Read Poumei Naga 2 SAMUEL 22 Bible Online

2 SAMUEL 22 - Poumei Naga bible

2 SAMUEL 22

¹Ramai nou David ye Saul bah hinou alia puhvei ngaobamai kukhe bah hinou vupa peiyu vanou Ramai hi David nou haibüa lou soue:

²Puhnou paoe: MAPAO sü avei chuhdu-e, avei reihkhaobu, ae avei vu-apeio nasüe;

³Avei Ramai hai avei chuhdue, E puh hinou bailouwe, avei rüe ae Eye khailu peiyu kaie. Puh sü avei khoukhoulai buh nasüe, avei baibuh alia avei khailu-apeio nasüe, mai ashimai bah hinou Eye nenou khailupa peie.

⁴Paosho züyu MAPAO, Enou neye kuwe, ae ngaobamai hinou Eye khailupa peiwure.

⁵Athai vei veahoyu sünou Eye sühaoloue; souhakayu ashi nanou Eye keilya loure.

⁶Athai vei rainou Eye zha haoloure; ae khüh vei shorü nanou Eye duloure.

⁷E veasho-a buhinou MAPAO ye Enou kue; Enou MAPAO ye soukha peio tea kue. Puhvei rathoki hinou avei pai puhnou keipeie; Avei paira sü puhvei noubei hi velou peie.

⁸Süthaisü deinou lüre alia ngure; Rakiva vei beikheitao-a lü-a ngure, daisounou touyuo Ramai nou raroure.

⁹Puhvei nghou qulu hinou meikhao khaopae, soukanghi peiyu vei mei ae meithou hai puhvei mü hinou pae.

¹⁰Puhnou ratei taokho paloua takoue, puhvei phi khe hisü teihao nou chaotei toue.

¹¹Puhnou shouh pfüyu khaona phao hi palou-a zhaoe, Teikhai vei shouh phaonou zhaotawe.

¹²Teizhi ye panou puhye züpfüe; Dzüzha alao louyu teihao nou puhye sühaopfüa bue;

¹³Puh nghoujü hinou mei tao-a nou teipeivava pawe.

¹⁴MAPAO nou raki hinou pa teisü pae, sübüa Akukulai Ramai vei paisü choue.

¹⁵Puhnou puhvei loushu kapa-a ngaoba maiye hupho rarouloue; Teireiyu ava seive pei-a puletaoye panou tutae.

¹⁶MAPAO nou puhvei ngaoba maiye rarou-a züyu phaki, zaidu vei akhai dei sü ngaopeie ae deiphao vei beikhei sü halia homoa bure.

¹⁷Puhnou reikou nou bah thaikou Eye pailoue; thoushoyu dzü khe hinou Eye süthaipa peie.

¹⁸Puhnou Eye khouko bushoyu avei ngaoba maitao hinou vupa peie; Ajünou khouchi shoyu ngaobamai hinou Eye khailu papeie.

¹⁹E veahoyu dao-a buyu phaki, puletao nou apei hi reih huloue, ana MAPAO nou Eye vupa peie.

²⁰Puhnou Eye kaozhou ashi hinou vupapeie; puhnou Eye khailupa peie daiolouzü puhnou ahi rukhayu bupeie.

²¹Enou acheche hinou vah souyu thaifüa MAPAO nou Eye buu peie; Avei le sheeyu donou puhnou ahi hapeie.

²²Enou MAPAO vei chikhatao sü züwe, Enou avei Ramai hinou tarei tala moe.

²³MAPAO vei chikha taosü Enou züloue, Enou puhvei kharochi zümoyu sü soukhai timoe.

²⁴Avei mah hae touyu hai puhnou süwe, Enou hashi soumoe touyu MAPAO nou süwe.

²⁵Enou cheche-a vah souyu vei thou sü MAPAO nou peie, MAPAO nou avei mah hae touyu süwe.

²⁶Louchelou veiyu mai hi sü louchelou veiyu ngaopeie, mah hayu mai hisü nevei acheche nasü ngaopeiwe.

