Read Poumei Naga 2 SAMUEL 20 Bible Online

2 SAMUEL 20 - Poumei Naga bible

2 SAMUEL 20

¹Benjamin khü hinou Bikri nahpoutu Sheba hai zhaidou loumoyu mai ali bue. Gilgal hinou puhnou shabe houpalou-a haibüa paoe, “David veo hi Etao zha halia hae, Jesse vei nahpoutu ye Etao zhoyu hae! Oh, Israel maitaore, lahkuku ki hi vetarao!” tea shapa peire.

²Südonou Israel mai hrülai nou David hi bumoa Bikri nahpoutu Sheba thaifü tare, ana Judah maitao nou David veo hi bulou-a puhye paoh po-a Jordan hinou Jerusalem hi vepeie.

³David nou Jerusalem vei vebuh hi khaive louyu phaki, puhnou puh vei khapapfü kirou tao panou puhvei ki khore donou ki hi thaokhaiyu puletaoye ki alihi save khaiwu-a puletaoye khopeire mai khaipeie. Puletaoye donou tou-so soupeie, ana sazü-sabuyu soumoa mimeapfü bütou tea puletao thaimo koute sübüa panou hrüe.

⁴Süthaisü veo nou Amasa hi paoe, “Ne Judah mai hrülaiye kujüloua teithe asüzhou puletaoye koa ahi vewo.”

⁵Amasa nou Judah maiye kutayu teile sü veo nou paohpeiyu teile jünou loupure. Taizhou khaivelo touyu zhou khaivelou more.

⁶Südonou veo nou Abishai hi paoe, “Absalom nou Etao hi veahoyu peiyu jünoua Sheba nou Etao hi veayu hai pfüvepu peilou veie, avei mai taoli salou-a puh thai ngoutawo, sütou molouzü puhnou reihbuh khotou khaitea buyu nuhdu hi loulou-a Etao hinou tureipa loushulai.”

⁷Südonou Joab vei maitao, veo ye khoyu maitao alia reihmai hrülai Abishai ye koa Sheba ye phoutare donou Jerusalem hinou tapare.

⁸Puletao nou tapoa Gibeon hi buyu chuhdu hi veyu phaki, Amasa nou Joab ye daoe. Süphaki Joab sü reihna tutoupfüa laie, puhvei khyakho hi khoche ali thoupfüa nou laie. Amasa nou puhye daolai tea takouyu phaki, Joab nou khoche sü paizhou paloue.

⁹“Asana, ne-a vei-a laibai moge?” tea pao-a puh vei bah zhoulao nou Amasa vei mümai hinou pailou-a münou mülai tea soue.

¹⁰Joab bah hi khoche poyu Amasa nou ngaolou moe, südonou Joab nou puh vei pou hi khoche nou khüpei-a rai koute vakou küpare. Puh sü sübüa thaiha baire, südonou Joab nou khüpu more. Süthaisü Joab ae Abishai nou Bikri nahpoutu Sheba ye phoutare.

¹¹Joab vei mai alinou Amasa vei thaiphao pe hinou lalou-a “Joab alia David veo maie touyu maitao sü Joab thaifülo,” tea shapeie.

¹²Amasa vei thaiphao sü zhe khaitea ludu toutsü deihinou bue. Joab vei maitao takouyu hrülai sü thaiphao ngaolou-a chao-a zhuzhu-a baire. Südonou puhnou thaiphao sü süthaipo-a ludu pe heihro lihi laithouwu-a sah alinou hokhaiwure.

¹³Sübüa thaiphao sü sükuyu thainou mai hrülai nou Joab thaifü poa Sheba ye phoutae.

¹⁴Sheba nou Israel mainou hrüyu nuh veishi alia khü teitei tasühaowu-a dakhaive Abel Beth Maakah tea kuyu nuhdu nahi bue. Sühizü Bikri khü-zhaimai teitei-a nuhdu taina hinou ve koa jüa bue.

¹⁵Joab vei maitao nou Sheba tuve bue touyu süloure, südonou puletao nou tave nuhdu tainaye sühao loure. Nuhdu süna vei kivo khosühao khaitouyu thailo nou khoku-a nainou taosühao loure. Bouvo nasü soukhaore donou bouvo phi sü rao-a bue.

¹⁶Nuhdu taina hisü tsü veishoyu naotumai ali bue, puhnou eitya bouvo hinou shae, “Haihi Joab ye takou tea kupeio, E puhye koa chi phalai,” tea share.

¹⁷Joab nou sühi vere alia naotupai nou “Ne Joab chechevu?” tea noue. “Oungai E-e,” tea puhnou chila peie. “Ne apai keilo,” tea naotupai nou paoe. “E kei-a bue,” tea Joab nou khüpeie.

¹⁸Naotupai nou paoe, “Dao daonou haikua nou paoyu ali bue, ‘Haibülai touyu akhai vei chila na jüpa louzü Abel nuh hinou ve noulo,’ sütea akhai vei chito nasü soulou she.

¹⁹Eh nuh hai Israel mai nuh hrohinou nuhdu alie, kaonayu nuh, ae paochi züveiyu nuh alie. Ne daisounou nuh hainaye souhawulai tea tewe? Ramai vei nuh ali sou-a buyu nahai nenou souhare jüpawu?”

²⁰“Sütou khaimoe, Enou hakilia neletao vei nuhdu haina hai souha laimoe.

²¹Sübüa soulai tea Enou cho moe, ana mai ali Ephraim maivei deichi hinou veyu Bikri nahpoutu Sheba ye phou-a baie, puhnou David veo ye duyu vah souwe. Mai taina hai Etao bah hi thaothou peio, sütou louzü E avei maitaoye sa-a khaita-a bailai,” tea Joab nou chila peie. “Etao nou puh vei pei delou-a kivo hinou laichopa ne hi peilai,” tea naotupai nou paoe.

²²Süthaisü naotupai nou haibülai tea cholouyu nasü koa puh vei nuh maitao hi taho chi phatare alia puletao nou Sheba pei delou-a Joab hi laipa peiwure. Sütea Joab nou khaita baio tea panou lahkuku nuh hi khaitare alia Joab nou Jerusalem hi khaive veo hi bure.

²³Joab nou Israel mai teitei reihmaitao pei aduo soue; Jehoida nahpoutu Benaiah nou veo khoyu maitao peikhowo sü soue.

²⁴Adoniram nou taitsü sa-a vah souyu maitao peikho-e; Alihud nahpoutu Jehoshaphat nou thai-dao donou larü rükhaina soue.

²⁵Sheva nou chi-lou kuyu vei rü-apeio sü soue;

²⁶ae Jair nuh hinou veyu Ira nou David veo vei napao maitao hrohinou napao ali soue.