinou pa buo, “E puhye ngaonü moe,” tea veo nou paoe. Südonou Absalom hai lah puhvei ki hinou hrüa bubaie, ae veo vei nghoujü hi vekhai toumoe.

²⁵Israel mai hrülai hi Absalom büa hüveiyu ae kaiyu mai kusü ali-a hae. Puh hai pei hinou phipha koute hai shiyu ali-a hae.

²⁶Puhvei peishu hai shoushoe, ae puhnou puhvei peishu hai sosho-a pfüpailou holai nou po ali hi vuli bi-a baiwe. Bipayu peishu sühyu hai sühdou ahai jünou la-a douloue.

²⁷Absalom hai nahpoutu asü bue, ae hüvei shoyu nah naotupai ali Tamar tea bue.

²⁸Absalom nou potei ahai sü puh vei puo David veo daokhai timoa Jerusalem hinou hrüe.

²⁹Süthaisü Absalom nou Joabye panou puhye donou puh puoye daopeire donou kue, ana Joab nou veba-a baire. Süthai-a Joab ye kupue, ana Joab nou veba-a baire.

³⁰Südonou Absalom nou puhvei kilai maitao hi paoe, “Joab vei dou hai avei dou dasa-a bubaie, puh vei dou hi barli thou thoukhaitoue, taho meinou deikhai peio,” tea paoe. Südonou kilai maitao nou taho dou sü mei saopei-a deikhaiwure.

³¹Süthaisü Joab nou Absalom ki hi ve paoe, “Daisounou ne vei kilai maitaoye panou avei dou sü mei deiwe?”

³²Absalom nou Joab hi chila peie, “Avei ki hi vepeio tea neye ku ahai khoe, anou ne sü vepei bare. Neye panou veo hi ve ‘Eye daisoulai tea Geshur hinou hai hi savewe, E hai Geshur hi bubaiyua vei-a baimowu?’ touyu hai nasü Veo hi neye panou paopeire donou neye kuwe. Südonou chuwo E veoye ve daonüwe, chukoutea E hai mah buhie toulouzü veoye panou Eye southa peio.”

³³Südonou Joab nou talou veo ye dao-a paopeie, süthaisü veo nou Absalom ye vewo tea kure alia Absalom nou tave veoye deiphi kaokou loua khurüe alia veo nou Absalom ye münou mu-a kholoure.