²⁷Sheeyu mai hisü nevei amashee nasü ngaopeie, ana ashimai hisü nevei zhaipou shiyu nasü ngaopeiwe.

²⁸Tainou souyu maiye nenou khailu peie, ana khaophu souyu maiye nenou sounakou peie.

²⁹MAPAO, ne sü avei ava nasüe; nenou avei azhi nasü souha peie.

³⁰Nevei soukha vanou reihmai me du ali jünou Enou veilousüe. Avei Ramai ye koa nou rei bokha bouvo zhaocho palousüe.

³¹Ramai MAPAO louzü puhvei ludu sü veichekhoe, puhvei chipao sü kaomoyu ali-a hae. Puhvei vupapei phouyu mai hrülai hisü puh hai rü ali bütoue.

³²MAPAO baimoa puh thai Ramai thao bue? Ramai likhei Etaoye vupa peire nasü baie.

³³Ramai hai nasü avei veishoyu baibue; ae avei ludu hi ngaopiyu sü puhnou souha peie.

³⁴Puhnou avei phi sü shu phi büa soupeie; ae Eye panou kushoyu buh hinou laloue.

³⁵Puhnou avei bah sü reih züloure do khesü doupeie, sübüa avei bah panou baosahu vei voulou koute paikhiloue.

³⁶Nenou Eye nevei khailu louyu vei rü sü peie; ne soukha nanou Eye souduso peie.

³⁷Nenou avei ludu sü souka peie, sükia Eye panou phi pyalou-a kaodu tamoe.

³⁸Eye panou ngaobayu maitaoye thaingouloue ae puletao jünou veiloue, ae puletaoye souhamo koute E thaikhai tamoe.

³⁹Enou puletaoye souha chekho peie; ae puletao lashupu louhore; puletao hai anghoujü nou veilouhoa kaodu tare.

⁴⁰Nenou Eye reih soulou süyu khouko sü peie, ae nenou Eye ngaobamai jünou veilouyu sü peie.

⁴¹Nenou Eye ngaobayu maitaoye panou anghoujü nou tuta peie, ae Eye thaihraiyu maiye souka-nghi peie.

⁴²Puletao hai soukha peire mai phoue, ana mailia tave puletaoye vupa peimoe; Puletao nou Ramai ye kue, ana puletao vei akho sü puhnou kei-nou peimoe.

⁴³Enou puletaoye phinou tai-a deisa saposhu naihü kupeie, luduhi konai bütou tea puletaoye aphinou taina peie.

⁴⁴Apei hi reih sou-a Eye duyu maitao bah hinou Eye nenou khailupa peie, ae Enou sümo-ngaomoyu maitaoye panou avei ku-vah soupeie.

⁴⁵Shejü-shevai mainou tave Eye khurüwe, puletao nou avei chipao sü chouloua achi züwe.

⁴⁶Puletao vei khuduyu ae khouko sü hare, südonou puletao vei reih duyu buh hinou pi-ngu-a tapare.

⁴⁷MAPAO hai teisa hriyu Ramaie! Eye vupa-apeioye sü paosholo! Eye khailu peiyu Ramai vei aduso nasü paoshapa peio.

⁴⁸Avei khü-ngu phou peiyu puh sü Ramaie, puhnou tyahrü kukhemai ye poshu akhe thoupeie.

⁴⁹Eye ngaobamai bah hinou Eye sapa lahdo soupeie; Nenou Eye thaihraimai jünou pokupa peie, zhaipou shimai hinou Eye nenou vupapeie.

⁵⁰Südonou Enou neye paosholai, O MAPAO, tyahrü kukhe maitao nghoujü nou Enou lou sou-a nevei zhih paosholai.

⁵¹Puhnou puhvei veo hi dusho-a veilou-ngalouyu peie, puhvei theadzü na-apeio pei hi puh vei leshi sü ngaopeie, puh leshi hai David alia puh vei sholea pei hi teisa nou bupeitheo.