Read Poumei Naga 2 SAMUEL 21 Bible Online

2 SAMUEL 21 - Poumei Naga bible

2 SAMUEL 21

¹David nou veo sou-a hrüyu phaki po asü koute shishoa tokaayu hai vedao-e. Südonou haisü daidonoue tea veo nou Ramai hi kho-a nouyu phaki, “Saul kikhamai nou maiye southayu mah souwure, puhnou Gibeon hi maitaoye southawure,” tea Ramai nou paoe.

²(Gibeon mai hai Israel mai moe; puletao hai Amor maivei me taiti alie, puletaoye vupa peilai tea Israel mainou chaachou soukhaitoue, ana Saul nou Israel mai alia Judah maiye donou lenou soulou-a Gibeon maiye southa kawu bailai tea teloure.)

³Südonou David nou Gibeon maitaoye kuvelou-a puletao hi noue, “Enou neletaoye donou dai soupeiyu jüpawe? Neletao hi kaomoa soumah khaitouyu na thao sou-a Enou neletao hi soupei nüwe, sütea neletaoye panou MAPAO vei maitao pei hi ha peilai.”

⁴“Saul ae puhvei kikhamai ae Etao kohinou vamoyu nasü sana raka nou souha louhoe, mokhaia taivanou tea Israel mai kukheye southayu Etao nou jüpa moe,” tea puletao nou chila peire. “Sütoulouzü Eye panou neletaoye donou dai souyu kaoe tea neletao nou chowe?” tea David nou noue.

⁵“Saul nou Etaoye mai ali koute-a panou hrimoa southakhai nüwe. Israel mai teidei hi maili-a panou bulai moe tea choe.

⁶Südonou Saul vei tyaosholea hinou poutumai anai hai Etao hi peiwo. Puletaoye Ramai MAPAO nghoujü nou Gibeah nuhdu, süolouzü Ramai nou dopeiyu veo nuhdu hinou rainou daothalai,” tea puletao nou paoe. “Enou puletaoye neletao bah hi peilai,” tea veo nou chila peie.

⁷Ana puh alia Jonathan kohisü Ramai zhih hinou chaachou soukhai touyu donou Jonathan vei nahpoutu, Saul veo tyao Mephibosheth ye David nou shopeie.

⁸Puhnou Aiah napai Saul vei khapapfü Rizpa nou napeiyu Armoni ae Mephibosheth, süthaisü Saul napai Merab nou Meholah hi mai Barzillai vei nahpoutu Adriel ki ve-a napeiyu nahpoutu angou saloure.

⁹David Veo nou puletaoye sü Gibeon mai bah hi nüthou peiwure, puletao mai anaiye koa deichi hinou sa-a pa rainou daotha peie. Southou chachiyu teile, pouzü lapayu teile hinou puletaoye daotha peie.

¹⁰Süthaisü Saul vei khapfü Rizpa, Aiah napai nou ngulukha sahnou chuhphao hi haolou-a chachilou rairaikha teile hinou teirüyu teile vemo koute thaiphaotaoye kho-a bue. Heaki honapai nou raohou nou toure alia khei teile hisü resou nou toure kho-a nou bue.

¹¹Rizpah nou sübüa sou-a buyu ko hai David nou chouloure,

¹²südonou David nou taho Jabesh Gilead maitao hinou Saul alia puh nahpoutu Jonathan vei rao sü poloure. (Philistin mainou Gilboa tea kuyu deichi hinou Saul ye southayu teithe zhou puh vei thaiphao sü maisou nou jüyu buh Beth Shan hi khizhu khaitia buyu phaki, Jabesh Gilead maitao nou vaopove khaitoue.)

¹³David nou Saul vei rao, Jonathan vei rao alia Gibeon mainou rai daotha khaitouyu mai anai vei rao sü poloue.

¹⁴Sübüa puletao vei raotao sü polou-a Benjamin maivei dei Zela hie pove Saul vei puo Kish khü hi vupeiwure. Haibüa soulo tea veo nou paopeiyutao ali koute-a veimoa kilai maitao nou soupeie. Haithai nou Ramai hi veachi pao-a khoyu taosü Ramai nou keinou peie.

¹⁵Chu-a Philistin mai hai Israel maiye reih soupure. David nou puhvei maitaoye sa-a Philistin maiye reih züre donou takoure alia puh sü hrotei touloure.

¹⁶Ishbibenoub tea kuyu duso shoyu mai ali bue. Puhnou poyu heung pha nanou kilo asü-a dali pha süe, khoche ashu ali poloua puhnou David ye southa peilai tea paore.

¹⁷Ana Zeruiah vei nahpoutu Abishai nou takou David ye soukhalou-a puhye southawure. Tethai hai David vei maitao nou puh hi “Israel maivei meivabvü nasü nghita more donou ne Eh ye sa-a reih züyu buh hi tapuso,” tea paore.

¹⁸Haithai-a vuli Gob tea kuyu buh hinou Israel mai hai Philistin maiye reih zükhaie. Reih haina hi Hushath puona Sibbekai nou duso shoyu Saph ye southa peie. Saph hai Rapha vei tyaosholea maie.

¹⁹Süthaia Gob hinou Israel mai alia Philistin mai hai reih soupukhaie. Soureih haina hinou Bethlehem puona Jaare-Oregim vei nahpoutu Elhanan nou Gath hinou veyu Goliath ye southa peie. Goliath vei heung mü sü sah doyu mai douvao deie.

²⁰Süthai-a Gath hinou reih züpukhaie, reih taina hia mai duso shoyu ali, puh vei bah holao-hailao hai bah teutu aroukhei pfüe, phi-a phi holao-hailao vei phi teutu arou kheipfüe, phibah toutu hai kaidai bue. Puh-a Rapha vei tyaosholea maie.

²¹Puhnou Israel maiye tapawo, reih züvalai tea khoyu vanou, David vei jüraio Shammah vei nahpoutu Jonathan nou puhye southa peie.

²²Mai dusoyu mai adai haitao hai Gath hi hrüyu aduso tyarai sou-a hrüve khaitoue, puletao adai taoye sü David alia puhvei mainou southa peie.