Read Poumei Naga 2 SAMUEL 15 Bible Online

2 SAMUEL 15 - Poumei Naga bible

2 SAMUEL 15

¹Süthaisü Absalom nou rheiluki, rhei ae puhye khosa-a tare mai raingou doposhu khailoure.

²Puhnou shona tashulou-a nuhdu hi taloure rokhubomü pe hinou tave la-a buloure. Mai talinou chilou kupeire donou veo hi paolai tea veyu phaki, Absalom nou sümaiye sü kulou-a ne daikinou, ae nuhdu kana hinou veyu maie tea noulouwe. Mai nanou puh hi E khü tena hinou ve-e tea puh hi paongao peiyu thai,

³Absalom nou haibüa paoe, “Nevei chi-lou hai kupeiyu thaio, nenou veilou vuzülai, nenou züwe, ana zhaodao chilou kupeire donou veo nou chiku peire mai dokhai peimoe.”

⁴Puh nou haibüa paopue, “Hakinou Eye nou kupeio touyu thaio, mah-zü thaifüa cheche hinou Enou soupeilai monou.”

⁵Mai talinoua puhye tsükhou-a khurüre donou puh nghoujünou nakouyu phaki, puhnou takou mai sünaye sü kholou-a münou mu-a teipeie.

⁶Haibüyu zhaidou hai Israel mai khü tyatyalih hinou chi-lou kupeire donou veo hi paongaolai tea taveyu mai hrülai hisü, puhnou soungaopei-a maikhe mai tsüle sü lah puh hi süthaikou khailoure.

⁷Haibüa soukouyu po adai thaisü, Absalom nou veo David hi paoe, “Enou soulai tea Ramai hi paohkhai touyu nasü taho soure donou Eye panou zhuvea-a Hebron hi tare donou aetou peio.”

⁸E Sairia levai buyu Geshur hi hrüyu phaki, “Ramai nenou Eye panou Jerusalem hi dakhai velouyu thaio, Hebron hinou tave neye tholai,” tea Enou chaachou soukhai toue.

⁹“Kaona-a tawo,” tea veo nou lühpeie. Südonou Absalom sü Hebron hi tare.

¹⁰Ana puhnou haibüa paore donou Israel mai khü teitei hisü kheichi paomai seitawure, süolouzü, “Neletao nou shabe houyu kho chou louzü, ‘Absalom nou Hebron hinou veo souloure’ tea nou shapalo tea paopeie.”

¹¹Jerusalem hinou mai kaih-hai sü Absalom nou sapoa tare, puletao louzü haibüa pare vei shohdo ashi hai sükhai toumoa ta-a baie.

¹²Puhnou Ramai ye posheela-a buyu phaki, puhnou maiye seiho Gilon nuhdu hi buyu David veo vei paodou-apeio Ahithophel ye-a puh hi kuve loure. Haizhai büa Absalom vei khei shohdo nasü khouchi lailai paloure alia me dulailai paloure.

¹³Kopomai ali nou tave David hi paoe, “Israel mai hrülai vei tsüle sü Absalom hi bubaire.”

¹⁴Süthaisü David nou puhye koa Jerusalem hi buyu puhvei peikho maitao hi paoe, “She, tutalou molouzü Etao hai Absalom hinou turei palou holaire. Thalasou tutalou molouzü puhnou Etaoye nüloua bailai, sübüa nuhdu hi mai hrülaiye southawu shulai.”

¹⁵“Veo, nenou hai kulai tea paoyu süna thaifüa tare donou Etao mai hrülai nou souda-a bue,” tea puhvei peicha maitao nou khüpeie.

¹⁶Veo vei kihikhamai hrülai sü veo ye koa tashure; ana puhvei vebuh kina kholoure donou puhvei khapapfü mai kirou sü ki hi thaokhaitea tare.

¹⁷Veo alia puhye koa salaiyu maitao nou nuhdu nasü thaokhaiwua tayu phaki, puletao nou tapoa kou nuhdu vei kaidu khahi buyu ki hinou takou chao-a bue.

¹⁸Veo vei maitao nou takhe railou-a raitare donou vyakheyu phaki, Veo khehinou adumaitao nou veoye kho-a nou zha-a bue. Gath hinou veo thaifü poa tayu reihmai kaih aroutao-a tapoa veo nghoujü nou vyakhere.

¹⁹Veo nou puletao peikhowo Ittai hi paoe, “Daisounou neletao athaifü tawe? Dakhai ta-a baio, khaive veo ashunaye koa hrüo. Neletao sü shejümai baie, lah nuh thaowu-a ve bai-a hrüyu maitao baie.

²⁰Neletao hai phajü touli hai hi ve hrüa baihie, südonou neletaoye daisounou pa Eye koa tasühao khailaige? E daiki velaisa touyu buh koute-a sümoe, nevei maitaoye sa-a dakhai tawo, Ramai ye panou neletaoye zhuvea leshi peitheo.”

²¹Ana Ittai nou “Veo, E Ramai zhih ku-a ne hi paowe, süolouzü, thailai touyuma nenou tayu hisü E teisa nou ne thaifüa ta-a bailai,” tea paoloure.

²²“Sütouyu thaisü veishore, takhe khaio!” tea David veo nou paopeie. Südonou Ittai alia puhvei maitao ae kikhamaitao hai veo nghoujü nou zhapo-a khere.

²³Veo alia puhvei maitao nou nuhdu thaowu-a tapayu phaki, nuhmai hrülai nou rasou krare. David Veoye thaifüpoa puhvei maitao hai Kidron rei tachopoa rekou talou tare.

²⁴Levi mainou Zadok napao koa Ramai vei Vo Sübvü nasü kaopoa nou ta-e. Vo Sübvü sünasü maikhe mainou nuhdu tala loumo koute posho khaiwure, alia Napao Abiathar nou puletao tala loumosa sü ratho-a posheela peie.

²⁵Süthaisü veo nou Zadok hi paoe, “Ramai vei Vo Sübvü nasü podakhai ve nuhdu hi khaipeio. Hakinou Eye Ramai nou leshi peilouzü, Puhnou Eye sa-a dakhaive panou süna alia puhnou buyu buh nasü ngaopulou shulai.

²⁶Ana puhnou Eye jüpamo louzü, E sü daisoukhai; puhnou sounüyu nasü panou soulou theo.”

²⁷Veo nou Zadok napao hi paoe, “Ne sü vepare ngaoyu mai movu? Nuhdu hisü kaona-a ne nahpoutu Ahimaaz alia Abiathar nahpoutu Jonathan ye sa-a dakhai tawo.

²⁸Ne hinou ki laova ko khesü süloumo koute rei kachopa nghiphao deika hinou E kho-a nou bulai.”

²⁹Südonou Zadok alia Abiathar nou Vo Sübvü nasü poloua Jerusalem hi dakhai tare alia sühinou ve bure.

³⁰Ana David veo sü sah nou pei hopfüa, phikha koute-a pfümoa kra-a lukhu Oliv Deichi vasü taokhere. Puhye sa-a tayu mai hrülai-a sah nou pei hopfüa kra-a nou deichi vasü rakhe tare.

³¹Sübüa buyu phaki, mai alinou “Ahithophel-a Absalom ye koa lou dozho tare,” tea David hi paopeie. Südonou David nou haibüa nou paoe, “Oh MAPAOwo, Ahithophel nou tsücho-a soupfüyu pfüphou sü panou hamoko soupeio.”

³²David nou tapoa deichi peitaoh hi, maikhe mainou Ramai ye thoyu buh ali hi pate louyu phaki, puhnou louche shoyu Arkit puona Hushai nou puhvei sabanü sü paiphawua ae puh pei hi nai bosholoua tave puhye daolai tea bure.

³³David nou puh hi paoe, “Nenou Eye koa tayu thaisü, ne sü Eye halia soukha louhoe.

³⁴Ana nenou nuhdu hi dakhai velou-a Absalom hi ‘E ne puo ye donou kuvah soupeiyu büa ne hi-a soupeilai tea paolo,’ süthaisü nenou Ahithophel nou paoyu chitao sü poba peilou süsa poba peilou louzü, sübüa nenou Eye soukha peilou süe.

³⁵Napao Zadok ae Abiathar puhai-a sühi bue. Nenou veo ki hinou daidai sülou chou louyu teitei sü puhai hi ve paopeio.

³⁶Zadok nahpoutu Ahimaaz ae Abiathar nahpoutu Jonathan puhai-a sühi bue. Nenou chipao taralia ahi paore bulouzü, puh haiye panou ahi ve paopeio.”

³⁷Südonou David vei samai Hushai sü nuhdu hi dakhai veyu teile bühisü Absalom nou nuhdu hisü veloure.